ၵူၼ်းမူႇၸေႊ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ လမ်းၽၼ်းၸွမ်းတၢင်း ၸူၼ်ႁိမ်ဢဝ်ၵႂႃႇရူတ်ႉၶိူင်ႈ လမ်းၼိုင်ႈ ၽွင်းတိုၵ်ႉၵႂႃႇသူင်ႇၶွင်ၵိၼ်ယႅမ်ႉ တီႈၵၢတ်ႇ ဝႃႈၼႆ။

ဝၼ်းတီႈ 13/08/2024 ယၢမ်းၵၢင်ၼႂ်ၸဝ်ႉ 4:35 မူင်း ၽူႈၸၢႆး ဢႃယု 50 ပၢႆ ၵေႃႉၼိုင်ႈ ၺႃးၸုမ်းဢမ်ႇႁူႉ ၾၢႆႇ 4 ၵေႃႉ လမ်းၽၼ်းၸူၼ်ဢဝ်ရူတ်ႉၶိူင်ႈ မၼ်းၸၢႆးၵႂႃႇ တီႈႁေႃၼႃႇလီႇ ၵၢင်ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ လႆႈတိူဝ်ႉမၢတ်ႇၸဵပ်း ၸွမ်းမိုဝ်းၸွမ်းၶႃ ၼႆယဝ်ႉ။

ၽူႈၸၢႆး ဢႃယု 50 ပၢႆ ၺႃးၽၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းၶႃႈ ဢဝ်ထူဝ်ႇၽူးသေ တေၵႂႃႇသူင်ႇပၼ်ၵူၼ်း ၶၢႆၵၢတ်ႇ (စျေးသည်) တီႈၵၢတ်ႇမူႇၸေႊၼႆႉ မီးၵူၼ်းႁၢႆႉ 4 ၵေႃႉ သွၼ်ႉရူတ်ႉၶိူင်ႈ မႃးၸွမ်းၵၼ် လမ်းၼိုင်ႈသေ ႁေႃႈမႃးၽႃႇသႂ်ႇႁိမ်းၶၢင်ႈၶႃႈ ၵမ်းၼႆႉ ၶႃႈပၢၵ်ႈၶဝ်ပႅတ်ႈသေ ပွႆႇရူတ်ႉၶိူင်ႈလူမ်ႈၵႂႃႇ ၶႃႈတင်းၶဝ် လႆႈမင်ၵၼ်ၵမ်ႉဢေႃႈ။ ယွၼ်ႉၶဝ်ဢဝ်ၽႃႉၽၼ်းသႂ်ႇသေ ၶႃႈငိူင်ႉပၢႆႈ ၶဝ်ၵေႃႈဢဝ်ရူတ်ႉၶိူင်ႈၶႃႈၵႂႃႇဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ၸုမ်းၵူၼ်းႁၢႆႉ 4 ၵေႃႉ ဢၼ်ၸူၼ်ဢဝ် ရူတ်ႉၶိူင်ႈၵႂႃႇၼႆႉ ပဵၼ်ၽူႈၸၢႆးတင်းမူတ်း။ ယဝ်ႉၵေႃႈ တၼ်းလႆႈၽၼ်းသႂ်ႇ ၵူၼ်းမူႇၸေႊ တိူဝ်ႉၺႃး တီႈၶႅၼ်မိုဝ်း၊ တီႈၼွၵ်းသွၵ်ႇလႄႈ တီႈၶႃ 2 ႁွႆး ၵူၺ်းၵႃႈ ဢမ်ႇထိုင်တီႈလႆႈမႆႈၸႂ် ဝႃႈၼႆ။

ၵဵဝ်ႇၵပ်းလွင်ႈၼႆႉသေ ၾၢင်ႉထိုင်ပၼ် ၵူၼ်းမူႇၸေႊ ၵူႈၵေႃႉၵူႈၵူၼ်းဝႃႈ သင်ဝႃႈ တေၵႂႃႇလႂ်ၼႆ ႁႂ်ႈၾၢင်ႉ ၵၼ်ၽွင်ႈ ယွၼ်ႉၽူႈလၵ်ႉၸၵ်ႉၶုတ်ႈ လိူင်ႈၼမ်ႁႅင်း ဢမ်ႇႁူႉဝႃႈ ၽႂ်ပဵၼ်ၽႂ် ၸိူဝ်းၼႆႉ – ၽူႈၸၢႆး ၵေႃႉၺႃး ၽၼ်းၼၼ်ႉ ပၼ်ၾၢင်ႉလၢတ်ႈၼႄၼင်ႇၼႆ။

ပူၼ်ႉမႃး ဝၼ်းတီႈ 22 လိူၼ်ၵျုၼ်ႊ ၼၼ်ႉၵေႃႈ ၵူၼ်းမိူင်း ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ၶဝ်ႈတီႉၺွပ်း ဢဝ်ၵႂႃႇ ပဵၼ်တူဝ်ယိူဝ်ႇ တီႈပွၵ်ႉၸွၼ်ႊၸူဝ်ႇ။ ၼႂ်းဝၼ်းၼၼ်ႉၵူၺ်း ယၢမ်းၵၢင်ၶမ်ႈ ၵူၼ်းၶၢႆမၢၵ်ႇမႆႉ တီႈပွၵ်ႉၵွင်းမူးတူင်ႈ ၼၼ်ႉ ၵေႃႈ ၺႃးၸုမ်းဢမ်ႇႁူႉၾၢႆႇထႅင်ႈ ဢဝ်ၵွင်ႈငႃသေ ၸူၼ်ဢဝ်ထူင်ငိုၼ်းၵႂႃႇ။

ၼႂ်းလိူၼ်ၵျုၼ်ႊပူၼ်ႉမႃးၼႆႉ ၵူၼ်းမူႇၸေႊ ၺႃးၸူၼ်လႄႈ ထုၵ်ႇတီႉၺွပ်း ဢဝ်ပဵၼ်တူဝ်ယိူဝ်ႇ ဢမ်ႇယွမ်း 7 ပွၵ်ႈ။ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ဢမ်ႇမီးလွင်ႈႁူမ်ႇလူမ်ႈ တႃႇၵူၼ်းမိူင်းသင် ဝႃႈၼႆ။