မိူဝ်ႈၼႆႉ ဝၼ်းတီႈ 08/08/2024 ယၢမ်းၵၢင်ၼႂ် ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 72,000 ပျႃးယဝ်ႉ တီႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဝႃႈၼႆ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶၼ်ငိုၼ်းမၢၼ်ႈ သိုပ်ႇလူင်းတိၵ်းတိၵ်းယဝ်ႉ မိူဝ်ႈၵႆႈၼႆႉ ငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 72,000 ပျႃး။ ယၢမ်းၵၢင်ဝၼ်း 11 မူင်းၼႆႉ သမ်ႉ 100 ယႂၼ်ႊလႆႈ 73,500 ပျႃးယဝ်ႉ။ ဢၼ်ၼႆႉ ပဵၼ်ၶၼ်ငိုၼ်း တွၼ်ႈၵၢင်ၼႂ်ၼႆႉၵူၺ်း။ ဝၢႆးဝၼ်းမႃး တေပဵၼ်ႁိုဝ်မႃးထႅင်ႈတႄႉ ဢမ်ႇႁူႉယဝ်ႉ။ တႄႇဢဝ် ႁၢင်လိူၼ်ၵျူႊလၢႆႊၼၼ်ႉမႃး ၶၼ်ငိုၼ်းမၢၼ်ႈၼႆႉ တႄႇလူင်းႁႅင်းမႃး ႁၢၼ်ႉတေႃႇထိုင်ယၢမ်းလဵဝ်ယဝ်ႉ”- ဝႃႈၼႆ။
ဢိင်ၼိူဝ် လွင်ႈၶၼ်ငိုၼ်းမၢၼ်ႈ လူင်းႁႅင်း ၸိူင်ႉၼႆၼႆႉ တုမ်ႉတိူဝ်ႉၵူၼ်းမိူင်း ၸိူဝ်းယူႇၸွမ်းလႅၼ်လိၼ်တႆး – ၶႄႇ မိူၼ်ၼင်ႇ ၸႄႈဝဵင်းမူႇၸေႊ၊ ၼမ်ႉၶမ်း ၸိူဝ်းၼႆႉ ႁၢဝ်ႈႁႅင်း ယွၼ်ႉႁဵတ်းႁႂ်ႈ ၶၼ်ၶူဝ်းၵုၼ်ႇ၊ ၶွင်ၵိၼ်ယႅမ်ႉ ၸိူဝ်းၼႆႉ ၶၼ်ပုင်ႈၶိုၼ်ႈႁႅင်း ၼႆယဝ်ႉ။
မိူၼ်ၼႆ ၼင်ႇၵဝ်ႇ ၶၼ်ငိုၼ်းထႆးၵေႃႈ ၶိုၼ်ႈမိူၼ်ၵၼ် မိူဝ်ႈၼႆႉ ဝၼ်းတီႈ 8 ယၢမ်းၵၢင်ၼႂ် ငိုၼ်းထႆး 715 ဝၢတ်ႇ လႆႈငိုၼ်းမၢၼ်ႈ 100,000 ပျႃး။ ငိုၼ်းမၢၼ်ႈလႅၵ်ႈထႆးသမ်ႉ 100,000 သႅၼ်ပျႃး လႆႈငိုၼ်းထႆး 650 ဝၢတ်ႇ ဢမ်ႇၼၼ် 645 ဝၢတ်ႇ – ၵူၼ်းလႅၵ်ႈငိုၼ်း ၸွမ်းလႅၼ်လိၼ် ၵေႃႉၼိုင်ႈလၢတ်ႈ။
လိူဝ်ၼၼ်ႉ ၶၼ်ငိုၼ်းတေႃႊလႃႊၵေႃႈ မိူၼ်ၵၼ် တႄႇဢဝ် လိူၼ်ဢေႃႊၵတ်ႊသ်ၼႆႉမႃး 1 တေႃႊလႃႊ 5,400 ပျႃးပၢႆယဝ်ႉ။
