တပ်ႉသိုၵ်းဝႃႉ UWSA ထႅမ်ႁႅင်းသိုၵ်း ၶဝ်ႈဝဵင်းလႃႈသဵဝ်ႈထႅင်ႈ ရူတ်ႉၵႃး ဢမ်ႇယွမ်း 10 ဝႃႈၼႆ။
ဝၼ်းတီႈ 07/08/2024 ပူၼ်ႉမႃးၼႆႉ ထႅဝ်ရူတ်ႉၵႃး တပ်ႉသိုၵ်းဝႃႉ UWSA ဢမ်ႇယွမ်း 10 လမ်း ပူၵ်းတုင်းတပ်ႉသိုၵ်းဝႃႉသေ လုၵ်ႉတၢင်ႉယၢၼ်း – မိူင်းယႆ ၶဝ်ႈမႃးၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸွမ်းဢွင်ႈတီႈတပ်ႉသိုၵ်းၵဝ်ႈၵၢင်ႉ MNDAA ၵုမ်းလႆႈဝႆႉ ၸိူဝ်းၼၼ်ႉ ဝႃႈၼႆ။
ဢိင်ၼိူဝ်လွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်သိုပ်ႇၸူး ဢူးၺီရၢၼ်း ၽူႈမီးပုၼ်ႈၽွၼ်းလုမ်းၵပ်း သၢၼ်ဝႃႉ တီႈဝဵင်းလႃႈသဵဝ်ႈၵေႃႈ ဢမ်ႇလႆႈ။ တၢင်းၾၢႆႇသိုၵ်းဝႃႉၵေႃႈ ဢမ်ႇႁၼ်ပိုၼ်ၽၢဝ်ႇသင်။
ပူၼ်ႉမႃး မိူဝ်ႈဝၼ်းတီႈ 27 လိူၼ်ၵျူႊလၢႆႊၼၼ်ႉ ၼႄၶေႃႈဢၢင်ႈဝႃႈ ပဵၼ်တႃႇၵႅတ်ႇၶႄ ၶူဝ်းၶွင်လႄႈ လုမ်းၵပ်းသၢၼ်ဝႃႉ ၼႆသေ တပ်ႉသိုၵ်းဝႃႉ ဢဝ်ဢဵၼ်ႁႅင်းတင်းၼမ် ၶဝ်ႈၼႂ်းဝဵင်းလႃႈသဵဝ်ႈမႃး ၽွင်းသိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ် တင်းသိုၵ်းမၢၼ်ႈ ႁၢဝ်ႈႁႅင်းယူႇၼၼ်ႉ။
မိူၼ်ၼႆ ၼႂ်းႁူဝ်လိူၼ်ၼႆႉ ၽူႈၵုမ်းၶွၵ်ႈ 120 ၵေႃႉ တီႈၶွၵ်ႈလႃႈသဵဝ်ႈၼၼ်ႉ ယူႇတီႈ သိုၵ်းဝႃႉ ၸွႆႈသူင်ႇ ၵႂႃႇတၢင်းဝဵင်းမိူင်းယႆၼႆ ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈလၢတ်ႈ။
