ဝၼ်းတီႈ 07/08/2024 ယၢမ်းဝၢႆးဝၼ်း လုမ်းတြႃးပိူင်ငဝ်ႈပိုင်းမိူင်း ၸိုင်ႈထႆး ပိုၼ်ၽၢဝ်ႇယႃႉပႃႇတီႇၵၢဝ်ႉၵႆ ဢၼ်ဢွင်ႇပေႉပၢင်လိူၵ်ႈတင်ႈ လႆႈတီႈၼင်ႈၼမ်သုတ်း ၼႂ်းသၽႃးဝႆႉ။

လိူဝ်ၼၼ်ႉ ပိုၼ်ၽၢဝ်ႇပႃးဝႃႈ ႁၢမ်ႈႁူဝ်ၼႃႈပႃႇတီႇ ၶုၼ်ႊၽိထႃးလႄႈ လုၵ်ႈၸုမ်းပွင်ၵၢၼ်ပႃႇတီႇ တင်းမူတ်း ႁႂ်ႈၵိုတ်းလိုဝ်ႈ လွင်ႈႁဵတ်းသၢင်ႈၵၢၼ်မိူင်း ၶၢဝ်းတၢင်း 10 ပီ ဝႃႈၼႆဝႆႉ။

လွင်ႈတၢင်း ဢၼ်ထုၵ်ႇယုၵ်ႉလိူၵ်ႈပႃႇတီႇၼႆႉသမ်ႉ လုမ်းတြႃးၼႄးဝႃႈ ပႃႇတီႇၵၢဝ်ႉၵႆၼႆႉ ႁဵတ်းၽိတ်းပၵ်းပိူင် ၸိုင်ႈမိူင်း၊ လွင်ႈၶႂ်ႈမူၼ်ႉမႄးပၵ်းပိူင် ၸိုင်ႈမိူင်း၊ လွင်ႈတိူဝ်ႉပၵ်းပိူင် ဢၼ်ၵႅတ်ႇၶႄႁႄႉၵင်ႈ ပၼ်ႁေႃၶမ်းထႆး ဢၼ်ပဵၼ်သုင်သုတ်းၼႂ်းမိူင်းထႆး ၸိူဝ်းၼႆႉ။

ပႃႇတီႇၵၢဝ်ႉၵႆၼႆႉ ၸဵမ်မိူဝ်ႈလူင်းပိုၼ်ႉတီႈ ႁူၺ်းသူၼ်းၵူၼ်းမိူင်း ၽွင်းပၢင်လိူၵ်ႈတင်ႈ ၼၼ်ႉၵေႃႈ လၢတ်ႈတီႈၵူၼ်းမိူင်းဝႃႈ ၶႂ်ႈမူၼ်ႉမႄးပၵ်းပိူင် 112 ဢၼ်ၵဵဝ်ႇၵပ်းလွင်ႈႁေႃၶမ်း ဝႃႈၼႆသေဢမ်ႇၵႃး ၽွင်းဢွင်ႇပေႉပၢင်လိူၵ်ႈတင်ႈ ၽူႈတႅၼ်းသၽႃး 44 ၵေႃႉ ဢွၼ်ၵၼ်လူင်းလၢႆးမိုဝ်း တႃႇၵႄႈလိတ်ႈမၢႆမီႈပၵ်းပိူင်။ လွင်ႈၼႆႉ လုမ်းတြႃးပၵ်းပိူင်ၸိုင်ႈမိူင်း ၼႄးဝႃႈ – ၸိူဝ်းၶဝ်မီးၸႂ်ၶႂ်ႈယႃႉ ပိူင်ႁေႃၶမ်းထႆး ႁႂ်ႈၵူၼ်ႇပင်း၊ ၶႂ်ႈယႃႉပိူင်ပိုင်းၸိုင်ႈမိူင်းႁႂ်ႈပိူင်ႈႁွႆႈ၊ မီးယိူင်းဢၢၼ်း တႃႇ ႁဵတ်းႁႂ်ႈၵူၼ်းမိူင်းလုၵ်ႉႁိုၼ်ႇ ဢူၼ်ယုင်ႈ ၼႂ်းၸိုင်ႈမိူင်း ၸဵမ်ၸိူဝ်းၼႆႉသေ ၸင်ႇဝႃႈဢဝ်လိူင်ႈၸွႆးတြႃး ပႃႇတီႇၵၢဝ်ႉၵႆမႃးဢမ်ႇထၢတ်ႇဢမ်ႇဝၢႆး။

