ၸုမ်းဢူၺ်းလီပွတ်းႁွင်ႇ သၢမ်ၸုမ်း လၢတ်ႈဝႃႈ သင်ၸိူဝ်ႉဢမ်ႇၶႂ်ႈႁႂ်ႈပဵၼ်ပၢင်တိုၵ်း တီႈဝဵင်းမူႇၸေႊၼႆ ႁႂ်ႈၽူႈၵွၼ်းတိူင်းသိုၵ်း ယမၶ ဝၢင်းၶိူင်ႈဝႆးဝႆး ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈ မိူဝ်ႈၼႆႉ ဝၼ်းတီႈ 09/08/2024 ဝႃႈ ဢၼ်ၸုမ်းဢူၺ်းလီ ပွတ်းႁွင်ႇ သၢမ်ၸုမ်း ယိုၼ်းမိုဝ်းလၢတ်ႈတီႈၽူႈၵွၼ်းတိူင်းယမၶၼႆႉ ပဵၼ်မိူဝ်ႈပူၼ်ႉမႃး 2-3 ဝၼ်းၼႆႉ ဝႃႈၼႆ။

ၵဵဝ်ႇလူၺ်ႈလွင်ႈ ၸုမ်းဢူၺ်းလီသၢမ်ၸုမ်း ယိုၼ်ႈမိုဝ်း ၽူႈၵွၼ်းယမၶ မူႇၸေႊၼၼ်ႉ ၽူႈၸမ်ၸႂ်ၾၢႆႇသိုၵ်း လၢတ်ႈဝႃႈ -“ၽူႈၵွၼ်းတိူင်းတႄႉ ပႆႇပွင်ႇၶၢဝ်ႇမႃးၶိုၼ်း။ တေလႆႈၶေႃႈတွပ်ႇၶိုၼ်း ၼႂ်းဝူင်ႈဝၢင်ႈၼႆႉ ယူႇယူဝ်ႉ”- ဝႃႈၼႆ။

ၵွၼ်ႇၼႃႈ သိုၵ်းၵဝ်ႈၵၢင်ႉ တေၶဝ်ႈယိုဝ်းတိူင်းသိုၵ်း ယမၶ ဝဵင်းလႃႈသဵဝ်ႈၼၼ်ႉ ယူႇတီႈ ငဝ်ႈငုၼ်းတိူင်းသိုၵ်း – သိုၵ်းမၢၼ်ႈသေ လႆႈသင်ႇပူတ်းၽူႈၵွၼ်းတိူင်း ယမၶ ၵေႃႉၵဝ်ႇ ၸွမ်ႁၢၼ် ၸူဝ်းတိၼ်ႉယဝ်ႉ ၶိုၼ်းယုၵ်ႉဢဝ် ၽူႈၵွၼ်းတပ်ႉမ 99 ၵႅမ်ၸွမ်ႁၢၼ်ၸူဝ်းလၢႆႇ (DSA – 42 ) ဢၼ်မီးတီႈဝဵင်းမူႇၸေႊ ၶိုၼ်ႈပဵၼ် ၽူႈၵွၼ်းတိူင်း ယမၶ လႃႈသဵဝ်ႈဝႆႉ။

ၵူၺ်းၵႃႈ ၵႅမ်ၸွမ်ႁၢၼ် ၸူဝ်းလၢႆႇသမ်ႉ ဢမ်ႇယွမ်းမိူဝ်းယူႇ ၼႂ်းတိူင်းသိုၵ်းလႃႈသဵဝ်ႈသေ မူၵ်းယူႇဝႆႉတီႈမူႇၸေႊ ၵူၺ်းလႄႈ ၸုမ်းဢူၺ်းလီ သၢမ်ၸုမ်း ဢဝ်ၸိုဝ်ႈဝဵင်းမူႇၸေႊ ၵမ်ၵိၼ်း ႁႂ်ႈဝၢင်းၶိူင်ႈ။

ၵူၼ်းပိုၼ်ႉတီႈ ဝဵင်းမူႇၸေႊလၢတ်ႈဝႃႈ ဝၢႆးလင် ၸုမ်းဢူၺ်းလီ လွၵ်ႇငိုတ်ႈၸႂ်ႉဝၢင်းၶိူင်ႈယဝ်ႉ – မိူဝ်ႈဝႃး ယၢမ်းၵၢင်ၶမ်ႈ 8 မူင်းၼၼ်ႉ ငိၼ်းသဵင်ၵွင်ႈသဵင်မၢၵ်ႇ တၢင်းဝၢၼ်ႈၼမ်ႉဢုမ် ၸႄႈဝဵင်းမူႇၸေႊ ၵူၼ်းမိူင်း ၵူဝ်ထူပ်းၽေးသိုၵ်းၵူၺ်းယဝ်ႉ – ဝႃႈၼႆ။

ၵူၼ်းပိုၼ်ႉတီႈ လတ်ႈဝႃႈ – “မိူဝ်ႈဝႃးတႄႉ ပဵၼ်သိုၵ်းမၢၼ်ႈယိုဝ်းဢေႃႈ ။ ယွၼ်ႉသင်လႄႈ ယိုဝ်းတႄႉ ဢမ်ႇ ႁူႉ။ ၼႂ်းပိုၼ်ႉတီႈတႄႉ ဢမ်ႇမီးပၢင်တိုၵ်းသင်။ ႁဝ်းၶႃႈတႄႉ ၵူဝ်ပဵၼ်ပၢင်တိုၵ်းၵူၺ်းယဝ်ႉ။ ပေႃးပဵၼ်မႃး ဢမ်ႇမီးတီႈပၢႆႈၶႃႈလူးၼေႃ”- ဝႃႈၼႆ။

မိူဝ်ႈၽွင်း ၽႅၼ်ၵၢၼ်ယၼ်သိုၵ်း 1027 ပွၵ်ႈၵမ်း 1 ၼၼ်ႉ ၸုမ်းဢူၺ်းလီသၢမ်ၸုမ်းလႄႈ သိုၵ်းၶၢင် KIA ယိုတ်းလႆႈဝႆႉ ၼႂ်းပိုၼ်ႉတီႈ ႁိမ်းႁွမ်းဝဵင်းမူႇၸေႊ ၼၼ်ႉယဝ်ႉလႄႈ ၵမ်းၼႆႉ သင်ၸိူဝ်ႉၶႂ်ႈသိုပ်ႇယိုတ်း ဝဵင်းမူႇၸေႊၵေႃႈ ငၢႆႈငၢႆႈၵူၺ်းယဝ်ႉ ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ၶၢဝ်ၾိုၵ်းၵၢၼ်)