ၼႂ်းဝၼ်းတီႈ 08/08/2024  ယၢမ်းဝၢႆးဝၼ်း 2 မူင်း မၢၵ်ႇလူင်သိုၵ်းမၢၼ်ႈ တူၵ်းသႂ်ႇၼႂ်းဝၢၼ်ႈထီႊရီႊ ဢၼ်မီး ၼႂ်းၸႄႈ ဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၼႆႉ ႁဵတ်းႁႂ်ႈႁိူၼ်းၵူၼ်းမိူင်း လူႉၵွႆ ဢမ်ႇယွမ်း 4 လင် ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်း ၸိူဝ်းလႆႈပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ယိုဝ်းၵၢၼ်တင်းဝၼ်း တင်း ၶိုၼ်းၼႆႉ မီးမႃး 3 ဝၼ်းယဝ်ႉၶႃႈ။ မၢၵ်ႇလူင် တေတူၵ်းမႃးမိူဝ်ႈလႂ်တီႈလႂ်ၵေႃႈ ဢမ်ႇလၢမ်းႁူႉလႆႈ ဢၼ်တူၵ်း ၼႂ်းဝၢၼ်ႈ မိူဝ်ႈဝၼ်းတီႈ 7 ၼၼ်ႉ ႁိူၼ်းၵွႆ 4 လင်ၶႃႈဢေႃႈ။ လွင်ႈမၢတ်ႇၸဵပ်းလူႉတၢႆတႄႉ ပႆႇလႆႈႁူႉၶႃႈ။ ၵူၼ်းဝၢၼ်ႈတႄႉ ဢွၼ် ၵၼ်ငိူင်ႉပၢႆႈတင်းၼမ် ယဝ်ႉဢေႃႈ” – ဝႃႈၼႆ။

ၵဵဝ်ႇလူၺ်ႈ လွင်ႈမၢၵ်ႇတူၵ်းသႂ်ႇႁိူၼ်းၵူၼ်းမိူင်းၼႆႉသေ တီႈသိုဝ်ႇၶၢဝ်ႇ ၶမ်းသႃးငၢဝ်ႉတႄႉဢွၵ်ႇဝႆႉဝႃႈ – ပဵၼ်မၢၵ်ႇသိုၵ်း မၢၼ်ႈ လုၵ်ႉတီႈတပ်ႉ ၶမယ 423 ဢၼ်ပၵ်းဝႆႉၼႂ်းဝၢၼ်ႈလွႆပွတ်းၼၼ်ႉ ယိုဝ်းၵွင်ႈလူင်သေ မႃးတူၵ်းသႂ်ႇႁိူၼ်းၵူၼ်းမိူင်း လူႉၵွႆၵႂႃႇ – ဝႃႈၼႆ။

ပၢင်တိုၵ်း သိုၵ်းမၢၼ်ႈႁူမ်ႈ ၸုမ်းပျီႇတူႉၸိတ်ႉပဢူဝ်း PNO သေ ယိုဝ်းသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ၼႆႉ တႄႇပဵၼ်မႃးၶိုၼ်း ႁၢဝ်ႈႁႅင်း မိူဝ်ႈဝၼ်းတီႈ 06/08/2024 ၸွမ်းဝၢၼ်ႈၾၢႆႇဢွၵ်ႇ ဝဵင်းသီႇသႅင်ႇ။ ႁဵတ်းႁႂ်ႈၵူၼ်းဝၢၼ်ႈ လႆႈ ငိူင်ႉပၢႆႈၽေးသိုၵ်း ၶဝ်ႈသွၼ်ႈဝႆႉၼႂ်းထိူၼ်ႇတင်းၼမ် မၢင်ၸိူဝ်း ပၢႆႈၵႂႃႇတၢင်းဝဵင်းတူၼ်ႈတီး ဝႃႈၼႆ။

ပၢင်တိုၵ်း ၼႂ်းၸႄႈဝဵင်းသီႇသႅင်ႇၼႆႉ သိုၵ်းတင်းသွင်ၾၢႆႇ ၸႂ်ႉၶိူင်ႈၵွင်ႈလူင် ၵူၺ်းဢမ်ႇပႃး ၾၢႆႇသိုၵ်းမၢၼ် ၵႆႉဢဝ်ၶိူင်ႈ မိၼ်တိုၵ်း မႃးပွႆႇမၢၵ်ႇပႃးထႅင်ႈ။

“မိူဝ်ႈဝၼ်းတီႈ 7 ယၢမ်းႁူဝ်ၶမ်ႈ 10 မူင်းပၢႆၼႆႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇၵႂႃႇ 2 လုၵ်ႈ တီႈဝၢၼ်ႈမီႊရႄႊ။ လွင်ႈမၢတ်ႇၸဵပ်း လူႉတၢႆတႄႉ ပႆႇလႆႈႁူႉ။ ႁဝ်းၶႃႈတႄႉ ဢမ်ႇၶႂ်ႈႁႂ်ႈမီးပၢင်တိုၵ်း သဵင်ၵွင်ႈသဵင်မၢၵ်ႇ သဵင်ၶိူင်ႈမိၼ်ၵေႃႈ ဢမ်ႇၶႂ်ႈငိၼ်း သေဢိတ်းၶႃႈ”- ၵူၼ်းမိူင်းပိုၼ်ႉတီႈ သိုပ်ႇလၢတ်ႈၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 6 ၼၼ်ႉၵေႃႈ မၢၵ်ႇလူင်သိုၵ်းမၢၼ်ႈ တူၵ်းသႂ်ႇၼႂ်းဝၢၼ်ႈထီႊရီႊ၊ ဝၢၼ်ႈမီႊရႄႊသေ ႁဵတ်းႁႂ်ႈ ၵူၼ်းဝၢၼ်ႈ တိူဝ်ႉၺႃးၸၢၵ်ႇမၢၵ်ႇ မၢတ်ႇၸဵပ်း ဢမ်ႇယွမ်း 3 ၵေႃႉယဝ်ႉ။ လိူဝ်ၼၼ်ႉ ၵူၼ်းဝၢၼ်ႈ ၸိူဝ်းဢၼ်ပၢႆႈၶဝ်ႈ ၼႂ်းထိူၼ်ႇၵေႃႈ ယၢမ်းလဵဝ် ယၢပ်ႇၽိုတ်ႇ ၽႃႈယၢင်၊ ၶူဝ်းၼုင်ႈတၢင်းဝႂ် ၶွင်ၵိၼ်ယႅမ်ႉ ၸိူဝ်းၼႆႉ။