ဢိူင်ႇမိူင်းပဵင်း၊ လၢႆးသၢၵ်ႇ ၼႂ်းၸႄႈဝဵင်းႁူဝ်ပူင်းလႄႈ ဢိူင်ႇပႃႇတိုင်း (ဢၢင်ႇတေႃး) လႄႈ ၵျွၵ်ႉၵူႇ ၼႂ်းၸႄႈဝဵင်းလွၵ်ႉ ၸွၵ်ႇ –  4 ဢိူင်ႇ ဢၼ်မီးတီႈလႅၼ်ၶႅၼ်ႈ ၸႄႈဝဵင်းႁူဝ်ပူင်းလႄႈ လွၵ်ႉၸွၵ်ႇၼၼ်ႉ တင်ႈတႄႇ ႁၢင်လိူၼ်ၵျူႊလၢႆႊၼႆႉမႃး ၸုမ်းယိပ်းၵွင်ႈၵၢင်ႇ သင်ႇႁၢမ်ႈဢွၵ်ႇ ၼွၵ်ႈႁိူၼ်းယေး တင်ႈတႄႇႁူဝ်ၶမ်ႈ တေႃႇထိုင်ယၢမ်းၵၢင်ၼႂ် ႁဵတ်းႁႂ်ႈၵူၼ်းမိူင်း ယၢပ်ႇၽိုတ်ႇတႃႇႁႃၵိၼ် လဵင်ႉတွင်ႉ – ၵူၼ်းလွၵ်ႉၸွၵ်ႇ ၵေႃႉၼိုင်ႈ လၢတ်ႈၼင်ႇၼႆ။

“ႁၢမ်ႈဢွၵ်ႇၼွၵ်ႈႁိူၼ်းၼႆႉ တင်ႈတႄႇ ဝၢႆးဝၼ်း 4 မူင်းထိုင်ၵၢင်ၼႂ် 8 မူင်းၶႃႈဝႃႇ။ ႁဝ်းၶႃႈ ပဵၼ်ဢၼ်ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉတႄႉတႄႉၶႃႈဢေႃႈ။ မၢင်ဝၼ်း 4 မူင်းတဵမ်တဵမ် ႁဝ်းၶႃႈ တိုၵ်ႉမီးၼႂ်းသူၼ် ပႆႇလႆႈပွၵ်ႈၶိုၼ်းႁိူၼ်း။ ၶဝ်ယိုဝ်းၵွင်ႈပူင်ႉပၢင်ႉ ပၼ်ၾၢင်ႉႁႂ်ႈမိူဝ်းႁိူၼ်းဢေႃႈ။ ၵၢင်ၼႂ်ၵေႃႈ 8 မူင်း ၸင်ႇႁႂ်ႈ ဢွၵ်ႇႁိူၼ်းဝႃႇ မၼ်းယၢပ်ႇၽိုတ်ႇတႄႉ ဢေႃႈ” – ဝႃႈၼႆ။

ၵူၼ်းဝၢၼ်ႈလၢတ်ႈဝႃႈ ဢၼ်မႃးသင်ႇႁႂ်ႈၵူၼ်းလူင် ဝၢၼ်ႈသေႃႇ ၼႂ်းဝၢၼ်ႈဝႃႈ ႁၢမ်ႈဢွၵ်ႇႁိူၼ်းယေးႁူဝ်ၶမ်ႈ 4 မူင်းထိုင်ၵၢင်ၼႂ် 8 မူင်းၼႆႉ ပဵၼ်ၸုမ်း SSPP ၼႆသေတႃႉ ယူႇတီႈ ၽူႈတွႆႇႁွၵ်ႈ တိတ်းတေႃႇ SSPP ဢမ်ႇလႆႈလႄႈ ဢမ်ႇၸၢင်ႈယိုၼ်ယၼ်။

ၼႂ်းထုင်ႉၼၼ်ႉ သိုၵ်းမၢၼ်ႈပလိၵ်ႈမၢၼ်ႈလႄႈ သိုၵ်း RCSS ၵေႃႈတူင်ႉၼိုင်ၵႂႃႇမႃးယူႇၼႆ ၵူၼ်းပိုၼ်ႉတီႈ လၢတ်ႈၼင်ႇ ၼႆ။

ၵူၼ်းဝၢၼ်ႈလၢတ်ႈဝႃႈ-“ၼႂ်းဝူင်ႈဝၢင်ႈၼႆႉ သဵင်ၵွင်ႈၵေႃႈၵႆႉတႅၵ်ႇၶိူဝ်းယႂ်း။ မၢင်ဝၢၼ်ႈၼႆႉ ၶဝ်ႈတီႉၵူၼ်းၸၢႆး ၼႂ်းဝၢၼ်ႈ ၵႂႃႇႁၢပ်ႇၶျေႃး။ လႆႈၵူဝ်ပၢင်တိုၵ်း လႆႈၵူဝ်ယဵပ်ႇၺႃးမၢၵ်ႇၾင်လိၼ်။ ႁဝ်းၶႃႈ ဢမ်ႇမီးလွင်ႈႁူမ်ႇ လူမ်ႈသေဢိတ်း”- ဝႃႈ ၼႆ။

ဢၼ်ၵႆႉပဵၼ်ပၢင်တိုၵ်းသိုၵ်းသိူဝ်ၼႆႉ ပဵၼ်တၢင်းဝၢၼ်ႈၸၢမ်ဢေႃႈ၊ ၵျီႇတေႃႇ၊ ၽႃလၢႆး၊ ဢၢင်ႇတေႃး (ပႃႇတိုင်း)၊ ၵျွၵ်ႉၵူႇ ဢုင်ၵႂၢႆး ၸိူဝ်းၼႆႉ ၵူၼ်းဝၢၼ်ႈလၢတ်ႈၼင်ႇၼႆ။