ၽွင်းပၢင်တိုၵ်းသိုၵ်းသိူဝ်ႁၢႆႉႁႅင်း ငဝ်းလၢႆးၵၢၼ်မိူင်းဢမ်ႇလီ ၵူၼ်းမိူင်းလႆႈပၢႆႈလႆႈၼီယူႇၼႆႉ ၵူၼ်းၼုမ်ႇ မိူင်းယႆ 2 ၵေႃႉ ႁၢႆၵႂႃႇလႆႈၽၢၵ်ႇလိူၼ်ယဝ်ႉ ပေႃႈမႄႈၵူၼ်းႁိူၼ်းဢမ်ႇလႆႈတၢင်းၵပ်းသိုပ်ႇ ႁႃၵေႃႈဢမ်ႇႁၼ် ပဵၼ်ဢၼ်မႆႈၸႂ်။
2 ၵေႃႉ ဢၼ်ႁၢႆၵႂႃႇၼႆႉ ပဵၼ်ၸၢႆးဢွၼ်ႇလႅင်း ဢႃယု 18 ပီ လုၵ်ႈၸၢႆး လုင်းမျု့မွင်ႇလႄႈ မႄႈပႃႈၼၢင်းပီး ယူႇပွၵ်ႉ 1 မိူင်းယႆလႄႈ ၸၢႆးဢၢႆႈငေႃး ဢႃယု 19 ပီ ပဵၼ်လုၵ်ႈၸၢႆး လုင်းပွၼ်လႄႈ ပႃႈတႅမ်ႇ ယူႇပွၵ်ႉ 2 ဝဵင်းမိူင်းယႆ ၸိုင်ႈတႆးပွတ်းႁွင်ႇ။
မိူဝ်ႈဝၼ်းတီႈ 27/07/2024 ၼႃႈတေပဵၼ်ပၢင်တိုၵ်း တီႈဢိူင်ႇႁူဝ်ယၼၼ်ႉ ၸၢႆးဢွၼ်ႇလႅင်းလႄႈ ဢၢႆႈငေႃး ဢၼ်ႁဵတ်းၵၢၼ် ပႂ်ႉသူၼ်ဢွႆႈပိူၼ်ႈသေ ဝၼ်းၼၼ်ႉ ၸင်ႇၸူးၵၼ် ဢွၵ်ႇႁိူၼ်းၵႂႃႇၸွမ်းၵၼ်။ တႄႇဢဝ်ၼၼ်ႉမႃး တီႈႁိူၼ်း ၵေႃႈ ဢမ်ႇမိူဝ်းထိုင်၊ ၵပ်းသိုပ်ႇတိတ်းတေႃႇၵေႃႈ ဢမ်ႇလႆႈ ၵူၼ်းႁိူၼ်း ပဵၼ်ဢၼ်မႆႈ ၸႂ်ဝႆႉ ဝႃႈၼႆ။
ၵူၼ်းၸမ်ၸႂ်ပေႃႈမႄႈ ၸၢႆးဢွၼ်ႇလႅင်း လၢတ်ႈတီႈၽူႈတွႆႇႁွၵ်ႈဝႃႈ -“တေႃႇထိုင်မိူဝ်ႈလဵဝ် ဢမ်ႇႁၼ် တင်းသွင်ၵေႃႉၼႆႉ တၢႆႁိုဝ်လိပ်းႁိုဝ်ၵေႃႈ ဢမ်ႇႁူႉ။ ဢမ်ႇၼၼ် ၺႃးသိုၵ်းမၢၼ်ႈ – သိုၵ်းၸၢဝ်းၶိူဝ်း ၺွပ်းၵႂႃႇႁဵတ်း သိုၵ်းယဝ်ႉႁိုဝ်ၵေႃႈ ဢမ်ႇ ႁူႉ။ ပေႃႈမႄႈပီႈၼွင်ႉ ပဵၼ်ဢၼ်မႆႈၸႂ်ၼႃႇ”- ဝႃႈၼႆ။
