သိုၵ်းမၢၼ်ႈ ယိုတ်းမိူင်း ယူႇၼႂ်းတပ်ႉသေ ယိုဝ်းၵွင်ႈလူင် ဢွၵ်ႇဝဵင်းထပ်းၵၼ်လၢႆဝၼ်းလႄႈ ႁဵတ်းႁႂ်ႈၵူၼ်း မိူင်းယႆ တိုၼ်ႇသၢၼ်ႈ မႆႈၸႂ်ၵူဝ်ပဵၼ်ပၢင်တိုၵ်းယႂ်ႇ။

ဝၼ်းတီႈ 04/08/2024 ယၢမ်းၵၢင်ၼႂ် သိုၵ်းမၢၼ်ႈ ယူႇတီႈၼႂ်းတပ်ႉၶဝ်သေ ယိုဝ်းၵွင်ႈလူင် ဢွၵ်ႇဝဵင်းမိူင်းယႆ ၶိူဝ်းယႂ်း ႁဵတ်းႁႂ်ႈၵူၼ်းမိူင်း ဢွၼ်ၵၼ်တိုၼ်ႇသၢၼ်ႈ မႆႈၸႂ်ၵူဝ်ပဵၼ်ပၢင်တိုၵ်းယႂ်ႇလႄႈ မၢင်ၸိူဝ်း ငိူင်ႉပၢႆႈ ဢွၵ်ႇဝဵင်းထႃႈ မၢင်ၸိူဝ်း ဢမ်ႇၶၢမ်ႇပၢႆႈ ယွၼ်ႉမီးသိုၵ်း SSPP ဢဝ်ႁူမ်ႇလူမ်ႈဝႆႉပၼ်လႄႈ ႁတ်းယူႇ ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 4 ၼႆႉ ပဵၼ်ဝၼ်းသိလ်လႄႈ ၵူၼ်းမိူင်းတိုၵ်ႉ ၶိုၼ်ႈၵျွင်း လူႇတၢၼ်းၵူၺ်း။ သိုၵ်းမၢၼ်ႈ ယိုဝ်းၵွင်ႈလူင်ဢွၵ်ႇဝဵင်း သဵင်မၢၵ်ႇပၼ်းၼၼ်ႈၵႂႃႇတူဝ်ႈဝဵင်းလႄႈ ႁဵတ်းႁႂ်ႈ ၵူၼ်းမိူင်းယုပ်းၽၢၼ်ႈ တူၵ်းၸႂ်သေ ၵမ်ႈၽွင်ႈ ၼႅတ်ႈငိူင်ႉပၢႆႈဢွၵ်ႇဝဵင်းဝႆႉထႃႈ ဢၼ်ႁတ်းယူႇတႄႉ ယွၼ်ႉႁၼ်မီး SSPP မႃးဢဝ်ႁူမ်ႇလူမ်ႈဝႆႉလႄႈ ႁတ်းယူႇၵူၺ်း”- ဝႃႈၼႆ။

ဝၼ်းတီႈ 5 ယၢမ်းၵၢင်ၼႂ်ၸဝ်ႉ 1 မူင်း သိုၵ်းမၢၼ်ႈ ယိုဝ်းၵွင်းလူင် ဢွၵ်ႇၼွၵ်ႈဝဵင်းထႅင်ႈ 4 လုၵ်ႈ ၼၼ်ႉၵေႃႈ သဵင်ၵွင်ႈ ၼၼ်ႈလင်ႁႅင်းလႄႈ ထိုင်တီႈႁိူၼ်းပေႃးသၼ်ႇ။ တီႈဝဵင်းမိူင်းယႆၼႆႉ မီးၸုမ်းယိပ်းၵွင်ႈၵၢင်ႇ ယူႇဝႆႉ 3 ၸုမ်း မိူၼ်ၼင်ႇ – သိုၵ်းမၢၼ်ႈ ယိုတ်းမိူင်း၊ သိုၵ်းတႆး SSPP လႄႈ သိုၵ်းၵဝ်ႈၵၢင်ႉ MNDAA ၸိူဝ်းၼႆႉ တူင်ႉၼိုင်ယူႇဝႆႉ ႁၢဝ်ႈႁႅင်း။

