တႄႇဢဝ်ႁူဝ်လိူၼ် ဢေႃႊၵတ်ႊသ်ၼႆႉမႃး ၾူၼ်တူၵ်းဢမ်ႇထၢတ်ႇ ၼမ်ႉပုင်ႇ လူၼ်ႉၼွင်းထူမ်ႈ သဵၼ်ႈတၢင်းရူတ်ႉၵႃး ယႂႃႇငၢၼ်ႇ – ဢွင်ႇပၢၼ်းသေ ထူမ်ႈပႃး သူၼ်မၢၵ်ႇၸွၵ်း သူၼ်ၽၵ်းၵၢတ်ႇပီ ပီႈၼွင်ႉၵူၼ်းမိူင်းဝၢၼ်ႈမျၢႆႇ ၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။

ဝၼ်းတီႈ 13/08/2024 ၼႆႉ ၼမ်ႉထူမ်ႈသဵၼ်ႈတၢင်း ယွမ်းလူင်းၵႂႃႇဢိတ်းၼိုင်ႈ ရူတ်ႉၵႃး ၵႂႃႇမႃးလႆႈ ယဝ်ႉသေတႃႉ သဵၼ်ႈတၢင်းလူႉၵွႆႇၵႂႃႇတင်းၼမ် ယၢမ်းလဵဝ် ၼမ်ႉယိုင်ႈဝႆႉၼႂ်းသူၼ်မၢၵ်ႇၸွၵ်းမွၵ်ႈ 6 ဢေႊၶိူဝ်ႊလႄႈ သူၼ်ၽၵ်းၵၢတ်ႇပီထႅင်ႈ တင်းၼမ် – ဝႃႈၼႆ။

ၵူၼ်းပိုၼ်ႉတီႈ ယႂႃႇငၢၼ်ႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၸႂ်ႈယဝ်ႉၶႃႈ ၾူၼ်တူၵ်းႁႅင်း မွၵ်ႈ 2-3 ဝၼ်းသေ ၼမ်ႉပုင်ႇဢၼ်မီးၾၢႆႇၼိူဝ်တၢင်းၵႃးၼၼ်ႉ လူၼ်ႉၼွင်းထူမ်ႈသဵၼ်ႈတၢင်း။ တီႈယႂႃႇငၢၼ်ၼႆႉ ၼမ်ႉဢမ်ႇယၢမ်ႈထူမ်ႈႁႅင်းမိူၼ်ၼႆသေပွၵ်ႈ။ မိူဝ်ႈဝႃး ရူတ်ႉၵႃး ၵႂႃႇမႃးပေႃးဢမ်ႇလႆႈ။ ၼမ်ႉၼႆႉ လူင်းၵႂႃႇထူမ်ႈ ၼႂ်းသူၼ်မၢၵ်ႇၸွၵ်း၊ သူၼ်ၽၵ်းၵၢတ်ႇပီ ဢၼ်မီးၾၢႆႇတႂ်ႈတၢင်းၵႃးၼၼ်ႉ လူႉသုမ်းတင်းၼမ်”- ဝႃႈၼႆ။

မိူဝ်ႈဝႃး ဝၼ်းတီႈ 12/08/2024 ၼႆႉ ၼမ်ႉၼွင်းထူမ်ႈ ၼိူဝ်သဵၼ်ႈတၢင်းရူတ်ႉၵႃး ယႂႃႇငၢၼ် – ဢွင်ႇပၢၼ်းလႄႈ ႁဵတ်းႁႂ်ႈ ၵၢၼ်တိတ်းတေႃႇ တေႃႉသူင်ႇၶူဝ်းၵုၼ်ႇၵိုတ်းၶၢတ်ႇၵႂႃႇ ၵမ်းၼိုင်ႈ။ 

ၵူၼ်းဝၢၼ်ႈမျၢႆႇ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၼမ်ႉယွမ်းၵႂႃႇယဝ်ႉ ဝႃႈၼႆသေတႃႉ ၾူၼ်တိုၵ်ႉတူၵ်းယူႇလႄႈ ၼမ်ႉၸၢင်ႈၼွင်းထူမ်ႈၶိုၼ်းလႆႈၵူႈၶၢဝ်း။ ၸဝ်ႈသူၼ်ၵေႃႈ မႆႈၸႂ် ၵူဝ်ၼမ်ႉၶဝ်ႈသူၼ်သေ လူႉသုမ်းမၢၵ်ႇၶဝ်ႈတဝ်ႈၼမ်ႉထႅင်ႈ”- ဝႃႈၼႆ။

သဵၼ်ႈတၢင်း ဢၼ်ၼမ်ႉၼွင်းထူမ်ႈၼႆႉ ပဵၼ်သဵၼ်ႈတၢင်း ဢွင်ႇပၢၼ်း – ယႂႃႇငၢၼ်ႇ ၵူၺ်းဢမ်ႇၵႃး ပဵၼ်ပႃးသဵၼ်ႈတၢင်း လမ်ႇလွင်ႈ ဢၼ်လုၵ်ႉတူၼ်ႈတီး ၵႂႃႇဝဵင်းလိူဝ်ႇ။

ၽူႈလူင်ႉလႅၼ်ႇ ၾၢႆႇၾိင်ႈၾႃႉရႃႇသီႇ ၸုၸုၸၢၼ်ႇတႄႉ တႅမ်ႈတၢင်ႇတီႈၾဵတ်ႉသ်ပုၵ်ႉ ပေႉမၼ်းဝႆႉဝႃႈ ဝၼ်းတီႈ 13 ၼႆႉ ၾူၼ်တေတူၵ်းႁႅင်း ၼႂ်းၸႄႈဝဵင်းမိူင်းတူၼ် ၊ မိူင်းပၼ်ႇ ၊ လၢင်းၶိူဝ်း ၊ မိူင်းၼၢႆး ၊ ၼမ်ႉၸၢင်၊ ယွင်ႁူၺ်ႈ ၊ ႁၢႆးဝူဝ်း ၊ ဢွင်ႇပၢၼ်း (ဢုမ်ႇပဝ်း)၊ ၵၢတ်ႇလေႃႉ ၸိူဝ်းၼႆႉလႄႈ ႁႂ်ႈၸဝ်ႈရူတ်ႉၸဝ်ႈၵႃး ၵူၼ်းမိူင်းၾၢင်ႉတူၺ်းၶၢဝ်ႇ ၾိင်ႈၾႃႉသေ ၸင်ႇၵႂႃႇဝႃႈၼႆဝႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ၶၢဝ်ႇၾိုၵ်းၵၢၼ်)