ၵဵဝ်ၵပ်းလွင်ႈၼႆႉ ယူႇတီႈ ပေႃႈမႄႈၸၢႆးဢွၼ်ႇလႅင်းၶဝ် ၸွမ်းႁႃၵေႃႈဢမ်ႇႁၼ်။ တၢင်ႇၶႅပ်းႁၢင်ႈတီႈ Facebook သေ ပိုၼ်ၽၢဝ်ႇၵေႃႈ ဢမ်ႇပႆႇလႆႈငိၼ်းၶၢဝ်ႇငိၼ်းငၢဝ်းသင် ပဵၼ်လွင်ႈမႆႈၸႂ် ၸွမ်းလုၵ်ႈၸၢႆးၼႃႇ ဝႃႈၼႆ။
လွင်ႈၼႆႉ ယူႇတီႈ ၽူႈတွႆႇႁွၵ်ႈတိတ်းတေႃႇၸူး ပေႃႈမႄႈၸၢႆးဢွၼ်ႇလႅင်း ယူႇၵေႃႈ ဢမ်ႇမီးလႅင်းၾူၼ်းသၢႆ ဢိၼ်ႊထိူဝ်ႊၼႅတ်ႉလႄႈ တိတ်းတေႃႇဢမ်ႇလႆႈ။
ၵူၼ်းၸမ်ၸႂ်ပေႃႈမႄႈ ၸၢႆးဢွၼ်ႇလႅင်း လၢတ်ႈတီႈၽူႈတွႆႇႁွၵ်ႈဝႃႈ -“ပေႃႈမႄႈၶဝ်တႄႉ ပေႃးဢမ်ႇလိုဝ်ႈ ဢမ်ႇသဝ်း ဢမ်ႇၵိၼ်ဢမ်ႇၼွၼ်းလႆႈ ၸွမ်းႁႃလုၵ်ႈၸၢႆးၶဝ် မႆႈၸႂ်ႁႅင်းၼႃႇ ၶႂ်ႈႁူႉဝႃႈ မီးယူႇတီႈလႂ်ၼၼ်ႉၶႃႈဢေႃႈ”- ဝႃႈၼႆ။
ႁူဝ်လိူၼ်ၵျူႊလၢႆႊ ပူၼ်ႉမႃးၼၼ်ႉ သိုၵ်းၵဝ်ႈၵၢင်ႉ လုၵ်ႉတၢင်းလႃႈသဵဝ်ႈ ထႅမ်ႁႅင်းသိုၵ်း တၢင်းမိူင်းယႆၼႆႉ တင်းၼမ်သေ လႆႈပဵၼ်ပၢင်တိုၵ်းၵၼ် တင်းသိုၵ်းမၢၼ်ႈ ႁၢဝ်ႈႁႅင်း။ တီႈလႃႈသဵဝ်ႈၵေႃႈ ပိုတ်းယိုဝ်းၵၼ် ၼႂ်းဝဵင်း ထိုင်တီႈၵူၼ်းမိူင်းဢမ်ႇၸၢင်ႈယူႇၸၢင်ႈသဝ်း လႆႈဢွၼ်ၵၼ်ဢွၵ်ႇပၢႆႈ။
ဝၼ်းတီႈ 09/07/2024 ၼၼ်ႉၵေႃႈ ၸၢႆးပၢၼ်းၸိင်ႇ ဢႃယု 22 ပီ ၵူၼ်းလႃႈသဵဝ်ႈပၢႆႈၽေးသိုၵ်း မႃးၺႃး MNDAA တီႉ ၺွပ်း တီႈဝၢၼ်ႈၶႃး သျီး ဢၼ်ယၢၼ်ၵႆၵၼ်တင်း ဝဵင်းလႃႈသဵဝ်ႈ မွၵ်ႈ 10 လၵ်း။ ပေႃႈမႄႈၸွမ်းၵႂႃႇယွၼ်း တီႈလုမ်းသိုၵ်းၵဝ်ႈ ၵၢင်ႉၵေႃႈ ဢမ်ႇၺႃး။ သိုၵ်းၵဝ်ႈၵၢင်ႉလၢတ်ႈဝႃႈ သူင်ႇတူဝ်ၵႂႃႇၾိုၵ်းၵၢၼ်သိုၵ်းယဝ်ႉ ဝႃႈၼႆလႄႈ ပဵၼ်ဢၼ် မႆႈ ၸႂ် ဢမ်ႇၸၢင်ႈႁဵတ်းႁိုဝ်။