လွင်ႈသိုၵ်းမၢၼ်ႈ ၵႆႉယိုဝ်းၵွင်ႈလူင် ဢွၵ်ႇဝဵင်းမိူင်းယႆ ၵႂႃႇတၢင်းဢိူင်ႇႁူဝ်ယ သဵၼ်ႈတၢင်းၵႂႃႇ လႃႈသဵဝ်ႈ တၢင်းမၢၼ်ႈၸၢင်ႉ၊ ၵုင်းၼိဝ်ႉ သဵၼ်ႈတၢင်းၵႂႃႇသီႇပေႃႉ ၸိူဝ်းၼၼ်ႉ။ ပေႃးလုၵ်ႉဢဝ်မိူင်းယႆ တေႃႇထိုင် ဝၢၼ်ႈၵုင်းဝႅတ်ႈသမ်ႉ သိုၵ်း SSPP ဢဝ်ႁူမ်ႇလူမ်ႈဝႆႉ လုၵ်ႉဢဝ် တီႈဝၢၼ်ႈၸၢင်ႉ တေႃႇပေႃးႁွတ်ႈ သွင်ၵေးသမ်ႉ သိုၵ်းၵဝ်ႈၵၢင်ႉ ပၵ်းတပ်ႉယူႇဝႆႉ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇ သင်ထၢင်ႇထိူမ်ဝႃႈ လႅပ်ႈပဵၼ်သိုၵ်းၼႆ ယိင်ႈၶႅၼ်းၸႅတ်ႈၾူၼ်း ၸႅတ်ႈမၢႆၾၢင် ၸိူဝ်းၼႆႉထႅင်ႈ။

“ပႅၵ်ႉသမ်ႉဝႃႈ သိုၵ်းတႆး SSPP မႃးဢဝ်ႁူမ်ႇလူမ်ႈဝႆႉပၼ် ၼႂ်းဝဵင်းမိူင်းယႆ ယူႇသေတႃႉ သိုၵ်းမၢၼ်ႈသမ်ႉ ယူႇၼႂ်းတပ်ႉၶဝ်သေ ၵႆႉယိုဝ်းၵွင်ႈလူင်ယူႇၸိူင်ႉၼႆ တိၵ်းတိၵ်းတႄႉ ႁဝ်းၶႃႈ ၵူၼ်းမိူင်းလွမ်ၵူဝ် သိုၵ်းၵဝ်ႈၵၢင်ႉ ပွႆႇမၢၵ်ႇမႃးၶိုၼ်းၵူၺ်း ၶႃႈယဝ်ႉ။ ပေႃးတူၺ်းလၢႆးႁဵတ်းသိုၵ်းမၢၼ်ႈ ယၢမ်းလဵဝ်ၼႆႉ မိူၼ်ဝႃႈ သိုၵ်းမၢၼ်ႈ ၶႂ်ႈႁႂ်ႈသိုၵ်းၵဝ်ႈၵၢင်ႉ မႃးတိုၵ်းၶဝ် ၼႂ်းဝဵင်း။ ယွၼ်ႉမီးသိုၵ်း SSPP ဢဝ်ႁူမ်ႇလူမ်ႈ ႁွပ်ႈဝဵင်းဝႆႉလႄႈ သင်ဝႃႈ သိုၵ်းၵဝ်ႈၵၢင်ႉ ၶဝ်ႈမႃးတိုၵ်းၼႂ်းဝဵင်းၸိုင်။ သိုၵ်း SSPP ႁူႉၵႃႈတေလႆႈတိုၵ်းၵၼ် တင်းသိုၵ်းၵဝ်ႈၵၢင်ႉ ဢမ်ႇႁၢင်ႉ”- ၵူၼ်းပိုၼ်ႉတီႈ ဝဵင်းမိူင်းယႆ သိုပ်ႇလၢတ်ႈၼႄၼင်ႇ ၼႆ။

