မိူဝ်ႈၼႆႉ ဝၼ်းတီႈ 13/08/2024 ယၢမ်းၵၢင်ဝၼ်း ၶၼ်ငိုၼ်းမၢၼ်ႈ သိုပ်ႇလူင်းထႅင်ႈ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 85,000 ပျႃး မၢင်တီႈ 86,000 ပျႃး တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းၵၢင်ဝၼ်းၼႆႉ ငိုၼ်းၶႄႇ 100 ယႂၼ်ႊ လႆႈ ငိုၼ်းမၢၼ်ႈ 85,000 ပျႃး မၢင်တီႈ 86,000 ပျႃးယဝ်ႉ။ ၶၢဝ်းတၢင်း 2 လိူၼ်တၢင်းၼႃႈၼႆႉ 100 ယႂၼ်ႊ ငိုၼ်း ၶႄႇ တေလႆႈ 100,000 ပျႃးယဝ်ႉယူဝ်ႉ ထၢင်ႇတႄႉ။ ၶၼ်ငိုၼ်းမၢၼ်ႈၼႆႉ ဢမ်ႇၼိမ်ၶႃႈ သိုပ်ႇလူင်းယူႇတိၵ်း တိၵ်းၶႃႈဢေႃႈၼႆႉ”- ဝႃႈၼႆ။

လိူဝ်ၼၼ်ႉ ၶၼ်ငိုၼ်းတေႃႊလႃႊၵေႃႈ မိူၼ်ၵၼ် မိူဝ်ႈၼႆႉ ဝၼ်းတီႈ 13 ငိုၼ်းတေႃႊလႃႊ 1 တေႃႊလႃႊ 7,000 ပျႃးယဝ်ႉ။ ၶၼ်ငိုၼ်းထႆးသမ်ႉ ယၢမ်းၵၢင်ၼႂ် ငိုၼ်းထႆး 620 ဝၢတ်ႇ လႆႈငိုၼ်းမၢၼ်ႈ 100,000 ပျႃး။ ငိုၼ်းမၢၼ်ႈ 100,000 ပျႃး လႆႈငိုၼ်းထႆး 500 ဝၢတ်ႇ၊ မၢင်တီႈ 510 ဝၢတ်ႇလႄႈ မၢင်တီႈ 480 ဝၢတ်ႇ – ဝႃႈၼႆ။