ၾႆးၾႃႉသျွတ်ႉ မႆႈႁိူၼ်းယေး ၵူၼ်းမိူင်းၵဵင်းတွင်း လင်ၼိုင်ႈ လူႉသုမ်းဢမ်ႇယွမ်း 300 သႅၼ်ပျႃး ဝႃႈၼႆ။

ဝၼ်းတီႈ 12/7/2024 ယၢမ်းႁူဝ်ၶမ်ႈ 6:20 မူင်းထိုင် မွၵ်ႈ 8 မူင်း ၾႆးမႆႈႁိူၼ်းယေး ၵူၼ်းဝၢၼ်ႈသေးတၢၼ်း ပွၵ်ႉ 5 ဝဵင်း ၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လင်ၼိုင်ႈ ယွၼ်ႉၾႆးၾႃႉသျွတ်ႉသေ ထုၵ်ႇမႆႈပႅတ်ႈတင်းလင် လွင်ႈတုမ်ႉတိူဝ်ႉၵူၼ်းႁိူၼ်းယေး လူႉတၢႆမၢတ်ႇၸဵပ်းတႄႉ ဢမ်ႇမီး ဝႃႈၼႆ။

ၵူၼ်းပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၾႆးၾႃႉသျွတ်ႉၶႃႈဢေႃႈ ႁိူၼ်းယေးၼၼ်ႉ ထုၵ်ႇမႆႈပႅတ်ႈတင်းလင်ၶႃႈယဝ်ႉ။ ၶူဝ်းၶွင်ၼႂ်းႁိူၼ်းယေးတႄႉ ဢမ်ႇတၼ်းလႆႈသင်ၶႃႈ။ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ႁိူၼ်းလင်ၼၼ်ႉသမ်ႉ ပဵၼ်ႁိူၼ်းမႆႉၵင်ႈပႅၼ်ႈသွင်ၸၼ်ႉၶႃႈဢေႃႈ” – ဝႃႈၼႆ။

ႁိူၼ်းယေး ၵူၼ်းဝၢၼ်ႈသေးတၢၼ်း ဢၼ်ထုၵ်ႇၾႆးမႆႈၼၼ်ႉ ၼႂ်းမုင်ႉႁေႃႁိူၼ်းၼၼ်ႉ မီးဝႆႉၵူၼ်းထဝ်ႈ 2 ၵေႃႉလႄႈ လၢၼ်ဢွၼ်ႇ ဢႃယု 3 ၶူပ်ႇၵေႃႉၼိုင်ႈ တင်းမူတ်းႁူမ်ႈၵၼ်ယူႇဝႆႉ 6 ၵေႃႉ ဝႃႈၼႆ။

ၼွၵ်ႈလိူဝ်ၼၼ်ႉ ၾႆးၼႆႉ လမ်းမႆႈပႃးထႅင်ႈ သိုင်ႇဝႆႉၶူဝ်းၶွင် (ၵူဝ်ႇတွင်ႇ) ထႅင်ႈလင်ၼိုင်ႈ ဢၼ်မီးၾၢႆႇႁွင်ႇ ႁိူၼ်းၾႆးမႆႈ ယၢၼ်မွၵ်ႈ 3 ဝႃးၼၼ်ႉ ဝႃႈၼႆ။

“ၾႆးၼႆႉ တေမႆႈႁိူၼ်းမွၵ်ႈ 1 ၸူဝ်ႈမူင်းၼႆႉ ယဝ်ႉၵေႃႈ လၢမ်းမႆႈပႃး သိုင်ႇၵဵပ်းၶွင် (ၵူဝ်ႇတွင်ႇ) လင်ၼိုင်ႈ။ ၵူဝ်ႇတွင်ႇ ၼၼ်ႉတႄႉ ၵႃးၶႄၾႆးမႃးႁူတ်းၸွႆႈသေ တၼ်းမွတ်ႇၵႂႃႇဢေႃႈ။ ႁိူၼ်းၾႆးမႆႈၼၼ်ႉလႄႈ သိုင်ႇၼၼ်ႉတႄႉ တေယၢၼ်ၵၼ်မွၵ်ႈ 3 ဝႃးၼႆႉၶႃႈ”- ၵူၼ်းပိုၼ်ႉတီႈ ဝဵင်းၵဵင်းတွင်း သိုပ်ႇလၢတ်ႈၼႄၼင်ႇၼႆ။

ဝဵင်းၵဵင်းတွင်းၼႆႉ တင်းမူတ်းမီးၵႃးၶႄၾႆး 2 လမ်း။ တႃႇလမ်းၼိုင်ႈသမ်ႉ ၵွႆဝႆႉ။ မိူဝ်ႈၽွင်းၾႆးမႆႈၼၼ်ႉ မႃးၸွႆႈလမ်းလဵဝ်။ ၵူၺ်းၵႃႈ ၵႃးၼၼ်ႉသမ်ႉ မႃးတူၵ်းႁွင်ႈ (ၶမ်ႁွင်ႈ) ဝႆႉလႄႈ ဢမ်ႇထိုင်တီႈႁိူၼ်းၾႆးမႆႈလီ လႆႈလၢၵ်ႈဢဝ် သၢႆယၢင်ၼမ်ႉ တီႈၵႃးၼၼ်ႉ ၵႂႃႇႁူတ်းၸွႆႈ ၸိူင်ႉၼၼ်ၵူၺ်း ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 30/1/2024 ယၢမ်းၵၢင်ၼႂ်ၸဝ်ႉ 4 မူင်းပၢႆ ၾႆးမႆႈႁိူၼ်းယေး ၵူၼ်းမိူင်းသွင်လင် ၼႂ်း ပွၵ်ႉ 1 ဝဵင်းၵဵင်းတွင်း ၼၼ်ႉၵေႃႈ လူႉသုမ်းၼမ် ဝႃႈၼႆ။

ဝဵင်းၵဵင်းတွင်းၼႆႉ တင်းမူတ်းမီး 7 ပွၵ်ႉ 3 ဢိူင်ႇ ႁူဝ်ၵူၼ်းမီး 8,000 ပၢႆ ဝႃႈၼႆ။