မိူဝ်ႈၼႆႉ ဝၼ်းတီႈ 08/08/2024 ယၢမ်းဝၢႆးဝၼ်း 4 မူင်း ၶၼ်ငိုၼ်းၶႄႇ သိုပ်ႇၶိုၼ်ႈထႅင်ႈ 100 ယႂၼ်ႊ လႆႈငိုၼ်းမၢၼ်ႈ 75,757 ပျႃးယဝ်ႉ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၶၼ်ငိုၼ်းမၢၼ်ႈ လူင်းႁႅင်းၼႃႇ ယၢမ်းၵၢင်ၼႂ် ငိုၼ်းၶႄႇ 100 ယႂၼ်ႊ လႆႈ 72,000 ပျႃး။ ထိုင်မႃး ယၢမ်းၵၢင်ဝၼ်းသမ်ႉ မၢင်တီႈ ငိုၼ်းၶႄႇ 100 ယႂၼ်ႊ လႆႈ 73,100 ပျႃး၊ မၢင်တီႈ လႆႈ 74,074 ပျႃး။ ထိုင်မႃး ယၢမ်းဝၢႆးဝၼ်း 4 မူင်းသမ်ႉ 100 ယႂၼ်ႊ လႆႈ 75,757 ပျႃးယဝ်ႉ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ တၢင်းဝဵင်းမိူင်းယႆ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 81,000 ပျႃးယဝ်ႉ – ၵူၼ်းပိုၼ်ႉတီႈ ဝဵင်းမိူင်းယႆလၢတ်ႈ။
ၵူၼ်းလႅၵ်ႈငိုၼ်း လႅၼ်လိၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉသိုၵ်းမၢၼ်ႈ ဢိတ်ႇဢွၵ်ႇငိုၼ်းၼမ်ၵေႃႈ ပိူင်ၼိုင်ႈ၊ ယွၼ်ႉၶႅပ်းမၢင်ၸေႈဝႂ် 2 မိုၼ်ႇပျႃးၵေႃႈ ပိူင်ၼိုင်ႈ၊ ယွၼ်ႉဢမ်ႇမီးၵူၼ်းၼွၵ်ႈမိူင်း မႃးလူင်းတိုၼ်းၵေႃႈ ပိူင်ၼိုင်ႈ၊ ယွၼ်ႉဢမ်ႇပၼ် ငိုၼ်းတေႃႊလႃႊၶဝ်ႈ ၸိူဝ်းၼႆႉၵေႃႈ ပိူင်ၼိုင်ႈလႄႈ ၵွပ်ႈၼႆ ၶၼ်ငိုၼ်းမၢၼ်ႈ ၸင်ႇတူၵ်းႁႅင်း”- ဝႃႈၼႆ။
လိူဝ်သေငိုၼ်းၶႄႇယဝ်ႉ မိူၼ်ၼင်ႇ ၶၼ်ငိုၼ်းထႆးၵေႃႈ ၶိုၼ်ႈထႅင်ႈ မိူဝ်ႈၼႆႉ ဝၼ်းတီႈ 8 ယၢမ်းဝၢႆးဝၼ်း ငိုၼ်းထႆး 700 ဝၢတ်ႇ လႆႈငိုၼ်းမၢၼ်ႈ 100,000 ပျႃး။ ငိုၼ်းမၢၼ်ႈလႅၵ်ႈထႆးသမ်ႉ ငိုၼ်းမၢၼ်ႈ 100,000 ပျႃး လႆႈငိုၼ်းထႆး 630 ဝၢတ်ႇ ၼႆယဝ်ႉ။
