ႁူဝ်ပဝ်ႈ ပႃႇတီႇသၢင်ႇသီႈ တုၵ်းယွၼ်းရတ်ႉသျႃႊ မႃးၸွႆႈတိုၵ်းၸွမ်း ပၢင်တိုၵ်းၼႂ်းမိူင်းမၢၼ်ႈ

ၵဵဝ်ႇၵပ်းလူၺ်ႈ ပၢင်တိုၵ်းၼႂ်းၸိုင်ႈတႆးပွတ်းႁွင်ႇၼႆႉသေ ဢူးၶိၼ်ႇယီႇ ႁူဝ်ပဝ်ႈ ပႃႇတီႇသၢင်ႇသီႈ ဢၼ်တပ်ႉသိုၵ်းမၢၼ်ႈ ၵမ်ႉယၼ်ယူႇလင်ဝႆႉၼၼ်ႉတႄႉ လၢတ်ႈတီႈသိုဝ်ႇၶၢဝ်ႇ Sputnik မိူဝ်ႈဝၼ်းတီႈ 4 လိူၼ်ၼႆႉဝႃႈ – ၶႂ်ႈႁႂ်ႈမိူင်းရတ်ႉသျႃႊ ၸွႆႈထႅမ်ပၼ်ၵၢၼ်သိုၵ်း ၶဝ်ႈပႃးတိုၵ်းၸွႆႈ ၼႂ်းပၢင်တိုၵ်းသိုၵ်းသိူဝ် 333 ၼႂ်းမိူင်း ဝႃႈၼႆ။

ဢူးၶိၼ်ႇယီႇ လၢတ်ႈဝႃႈ ႁႂ်ႈရတ်ႉသျႃႊ ႁပ်ႉဝႃႈ ပၼ်ႁႃၼႂ်းမိူင်းမၢၼ်ႈ ယၢမ်းလဵဝ်ၼႆႉ ပဵၼ်ပၼ်ႁႃၵေႃႇၵၢၼ်ႁၢႆႉ၊ ဢမ်ႇ ၸႂ်ႈပၼ်ႁႃၵၢၼ်မိူင်း။ သင်ၸိူဝ်ႉဝႃႈ မိူင်းရတ်ႉသျႃႊ ၶဝ်ႈႁူမ်ႈၸွႆႈထႅမ်ၼႂ်းပၢင်တိုၵ်းၸိုင် ယုမ်ႇယမ်ဝႃႈ တိုၼ်းတေဢွင်ႇပေႉလႆႈ ၼႂ်းၵၢၼ်ၵႂၢတ်ႇလၢင်ႉၽဵဝ်ႈမူၺ်ႉ လွင်ႈၵေႃႇၵၢၼ်ႁၢႆႉဢမ်ႇႁၢင်ႉ ဝႃႈၼႆ။

ႁွင်ႈၵၢၼ်ၶၢဝ်ႇမိူင်းရတ်ႉသျႃႊၼႆႉ မႃးတွင်ႈထၢမ် (ဢိၼ်ႊတႃႊဝိဝ်ႊ) ဢူးၶိၼ်ႇယီႇ တီႈႁွင်ႈၵၢၼ် ပႃႇတီႇသၢင်ႇသီႈ တီႈ ၼေႇပျီႇတေႃႇ မိူဝ်ႈဝၼ်းတီႈ 30 လိူၼ်ၵျူႊလၢႆႊပူၼ်ႉမႃးၼၼ်ႉ။

ၽူႈလဵပ်ႈႁဵၼ်း ၵၢၼ်မိူင်းၶဝ်တႄႉ ထတ်းသၢင်ဝႃႈ – ၼႂ်းပိူင်ငဝ်ႈပိုင်းမိူင်း 2008 မတ်ႉတႃ 42 – ၶ ၼၼ်ႉ ပႃးဝႆႉဝႃႈ – ပၼ်ႁႃၼႂ်းၸိုင်ႈမိူင်းၼႆႉ တိုၼ်းဢမ်ႇပၼ်ၶႂၢင်ႉ တၢင်ႇၸိုင်ႈမိူင်း ၶဝ်ႈမႃးၸွႆႈၵႄႈလိတ်ႈ ၼႆဝႆႉလႄႈ – လွင်ႈဢူးၶိၼ်ႇယီႇ လၢတ်ႈၵႂႃႇၼႆႉ ဢမ်ႇမႅၼ်ႈၸွမ်းပၵ်းပိူင်မၢႆမီႈၸိုင်ႈမိူင်း – ဝႃႈၼႆ။

ၾၢႆႇတၢင်း ၸုမ်းသိုၵ်းၸၢဝ်းၶိူဝ်းတႄႉ လၢတ်ႈဝႃႈ – သိုၵ်းမၢၼ်ႈၼႆႉ သုမ်းသိုၵ်းၼမ်ၼႃႇယဝ်ႉလႄႈ ဢမ်ႇမီးႁႅင်းတႃႇတေႃႇသူႈၶိုၼ်း။ ဢၼ်ၶဝ်ႁွင်ႉဢဝ်ၼွၵ်ႈမိူင်းမႃးၸွႆႈ ၼႂ်းၵၢၼ်သိုၵ်းၶဝ်ၸိူင်ႉၼႆၼႆႉ မိူၼ်တင်းဝႃႈ သိုၵ်းမၢၼ်ႈ ယွမ်းႁပ်ႉပိုတ်ႇလၢတ်ႈၼႄလုမ်ႈၾႃႉဝႃႈ – ၶဝ်သုမ်းသိုၵ်းယဝ်ႉ ၼႆၵူၺ်း – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။