ၵွပ်ႈၼႆလႄႈ ၵူၼ်းမိူင်းယႆ ဢွၼ်ၵၼ်တုၵ်းယွၼ်းထိုင် လွင်ႈပၼ်ႁႃၵၢၼ်သိုၵ်း ဢၼ်ပဵၼ်ယူႇၼႂ်းမိူင်းယႆ ယၢမ်းလဵဝ်ၼႆႉ ႁႂ်ႈၵိုတ်းတိုၵ်းထွၼ် ဢွၵ်ႇပႅတ်ႈတင်းမူတ်းသေၵမ်း ဝႃႈၼႆ။

ၵူၼ်းၼုမ်ႇ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ၵူၼ်းမိူင်းတႄႉ ဢမ်ႇႁူႉဝႃႈ သိုၵ်းတႆးႁဝ်း ပဵၼ်သင် ဢမ်ႇႁၢမ်ႈသိုၵ်းမၢၼ်ႈ ယႃႇပွႆႇမၢၵ်ႇဢွၵ်ႇဝဵင်း။ ဝႃႈလႃးၵေႃႈ သိုၵ်းမၢၼ်ႈ တင်ႈၸႂ်ယူင်းႁႂ်ႈတပ်ႉသိုၵ်း SSPP တင်း သိုၵ်း MNDAA မႃးတိုၵ်းၵၼ်ႁိုဝ်ဢမ်ႇႁူႉ။ သင်ဝႃႈ သိုၵ်းမၢၼ်ႈ တိုၵ်ႉသိုပ်ႇယိုဝ်းၵွင်ႈလူင် ဢွၵ်ႇဝဵင်းယူႇတိၵ်းတိၵ်းၸိုင် တႃႇသိုၵ်းၵဝ်ႈၵၢင်ႉ တေဢမ်ႇပွႆႇမၢၵ်ႇမႃးၶိုၼ်းတႄႉ တေဢမ်ႇပဵၼ်လႆႈ ၶဝ်တိုၼ်းတေမႃးတိုၵ်းၼႂ်းဝဵင်းယူႇ ဢမ်ႇႁၢင်ႉ ၸဵဝ်းလႄႈၼၢၼ်း ၼၼ်ႉၵူၺ်း”- ဝႃႈၼႆ။

ႁူဝ်လိူၼ်ၵျူႊလၢႆႊ ပူၼ်ႉမႃးၼၼ်ႉ သိုၵ်းၵဝ်ႈၵၢင်ႉ လုၵ်ႉတၢင်းလႃႈသဵဝ်ႈ ထႅမ်ႁႅင်းသိုၵ်း မုင်ႈၸူးတၢင်းမိူင်းယႆၼႆႉ တင်းၼမ်သေ လႆႈၵိူတ်ႇပဵၼ်ပၢင်တိုၵ်းၵၼ် တင်းသိုၵ်းမၢၼ်ႈ ႁၢဝ်ႈႁႅင်း။ ၼႂ်းၸႄႈဝဵင်းမိူင်းယႆၼႆႉ ပဵၼ်ပိုၼ်ႉတီႈ ၶွင်တပ်ႉသိုၵ်းတႆး SSPP ၵုမ်းၵမ် တူင်ႉၼိုင်ယူႇဝႆႉလႄႈ မိူဝ်ႈဝၼ်းတီႈ 13 လိူၼ်ၵျူႊလၢႆႊၼၼ်ႉ သိုၵ်း SSPP ၶဝ်ႈဢဝ်တီႈယူႇ တူင်ႉၼိုင်ဝႆႉ ၼႂ်းဝဵင်းၼပ်ႉႁူဝ်ႁဵင် ထႅဝ်ရူတ်ႉၵႃးသိုၵ်းပၵ်းတုင်း SSPP သေ လတ်းၵၢင်ဝဵင်းမႃး တႃႇဢဝ်ႁူမ်ႇလူမ်ႈဝဵင်းမိူင်းယႆ ၼႆယဝ်ႉ။