သွင်ဝၼ်းထပ်းၵၼ်မႃးၼႆႉ ႁိူၼ်းယေးၵူၼ်းဝၢၼ်ႈသၢမ်လင် တီႈပွၵ်ႉ 1 ဝဵင်းၵဵင်တွင်း ထုၵ်ႇၵူၼ်းၶဝ်ႈသွၵ်ႈတဝ် လၵ်ႉၶူဝ်းၶွင် ၵႃႈၶၼ်ယႂ်ႇ ၼႂ်းႁိူၼ်းၵႂႃႇ လႆႈၵႂႃႇငိုၼ်းၼပ်ႉႁူဝ်သႅၼ်ပျႃးလႄႈ ၶမ်း ၸိူဝ်းၼႆႉ။

ဝၼ်းတီႈ 18/8/2023 ယၢမ်းၵၢင်ၼႂ် ႁိူၼ်းယေး ပႃႈၼၢင်းသေး ပဵၼ်ႁိူၼ်းၸၼ်ႉလဵဝ် တီႈဝၢၼ်ႈၼမ်ႉမေႃႇၶမ်း ပွၵ်ႉ 1 ဝဵင်းၵဵင်းတွင်း ၸႄႈဝဵင်းမိူင်း ၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ထုၵ်ႇၵူၼ်းၶဝ်ႈသွၵ်ႈတဝ် လႆႈၵႂႃႇငိုၼ်း 500,000 ပျႃး ။ သိုပ်ႇၵႂႃႇၶိုၼ်ႈ ႁိူၼ်းလုင်းၸၢႆးၵုမႃႇရ ပႃႈမျႃႉထေး ဢၼ်ယူႇတိတ်းၸပ်းၵၼ်တင်းႁိူၼ်းပႃႈ ၼၢင်းသေးၼၼ်ႉ ထႅင်ႈ လႆႈၵႂႃႇၾူၼ်း (မိုဝ်းထိုဝ်) 1 ၶိူင်ႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “သွင်ဝၼ်းထပ်းၵၼ်မႃးၼႆႉ ႁိူၼ်းၵူၼ်းဝၢၼ်ႈ ထုၵ်ႇၵူၼ်းၶဝ်ႈလၵ်ႉ 3 လင် ၵမ်းလဵဝ်။ ၽူႈလၵ်ႉၼၼ်ႉ ၶဝ်တေငၢင်ႉၽၵ်းတူႁိူၼ်းပိူၼ်ႈသေ ၶဝ်ႈသွၵ်ႈ လၵ်ႉဢဝ်ၶူဝ်းၶွင်ဢၼ်မီးၵႃႈၶၼ်မၼ်းၵႂႃႇ။ ၶဝ်ဢဝ်တိုဝ်ႉတၢင်း မိူဝ်ႈၸဝ်ႈႁိူၼ်းဢမ်ႇယူႇႁိူၼ်း ၵႂႃႇႁဵတ်းၵၢၼ် ၸိူဝ်းၼႆႉၶႃႈ ”- ဝႃႈၼႆ။

ယၢမ်းလဵဝ် တီႈၵဵင်းတွင်းၼႆႉ ဢမ်ႇမိူၼ်မိူဝ်ႈၵူႈ ပွၵ်ႈယဝ်ႉ သင်ဝႃႈ ဢမ်ႇမီးၵူၼ်းပႂ်ႉႁိူၼ်းသေၵေႃႉၸိုင် လီလႆႈမႆႈၸႂ်ႁႅင်း။ ပွႆႇႁိူၼ်းယေး ၶတ်းသေႃးဝႆႉသေ ၵႂႃႇႁဵတ်းၵၢၼ် မိူၼ်မိူဝ်ႈၵူႈပွၵ်ႈတႄႉ ဢမ်ႇလႆႈယဝ်ႉ။ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၵၢၼ်ပၢႆးမၢၵ်ႈမီးတူၵ်း ၵူၼ်းမိူင်းႁႃၵိၼ်ယၢပ်ႇ ၶူဝ်းၵုၼ်ႇၶွင်ၵိၼ်ယႅမ်ႉသမ်ႉ ၵႃႈသုင်လႄႈ ၵူၼ်းၼႆႉ ပေႃးဢမ်ႇႁႃလႆႈ ဢမ်ႇမီးသင်ၵိၼ်ၵေႃႈ ၵႃႈလႆႈတိူၵ်ႈ ဢႅဝ်ႇႁႃလၵ်ႉ မႃးၶိူဝ်းယႂ်းယဝ်ႉ ၵူၼ်းပိုၼ်ႉတီႈၵဵင်းတွင်းလၢတ်ႈ။

မိူဝ်ႈဝၼ်းတီႈ 17/8/2023 ယၢမ်းၵၢင်ၼႂ် ႁိူၼ်း ပႃႈၼၢင်းပၢၼ်ႉ ပဵၼ်ႁိူၼ်းသွင်ၸၼ်ႉ တီႈဝၢၼ်ႈၵုၼ်မူင်ႈ ပွၵ်ႉ 1 ဝဵင်းၵဵင်း တွင်း ၼၼ်ႉၵေႃႈ ထုၵ်ႇၵူၼ်းၶဝ်ႈလၵ်ႉ ငၢင်ႉၽၵ်းတူႁိူၼ်းယေးမၼ်းၼၢင်းသေ ၶဝ်ႈသွၵ်ႈတဝ်ၼႂ်းႁိူၼ်း လႆႈၵႂႃႇငိုၼ်း 50,000 ပျႃးလႄႈ ပေႇႁူၶမ်း 1 ၵူႈ။

ယဝ်ႉၵေႃႈ ၼႂ်းပီ 2023 ၼႆႉ ရူတ်ႉၶိူင်ႈၵူၼ်းမိူင်းၵဵင်းတွင်းႁၢႆ ဢမ်ႇယွမ်း 3 လမ်းယဝ်ႉ ၸူဝ်ႈသိုၵ်းမၢၼ်ႈ ယိုတ်းမိူင်းမႃး ၼႆႉ။ မိူဝ်ႈ ႁူဝ်လိူၼ်ၵျုႊလၢႆႊၼၼ်ႉ ရူတ်ႉၶိူင်ႈပႃႈၼွတ်း လမ်းၼိုင်ႈ တီႈဝၢၼ်ႈၵုၼ်ၼႃး ပွၵ်ႉ 3 ၵိုတ်းဝႆႉ ၼႂ်းဝၢင်းႁိူၼ်း ၸဝ်ႈၵဝ်ႇဝႆႉ ၼၼ်ႉ ၵေႃႈ ထုၵ်ႇၵူၼ်း လၵ်ႉဢဝ်ၵႂႃႇ ပဵၼ်ရူတ်ႉၶိူင်ႈမိူင်းၶႄႇ တေတူၵ်းမႅၼ်ႈငိုၼ်းမၢၼ်ႈ 7 သႅၼ်ပျႃး ၼႆယဝ်ႉ။

ဝဵင်းၵဵင်းတွင်းၼႆႉ တင်းမူတ်းမီး 7 ပွၵ်ႉ 3 ဢိူင်ႇ မီးႁူဝ်ၵူၼ်း 8,000 ပၢႆ ဝႃႈၼႆ။