ၸုမ်းဢူၺ်းလီပွတ်းႁွင်ႇ 3 ၸုမ်း ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်းထိုင် ႁႂ်ႈၶႄႇႁၢမ်ႈသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇၵူၼ်းမိူင်း ဝႃႈၼႆ။

ဝၼ်းတီႈ 06/08/2024 ၼႆႉ ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်း ယွၼ်းတၢင်းၸွႆႈထႅမ်တီႈမိူင်းၶႄႇ ႁႂ်ႈတူၵ်ႇတၵ်ႉႁႄႉ ႁၢမ်ႈသိုၵ်းမၢၼ်ႈ လွင်ႈၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ တီႈဢမ်ႇပဵၼ်ပၢင်တိုၵ်းသေ ႁဵတ်းႁႂ်ႈႁိူၼ်းယေး၊ ဝတ်ႉဝႃးၽႃသိူဝ်ႇ၊ ၵၢတ်ႇလႄႈ ႁူင်းႁဵၼ်း တီႈၵူၼ်းမိူင်းယူႇသဝ်းၼၼ်ႉ လူႉၵွႆၼမ် ဝႃႈၼႆ။

ဢူးတၢၼ်းသူဝ်းၼၢႆႇ ၽူႈလဵပ်ႈႁဵၼ်းထတ်းသၢင် ၵၢၼ်မိူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢိင်ၼိူဝ် လွင်ႈတုၵ်းယွၼ်း ၸုမ်းဢူၺ်းလီ 3 ၸုမ်းၼႆႉသေ ပဵၼ်လွင်ႈဢၼ်ၵိုင်ႇလီႁဵတ်းတုၵ်းယွၼ်းထိုင်ယဝ်ႉ။ ယၢမ်းလဵဝ် တီႈလၢဝ်ႇၵၢႆး၊ လႃႈသဵဝ်ႈ ၸိူဝ်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် ၵႂႃႇပွႆႇမၢၵ်ႇ မိူၼ်ၼင်ႇ ထႅမ်ႁႅင်းသိုၵ်း တၢင်းၵၢင်ႁၢဝ်ယဝ်ႉ။ ယၢမ်းလဵဝ် ဢမ်ႇမီးပၢင်တိုၵ်းသင်သေ ပိုတ်းယိုဝ်းယူႇ ၸိူင်ႉၼႆၼႆႉ တွၼ်ႈတႃႇမိူင်းၶႄႇၵေႃႈ မီးၽေးဝႆႉယူႇ”- ဝႃႈၼႆ။

ၼႂ်းၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီ 3 ၸုမ်း ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၾၢႆႇသိုၵ်းမၢၼ်ႈ လူႉယႂ်ႇသုမ်းၼမ်။ ယွၼ်ႉၼၼ်လႄႈ တီႈဢမ်ႇပဵၼ်ပၢင်တိုၵ်းၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် တင်ႈၸႂ်ပွႆႇမၢၵ်ႇသႂ်ႇ ပဵၼ်လွင်ႈပူၼ်ႉပႅၼ်ပိူင်ၵၢၼ်သိုၵ်းယဝ်ႉၼႆ ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉၼင်ႇၼႆ။

ၼႃႈတီႈ ၸုမ်းဢူၺ်းလီပွတ်းႁွင်ႇ 3 ၸုမ်း ယိုတ်းၵုမ်းလႆႈဝႆႉသမ်ႉ မိူၼ်ၼင်ႇ – ဝဵင်းလၢဝ်ႇၵၢႆး ၊ သႅၼ်ဝီ ၊ ၵူတ်ႉၶၢႆ ၊ ၼမ်ႉသၼ်ႇလႄႈ မျွၵ်ႉဢူး ၸိူဝ်းၼႆႉ ၶိူင်ႈမိၼ်သိုၵ်းမၢၼ်ႈ တင်ႈၸႂ်ပွႆႇမၢၵ်ႇသႂ်ႇ ႁဵတ်းႁႂ်ႈႁိူၼ်းယေး ၊ ဝတ်ႉဝႃးၽႃသိူဝ်ႇ ၊ ၶူဝ် ၊ ၵၢတ်ႇ ၊ ႁူင်းယႃလႄႈ ႁူင်းႁဵၼ်း ၸိူဝ်းၼႆႉလူႉၵွႆၼမ်။ ၵူၼ်းမိူင်းလဵၵ်ႉယႂ်ႇၼုမ်ႇထဝ်ႈ မၢတ်ႇၸဵပ်းလူႉတၢႆၼမ်လႄႈ ယၢပ်ႇၽိုတ်ႇၵိၼ်းၸႂ်။

ဝၢႆးလင် ၽႅၼ်ၵၢၼ်ယၼ်ႇသိုၵ်း 1027 ၵူၼ်းမိူင်းၸိူဝ်းယူႇဝႆႉ ၼႂ်းၼႃႈတီႈ ဢမ်ႇမီးတပ်ႉသိုၵ်းမၢၼ်ႈ ၼင်ႇႁိုဝ် တေလွတ်ႈၽေး ၶိူင်ႈမိၼ်သိုၵ်းမၢၼ်ႈၼၼ်ႉ ႁႂ်ႈယူႇၸွမ်းၼင်ႇ ၸုမ်းဢူၺ်းလီၼႄႉၼမ်းလႄႈ ႁႂ်ႈႁူမ်ႈမိုဝ်းႁဵတ်းၸွမ်းၼႆ တိုၵ်းသူၼ်းပႃးဝႆႉ ၼင်ႇၼႆထႅင်ႈ။