ဝၼ်းတီႈ 08/08/2024 ၼႆႉ တဵင်ႉသျီႊၵျွၼ်ႊ ၽူႈတႅၼ်းၶိုၵ်ႉတွၼ်း ၵဵဝ်ႇလူၺ်ႈလွင်ႈဢေႊသျႃႊ ႁွင်ႈၵၢၼ် ၽွင်းလူင် ၾၢႆႇၼွၵ်ႈမိူင်း မိူင်းၶႄႇ ႁူပ်ႉထူပ်းၵၼ်တင်းၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ တီႈၼေႇပျီႇတေႃႇ။

ဝၢႆးလင် သိုၵ်းမၢၼ်ပိုၼ်ၽၢဝ်ႇဝႃႈ – တေၸွပ်ႇသွၵ်ႈၵူၼ်း/ ၸုမ်း ဢၼ်ၵမ်ႉထႅမ်ပၼ်ႁႅင်း ၸုမ်းသိုၵ်းၵဝ်ႈၵၢင်ႉလႄႈ ဢူၺ်းလီ ဢၼ်ပိုတ်းယိုဝ်း တိုၵ်းတေႃးသိုၵ်းမၢၼ်ႈသေ တေဢဝ်လိူင်ႈပၼ်တူတ်ႈတၢမ်ႇၵႂႃႇ ႁၢဝ်ႈႁႅင်း ၼႆယဝ်ႉၼၼ်ႉ တဵင်ႉသျီႊၵျွၼ်ႊၵေႃႈ မႃးထိုင်ၼေႇပျီႇတေႃႇသေ ႁူပ်ႉထူပ်းသိုၵ်းမၢၼ်ႈ ၼႆယဝ်ႉ။

ၾၢႆႇၼိုင်ႈ ပူၼ်ႉမႃးလၢႆဝၼ်းၼႆႉ ၸုမ်းဢူၺ်းလီပွတ်းႁွင်ႇၵေႃႈ ၸင်ႇႁႃတုၵ်းယွၼ်း ၵႂႃႇတၢင်းမိူင်းၶႄႇဝႃႈ – ႁႂ်ႈၸွႆႈပၼ်ႁႅင်းဢီးၸူးသိုၵ်းမၢၼ်ႈ ႁႂ်ႈၵိုတ်း ယိုတ်းလွင်ႈၸႂ်ႉၶိူင်ႈမိၼ် မႃးယိုဝ်းသႂ်ႇၼႂ်းဝၢၼ်ႈၼႂ်းဝဵင်း တီႈ ယူႇၵူၼ်းမိူင်း ၸိူဝ်းၼႆႉ။

ထႅင်ႈၾၢႆႇၼိုင်ႈၵေႃႈ ဢၼ်မိူင်းၶႄႇ ယူႇၵၢင်ပဵၼ်ၽွင်းၶဵဝ်သေ ၸွႆႈပၼ်ႁႂ်ႈသိုၵ်းမၢၼ်ႈလႄႈ ၸုမ်းဢူၺ်းလီ ပွတ်းႁွင်ႇ လႆႈဢုပ်ႇဢူဝ်း လွင်ႈၵိုတ်းတိုၵ်းလွင်ႈငမ်းယဵၼ်ၵၼ် တီႈဝဵင်းႁၢႆႊၵိူင်ႊ မိူင်ႊယုၼ်ႊၼၼ်ႊ မိူင်းၶႄႇ ပူၼ်ႉမႃး လိူၼ်ပၢႆၼႆႉၵေႃႈ ၾၢႆႇတၢင်းသိုၵ်းမၢၼ်ႈ ဢမ်ႇသူင်ႇတူဝ်တႅၼ်း ၵႂႃႇၶဝ်ႈႁူမ်ႈလႄႈ ပၢင်ဢုပ်ႇၵုမ် လိုၼ်းသုတ်းၼႆႉ လႆႈလူႉပႅတ်ႈ – ဢမ်ႇပဵၼ်ပၢင်။ 

ဢိင်ၼိူဝ် လွင်ႈတၢင်းၸိူဝ်းၼႆႉသေ တဵင်ႉသျီႊၵျွၼ်ႊ ႁွတ်ႈမႃးထိုင်တီႈၼေႇပျီႇတေႃႇၵေႃႈ ပဵၼ်လႆႈ ၵူၼ်း ပၵ်းတႃၵၢၼ်မိူင်းၶဝ် ထတ်းသၢင်ၼင်ႇၼႆ။

ၼႂ်းၶၢဝ်းတၢင်းသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ မၼ်းၸၢႆးမႃးႁူပ်ႉ သိုၵ်းမၢၼ်ႈ ပဵၼ်ၵမ်းထူၼ်ႈ 6 ။ လွင်ႈ ၼႆႉ ဢုပ်ႇသင်ၵၼ်ၵႂႃႇလၢႆလၢႆၼႆၼၼ်ႉ ၾၢႆႇတၢင်းမိူင်းၶႄႇ ဢမ်ႇပိုၼ်ၽၢဝ်ႇ။

တီႈပၢင်ႁူပ်ႉထူပ်း ဢုပ်ႇၵုမ်ၵၼ်ၼၼ်ႉ ၾၢႆႇတၢင်းသိုၵ်းမၢၼ်ႈတႄႉ မီးၵႅမ်ၽူႈၼမ်းၼႂ်း ၶွင်ႇသီႇသိုၵ်းမၢၼ်ႈ ၸွမ်သိုၵ်း ယႄးဝိၼ်းဢူး၊ ၵႅမ်ၸွမ်ၽွင်းလူင်လႄႈ ၽွင်းလူင်ၾၢႆႇၼွၵ်ႈမိူင်း ဢူးတၢၼ်းသူၺ်ႇ ၶဝ်ၵေႃႈ ၶဝ်ႈႁူမ်ႈဢုပ်ႇၵုမ်။

ၾၢႆႇတၢင်း သိုၵ်းမၢၼ်ႈပိုၼ်ၽၢဝ်ႇဝႃႈ သွင်ၾၢႆႇဢုပ်ႇၵၼ် လွင်ႈမၼ်ႈၼိမ်တဵင်ႈ ၸွမ်းလႅၼ်လိၼ်၊ လွင်ႈၵၢၼ်ၵပ်းသိုပ်ႇတိတ်းတေႃႇ ၶႄႇ – မၢၼ်ႈ သွင်ၸိုင်ႈမိူင်း ႁႂ်ႈမၼ်ႈၵိုမ်းယိုၼ်းယၢဝ်း လွင်ႈၽဵဝ်ႈမူၺ်ႉၸုမ်း ၵျႃးၽႅၼ်ႉ လွင်ႈပၢင်လိူၵ်ႈတင်ႈ ၸိူဝ်းၼႆႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။