ၾၢႆႇတၢင်းပႃႇတီႇတႄႉ ၶိုၼ်းယိုၼ်ႈလိၵ်ႈၵႄႈတူဝ်တီႈလုမ်းတြႃးဝႃႈ – ဢၼ်ဝႃႈၶႂ်ႈမူၼ်ႉမႄးပၵ်းပိူင် 112 ၵဵဝ်ႇၵပ်းႁေႃၶမ်းၼၼ်ႉၵေႃႈ ယိူင်းဢၢၼ်း ႁႂ်ႈႁေႃၶမ်းလႄႈ ၵူၼ်းမိူင်း ၼပ်ႉယမ်ၸမ်ၸႂ်ၵၼ်မႃးထႅင်ႈ ၵူၺ်းဝႃႈၼႆသေတႃႉ ၺႃးလုမ်းတြႃး ပၢၵ်ႈပႅတ်ႈ။

ဝၼ်းတီႈ 07/08/2024 ၼႆႉ ဝၢႆးလင် ထွမ်ႇငိၼ်းၶေႃးတတ်းသိၼ် တီႈလုမ်းတြႃးသေဢွၵ်ႇမႃးၼၼ်ႉတႄႉ ပႃးၸဵမ်တူဝ် ႁူဝ်ၼႃႈ ၶုၼ်ႊၽိထႃးၵေႃႈ ယုမ်ႉယၢႆႈတူင်ႉတၵ်ႉၵူၼ်းမိူင်း ၸိူဝ်းဢွၼ်ၵၼ်မႃး တူင်ႉတၵ်ႉပၼ်ႁႅင်းၸွမ်း ၼႃႈလုမ်းတြႃးၼၼ်ႉ။

ပႃႇတီႇၵၢဝ်ႉၵႆၼႆႉ ပဵၼ်ၵူၼ်းၼုမ်ႇလုၵ်ႈၸုမ်း ပႃႇတီႇ ဢၼႃႇၶူတ်းမႂ်ႇ ဢၼ်ၶုၼ်ႊထၼႃးထွၼ်း ဢွၼ်ႁူဝ်ၼၼ်ႉ ၶိုၼ်းမႃးၶွတ်ႇၽွတ်ႈဝႆႉ။ ပႃႇတီႇဢၼႃႇၶူတ်းမႂ်ႇၵေႃႈ ၺႃးၶွမ်ႊမသျိၼ်ႊၵၢၼ်လိူၵ်ႈတင်ႈလႄႈ လုမ်းတြႃးပၵ်းပိူင်ၸိုင်မိူင်း ၼႄးဝႃႈ ပဵၼ်ပႃႇတီႇဢၼ်ၶႂ်ႈယႃႉပၵ်းပိူင်ႁေႃၶမ်းထႆးၼႆသေ ထုၵ်ႇသင်ႇယႃႉပႃႇတီႇ ပၼ်တူတ်ႈတၢမ်ႇၽူႈၼမ်းပႃႇတီႇ ၸုမ်းၵူၼ်းၼုမ်ႇ ၸိူဝ်းၼၼ်ႉ ႁၢမ်ႈၶဝ်ႈယုင်ႈၼႂ်းၵၢၼ်မိူင်း မိူင်းထႆး ၼႂ်းၶၢဝ်းတၢင်း 10 ပီ 20 ပီ ၸိူဝ်းၼႆႉၼင်ႇၵဝ်ႇ – သိုဝ်ႇၶၢဝ်ႇ 3 Plus News ဢွၵ်ႇဝႆႉၼင်ႇၼႆ။