မိူဝ်ႈၼႆႉ ဝၼ်းတီႈ 07/08/2024 ယၢမ်းၵၢင်ၼႂ် 9 မူင်းပၢႆ မၢၵ်ႇတႅၵ်ႇ တီႈၵွင်း 45 ဝၢၼ်ႈၵၢင်ၼႃး ပွၵ်ႉၼိူဝ် ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ လုၵ်ႈၼိုင်ႈ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ထၢင်ႇဝႃႈ သိုၵ်းမၢၼ်ႈၶဝ် ယိုဝ်းၵွင်ႈလူင် ဢွၵ်ႇဝဵင်းၼႆဢေႃႈ။ တီႈတႄႉမၼ်း ၶဝ်ႁၼ်မၢၵ်ႇ တီႈၵွင်း 45 ၾၢႆႇလင်ႁူင်းႁေႃးယၼ်ႇၼွႆႇၼၼ်ႉသေ ယႃႉတႅၵ်ႇၼႆဢေႃႈ။ ပဵၼ်မၢၵ်ႇပွမ်း ၶဝ်ႁဵတ်းႁိုဝ် ယႃႉတႅၵ်ႇတႄႉ ဢမ်ႇႁူႉၶႃႈ။ သဵင်မၢၵ်ႇ ဢၼ်ၶဝ်ယႃႉတႅၵ်ႇၵႂႃႇ မိူဝ်ႈၵႆႈၼၼ်ႉ ႁႅင်းတႄႉဢေႃႈ”- ဝႃႈၼႆ။
ဢိင်ၼိူဝ် လွင်ႈယႃႉမၢၵ်ႇတႅၵ်ႇၼႆႉသေ လွင်ႈတုမ်ႉတိူဝ်ႉၵူၼ်းမိူင်း မၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 27/07/2024 ယၢမ်းၵၢင်ဝၼ်း ၵူၼ်းသူႇသမ်းယႃႈမဝ်းၵမ် ၵေႃႉၼိုင်ႈ ယဵပ်ႇၺႃးမၢၵ်ႇ မႅင်းၾင်လိၼ် ၾၢႆႇၼိူဝ်မၢၼ်ႈၼွင်မူဝ် ႁိမ်းလွႆၵိဝ်ႇလွၵ်ႇ ၼႂ်းဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ထိုင် တီႈတိူဝ်ႉမၢတ်ႇၸဵပ်းႁႅင်း လႆႈသူင်ႇယူတ်းယႃတူဝ် တီႈႁူင်းယႃလူင်မူႇၸေႊ။
