ၾူၼ်တူၵ်းထပ်းၵၼ် လၢႆဝၼ်းသေ ႁဵတ်းႁႂ်ႈမႄႈၼမ်ႉမိူတ်ႇ လူၼ်ႉၾင်ႇၼွင်းထူမ်ႈ တူင်ႈၼႃး ၵူၼ်းၵဵင်းတွင်း မွၵ်ႈ 5 တူင်ႈ။
ဝၼ်းတီႈ 13/08/2024 ယၢမ်းၵၢင်ၼႂ် မႄႈၼမ်ႉမိူတ်ႇ လူၼ်ႉၾင်ႇ ၼွင်းထူမ်ႈ တူင်ႈၼႃး ၵူၼ်းမိူင်း ပွၵ်ႉ 7 တီႈဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ႁဵတ်းႁႂ်ႈတူၼ်ႈၶဝ်ႈ၊ ၸွၵ်းတူၼ်ႈၵႃႈ လႆလွင်ႈၸွမ်းၼမ်ႉၼမ်။
ၵူၼ်းပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၼမ်ႉမိူတ်ႇထူမ်ႈၶႃႈဢေႃႈ တူင်ႈၼႃးဢၼ် ၺႃးၼမ်ႉထူမ်ႈတႄႉ တေမွၵ်ႈ 5 တူင်ႈၼႆႉၶႃႈ။ ယွၼ်ႉၾူၼ်တူၵ်းဢမ်ႇထၢတ်ႇဢမ်ႇဝၢႆး တႄႇဢဝ်ဝၼ်းတီႈ 12 ယၢမ်းႁူဝ်ၶမ်ႈ ၼၼ်ႉမႃးသေ ထိုင်မႃး မိူဝ်ႈဝႃး ဝၼ်းတီႈ 13 ယၢမ်းၵၢင်ၼႂ်ၵေႃႈ ဢဝ်ၼမ်ႉထူမ်ႈ ၼၼ်ႉၶႃႈယဝ်ႉ”- ဝႃႈၼႆ။
ဢိင်ၼိူဝ် လွင်ႈၼမ်ႉထူမ်ႈ တူင်ႈၼႃး ၸိူင်ႉၼႆသေ ယူႇတီႈ ၸဝ်ႈၼႃး ၵမ်ႈၼမ်တႄႉ ဢွၼ်ၵၼ်မႆႈၸႂ်ႁႅင်း ၵူဝ်တူၼ်ႈၶဝ်ႈ ၼဝ်ႈပႅတ်ႈလူႉတၢႆ ဝႃႈၼႆ။
“ၼမ်ႉၼႆႉ တႄႇၼွင်းၵၢင်ၼႂ်မိူဝ်ႈဝႃး တေႃႇထိုင်ႁူဝ်ၶမ်ႈၵေႃႈ ပႆႇယွမ်းလူင်း ပေႃးၾူၼ်တူၵ်း ဢမ်ႇထၢတ်ႇထႅင်ႈတႄႉ ၼမ်လႄႈဢေႇ တူၼ်ႈၶဝ်ႈၼႂ်းၼႃးၼၼ်ႉ ႁူႉတေၼဝ်ႈပႅတ်ႈၼၼ်ႉၶႃႈယဝ်ႉ။ တီႈၼမ်ႉထူမ်ႈ ယူႇတေႃႈလဵဝ်ၼႆႉ ဢၼ်သွမ်ႈယဝ်ႉဝႆႉႁိုင်တႄႉ ဢမ်ႇလႆႈမႆႈၸႂ်။ ဢၼ်တိုၵ်ႉသွမ်ႈမႂ်ႇတႄႉ ယွၼ်ႉတူၼ်ႈ ၶဝ်ႈပႆႇၸပ်းလႄႈ ဢဝ်တူၼ်ႈၶဝ်ႈ ၽူးလွင်ႈၸွမ်းၼမ်ႉၵေႃႈ မီးဢေႃႈ။ ဢၼ်ပႆႇလႆႈသွမ်ႈသေ တိုၵ်ႉဝၢင်း ၸွၵ်းတူၼ်ႈၵႃႈဝႆႉ ၸိူဝ်းၼၼ်ႉၵေႃႈ ဢဝ်ၸွၵ်းတူၼ်ႈၵႃႈ ၽူးလွင်ႈၸွမ်းၼမ်ႉၵေႃႈ မီးတင်းၼမ်ၶႃႈယဝ်ႉ”- ၵူၼ်းပိုၼ်ႉတီႈ ဝဵင်းၵဵင်းတွင်း သိုပ်ႇလၢတ်ႈၼႄၼင်ႇၼႆ။
ဝဵင်းၵဵင်းတွင်းၼႆႉ တင်းမူတ်းမီး 7 ပွၵ်ႉ 3 ဢိူင်ႇ မီးႁူဝ်ၵူၼ်း 8,000 ပၢႆ။ ၵမ်ႈၼမ် ႁဵတ်းၵၢၼ်သူၼ်ႁႆႈၼႃး လဵင်ႉတွင်ႉ။
လိူဝ်ၼၼ်ႉ မိူၼ်ၼင်ႇ တၢင်းဝဵင်းတႃႈၶီႈလဵၵ်းၵေႃႈ မိူၼ်ၵၼ် ဝၼ်းတီႈ 13 ၼႆႉ ၼမ်ႉသၢႆၼွင်းထူမ်ႈ ၸွမ်း ၵၢတ်ႇတႃႈလေႃႉ၊ ပွၵ်ႉသၼ်သၢႆး (လိုဝ်ႉ) ၊ သၼ်သၢႆး (တႆး)၊ မၢၵ်ႇၵႃႇႁူဝ်ၶမ်း၊ မႄႈၶၢဝ်လႄႈ ၸွမ်းသဵၼ်ႈ တၢင်းလူင် ၸွမ်းတီႈၶူင်ႈယၢၼ်း မၢင်တီႈ ၼမ်ႉလိုၵ်ႉထိုင်ဢႅဝ် ၸိူဝ်းၼႆႉ။
တီႈဝဵင်းၵဵင်းတုင်ၵေႃႈ မိူဝ်ႈဝႃး ဝၼ်းတီႈ 13 ယၢမ်းဝၢႆးဝၼ်း မႄႈၼမ်ႉၶိုၼ် ၼွင်းထူမ်ႈ တူင်ႈႁႆႈၼႃးႁိူၼ်း ယေး ၵူၼ်းမိူင်း တီႈဢိူင်ႇယၢင်းလေႃးလႄႈ ပွၵ်ႉ 5 ႁၢဝ်ႈႁႅင်း မၢင်တီႈ ၼမ်ႉလိုၵ်ႉထိုင်ဢႅဝ် ၸိူဝ်းၼႆႉ။