ၾၢႆႇၼိုင်ႈ သိုၵ်းမၢၼ်ႈၵေႃႈ ပိုၼ်ၽၢဝ်ႇပၵ်းပိူင်မၢႆမီႈၵူၼ်းမိူင်းႁၢပ်ႇၵၢၼ်သိုၵ်းၼႆသေ တင်ႈတႄႇ လိူၼ်ဢေႊပရိူဝ်ႊမႃး ၾိုၵ်းၵၢၼ်သိုၵ်းပၼ်ၵူၼ်းၼုမ်ႇ 3 ၸုပ်ႈယဝ်ႉ။ ၼႂ်းလိူၼ်ဢေႃႊၵတ်ႊသ်ၼႆႉ တေၾိုၵ်းၵၢၼ်သိုၵ်း ၸုပ်ႈထီႉ 4 ။
ၵူၼ်းမိူင်း ဢမ်ႇၶႂ်ႈၶဝ်ႈႁၢပ်ႇၵၢၼ်သိုၵ်း တီႈသိုၵ်းမၢၼ်ႈလႄႈဢွၼ်ၵၼ်ပၢႆႈ ဢွၵ်ႇၼွၵ်ႈမိူင်း။ သိုၵ်းမၢၼ်ႈ ပိုၼ်ၽၢဝ်ႇဝႃႈ ၾိုၵ်းၵၢၼ်သိုၵ်းပၼ်ၵူၼ်းၼုမ်ႇ 9,000 ပၢႆယဝ်ႉၼႆလႄႈ ၵူၼ်းပၵ်းတႃၵၢၼ်သိုၵ်းၵၢၼ်မိူင်း ၶဝ်လၢတ်ႈဝႃႈ လႅပ်ႈပဵၼ် ဢၼ်တဵၵ်းတီႉၺွပ်း ဢဝ်ၵႂႃႇၵမ်ႈၼမ် ဝႃႈၼႆ။
ၸႄႈဝဵင်းမိူင်းယႆၼႆႉ ပဵၼ်ပိုၼ်ႉတီႈ တပ်ႉသိုၵ်းတႆး SSPP ၵုမ်းၵမ် တူင်ႉၼိုင်။ မိူဝ်ႈဝၼ်းတီႈ 13 လိူၼ်ၵျူႊလၢႆႊၼၼ်ႉ သိုၵ်း SSPP ၼပ်ႉႁူဝ်ႁဵင် ပူၵ်းတုင်း SSPP သေ ၶီႇရူတ်ႉၵႃးပဵၼ်ထႅဝ် လတ်းၵၢင်ဝဵင်း ၼႄဢဵၼ်ႁႅင်းၵႂႃႇမႃး တႃႇဢဝ် ႁူမ်ႇလူမ်ႈဝဵင်းမိူင်းယႆ ။ ၵွပ်ႈၼႆလႄႈ ၶႂ်ႈတုၵ်းယွၼ်း ႁႂ်ႈၸွႆႈဢဝ်လွင်ႈႁူမ်ႇ လူမ်ႈပၼ်ပႃးၵူၼ်းမိူင်းၽွင်ႈ – ၵူၼ်းမိူင်းယႆ တုၵ်းယွၼ်း ၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
