ႁွင်ႈၵၢၼ်ၾၢႆႇၾႆးၾႃႉလႄႈ ၾၢႆႇၽွင်းငမ်း တႂ်ႈသိုၵ်းမၢၼ်ႈ ၵုမ်းၵမ် ၶၢမ်းၶဝ်ႈပၵ်းသဝ်ၾႆးၾႃႉ ၼႂ်းဝၢင်းႁိူၼ်းယေး ၵူၼ်းမိူင်းၵဵင်းတွင်း လူၺ်ႈဢမ်ႇလၢတ်ႈၸဝ်ႈႁိူၼ်းသိုဝ်ႈသိုဝ်ႈ၊ ၵူၼ်းမိူင်းမႆႈၸႂ် ဝၢႆးမႃးၵူဝ် ၵူဝ်ၺႃး ယိုတ်းဢဝ် ဝၢင်းႁိူၼ်းယေး ၵႂႃႇလၢႆလၢႆၵူၺ်းယဝ်ႉဝႃႈၼႆ။

တႄႇဢဝ် ႁူဝ်လိူၼ်ဢွၵ်ႊထိူဝ်ႊပိူဝ်ႊ 2023 ၼႆႉမႃး ႁွင်ႈၵၢၼ် ၾၢႆႇၾႆးၾႃႉ ၶၢမ်းၶဝ်ႈပၵ်းသဝ်ၾႆးၾႃႉ ၼႂ်းဝၢင်းႁိူၼ်း ၵူၼ်း ဝၢၼ်ႈ ၸွမ်းသဵၼ်ႈတၢင်းလူင် ၼႂ်းဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်း ၸၢၼ်း ။

ၵူၼ်းပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ဝႃႈ ၽႅၼ်ၵၢၼ်ၶႂၢၵ်ႈသဵၼ်ႈတၢင်းၼႆသေ ၶဝ်ဢမ်ႇၾင်လၵ်းၾႆးၶၢင်ႈတၢင်း၊ ၶဝ်ၶဝ်ႈၶုတ်းၾင်လၵ်းၾႆးမႂ်ႇ ၼႂ်းဝၢင်းႁိူၼ်းၵူၼ်းမိူင်းၸိူဝ်းယူႇသွင်ၾၢၵ်ႇၶၢင်ႈတၢင်း၊ ဢၼ်လီမႆႈၸႂ်ၼႆႉတႄႉ ဝၢႆးမႃး ၵူဝ်ၶဝ်ယိုတ်းဢဝ်တီႈလိၼ်ႁိူၼ်းယေး ၵူၺ်းယဝ်ႉ ”- ဝႃႈၼႆ။

လွင်ႈတေၾင်လၵ်းၾႆးမႂ်ႇၼႆႉ ၾၢႆႇၵဵဝ်ႇၶွင်ႈလူင်းပိုၼ်ႉတီႈႁွင်ႉၵၢင်ႉၵႄႇဝၢၼ်ႈသပ်းလႅင်းၼေယူႇသေတႃႉ ဢမ်ႇလၢတ်ႈသိုဝ်ႈသိုဝ်ႈ ဝႃႈတေၾင်ၼႂ်းဝၢင်းႁိူၼ်းယေးၵူၼ်းမိူင်း ၊ လၢတ်ႈဝႃႈ မီးၽႅၼ်ၵၢၼ်ၶႂၢၵ်ႈသဵၼ်ႈတၢင်းၼႆၵူၺ်း။

“ၵွၼ်ႇၶဝ်တေမႃးပၵ်းသဝ်ၼၼ်ႉ ၶဝ်ႁွင်ႉၵူၼ်းလူင် ၼႂ်းပွၵ်ႉ ၵႂႃႇလၢတ်ႈသပ်းလႅင်းၼႄဝႃႈ ၶဝ်တေၶႂၢၵ်ႈတၢင်း ပုၼ်ႈတႃႇ ႁႂ်ႈဝၢၼ်ႈမူၼ်းၵူၼ်းၵိုၼ်း တႃႇပီႈၼွင်ႉၵဵင်းတွင်းၶိုၼ်ႈယႂ်ႇ။ ပေႃးဢမ်ႇၶႂၢၵ်ႈသဵၼ်ႈတၢင်း ဢမ်ႇၸၢင်ႈပဵၼ်ဝဵင်းၶိုၼ်ႈယႂ်ႇလႆႈ။ ၵွပ်ႈၼၼ် ပေႃး ၶႂ်ႈႁႂ်ႈပဵၼ်ဝၢၼ်ႈဝဵင်းၶိုၼ်ႈယႂ်ႇ ႁႂ်ႈႁူမ်ႈမိုဝ်းၸွမ်းၶဝ် ၼႆဢေႃႈ” – ၵူၼ်းပိုၼ်ႉတီႈ ဝဵင်းၵဵင်းတွင်း သိုပ်ႇလၢတ်ႈၼႄၼင်ႇၼႆ။

သဵၼ်ႈတၢင်းၼႂ်းဝဵင်းၵဵင်းတွင်း ဢၼ်သိူဝ်ႇယၢင်ဝႆႉၼႆႉ တၢင်းၵႂၢင်ႈမီး 15 ထတ်း ။ တေၶႂၢၵ်ႈ ဢွၵ်ႇထႅင်ႈ 5 ထတ်း တင်းမူတ်းပဵၼ် 20 ထတ်း။ ၵွပ်ႈၼႆလႄႈ လူင်ပွင်ၸိုင်ႈ ၸင်ႇဢဝ်သဝ်ၾႆးၾႃႉ လၵ်းမႂ်ႇ ၼႆႉ ၶၢမ်းၶဝ်ႈပၵ်း ၼႂ်းဝၢင်းႁိူၼ်းယေး ၵူၼ်းမိူင်း ၸိူဝ်းယူႇ သွင်ၾင်ႇၶၢင်ႈတၢင်းဝႃႈၼႆ။

လၵ်းၾႆးၾႃႉမႂ်ႇ ဢၼ်ၶၢမ်းၶဝ်ႈပၵ်းဝႆႉၼႂ်းဝၢင်းႁိူၼ်းၵူၼ်းဝၢၼ်ႈ တီႈဝဵင်းၵဵင်းတွင်းၼႆႉသမ်ႉ ပဵၼ်ၼႂ်းပွၵ်ႉ 1 ပွၵ်ႉ 2 ပွၵ်ႉ 3 လႄႈ ပွၵ်ႉ 5 ၸိူဝ်းၼႆႉ။ ယၢမ်းလဵဝ် ၾၢႆႇၾႆးၾႃႉၶဝ် တႄႇပၵ်းသဝ်ၾႆးၾႃႉ ၼႂ်းပွၵ်ႉ 1 တင်း ပွၵ်ႉ 5 ဝႆႉယဝ်ႉ။ ဝဵင်းၵဵင်းတွင်းၼႆႉ တင်း မူတ်းမီး 7 ပွၵ်ႉ 3 ဢိူင်ႇ မီးႁူဝ်ၵူၼ်း 8,000 ပၢႆ ဝႃႈၼႆ။