ဝၼ်းတီႈ 05/08/2024 ယၢမ်းၵၢင်ၶိုၼ်ႈ 10 မူင်းပၢႆၼႆႉ သိုၵ်းတဢၢင်း TNLA  ႁူမ်ႈ PDF သေ တိုၵ်းယိုတ်းလႆႈ တပ်ႉသိုၵ်းမၢၼ်ႈ ၶမယ 501 – 502 လႄႈ တပ်ႉၵွင်ႈလူင် (စကခ – 1) ဢၼ်မီး ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇယဝ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈ TNLA သေ ပႆႇပိုၼ်ၽၢဝ်ႇ ပဵၼ်တၢင်းၵၢၼ်သေတႃႉ တီႈသိုဝ်ႇၶၢဝ်ႇမၢၼ်ႈ လၢႆလၢႆဢၼ်တႄႉ ပိုၼ်ၽၢဝ်ႇတႅမ်ႈတၢင်ႇဝႆႉယဝ်ႉ။

ႁွင်ႈၵၢၼ်ၶၢဝ်ႇမၢၼ်ႈ ဢီႊရႃႊဝတီႊဢွၵ်ႇဝႆႉဝႃႈ -“မိူဝ်ႈဝႃး ယၢမ်းၵၢင်ၶမ်ႈ10 မူင်း သိုၵ်းတဢၢင်း TNLA တင်း PDF ၶဝ်ႈလူမ်ႇယိုဝ်းတပ်ႉသိုၵ်းမၢၼ်ႈ တပ်ႉ 501-502 လႄႈ တပ်ႉၵွင်ႈလူင် (စကခ – 1) ဢၼ်မီး ၾၢႆႇႁွင်ႇဝဵင်းၵျွၵ်ႉမႄးမွၵ်ႈ 2 လၵ်း။ ယိုတ်းလႆႈပႃး ၵႃးၵၢပ်ႇလဵၵ်း။ တူဝ်တၢႆ သိုၵ်းမၢၼ်ႈၵေႃႈ မီးတင်း ၼမ်တင်းလၢႆ ။ သိုၵ်းမၢၼ်ႈ ဢဝ်ၶိူင်ႈမိၼ် ယိုဝ်းၸွႆႈတေႃႇထိုင် တဵင်ႈၶိုၼ်း၊ သိုၵ်းၸိူဝ်း ၵိုတ်းၼႂ်းတပ်ႉ 100 ပၢႆ ဢွၼ်ၵၼ်ပၢႆႈသေ သိုၵ်း TNLA – PDF ၸင်ႇၶဝ်ႈယိုတ်းၵုမ်းလႆႈ တပ်ႉလီငၢမ်း။ ယၢမ်းလဵဝ် ဝဵင်းၵျွၵ်ႉမႄးၼႆႉ လႆႈဝႃႈ တပ်ႉသိုၵ်းမၢၼ်ႈ တူၵ်းသုမ်းမူတ်းယဝ်ႉ”- ဝႃႈၼႆ။

ၵဵဝ်ႇလူၺ်ႈလွင်ႈ သိုၵ်းတဢၢင်း TNLA ယိုတ်းလႆႈ ဝဵင်းၵျွၵ်ႉမႄးၼႆႉသေ ႁဝ်းၶႃႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇ ၽူႈၶၢၼ်ပၢၵ်ႇ သိုၵ်းတဢၢင်း လူၺ်းယေႇဢူးၵေႃႈ ဢမ်ႇလႆႈ။

တႄႇဢဝ် ဝၼ်းတီႈ 25 လိူၼ်ၵျုၼ်ႊ ပီ 2024 ၼႆႉမႃး သိုၵ်းတဢၢင်း TNLA ႁူမ်ႈ PDF ၶဝ်ႈလူမ်ႇယိုဝ်း တပ်ႉသိုၵ်းမၢၼ်ႈ ဢၼ်မီးၼႂ်းၸႄႈဝဵင်းၵျွၵ်ႉမႄး ၶၢဝ်းတၢင်းလိူၼ်ပၢႆ ၸင်ႇယိုတ်းလႆႈတပ်ႉသိုၵ်းမၢၼ်ႈ တင်းမူတ်း တႅမ်ႈဝႆႉၼင်ႇၼႆ။

ယၢမ်းလဵဝ် တီႈဝဵင်းၵျွၵ်ႉမႄးၼႆႉ လႅင်းၾူၼ်းလႄႈ ဢိၼ်ႊထိူဝ်ႊၼႅတ်ႊ ၶၢတ်ႇဝႆႉမူတ်း။ ၵူၼ်းၸိူဝ်း ဢမ်ႇပၢႆႈသေ ၵိုတ်းဝႆႉဢိတ်းဢွတ်းၵေႃႈ ဢမ်ႇမီးတၢင်းၵိၼ်တၢင်းယႅမ်ႉလႄႈ ၼမ်ႉ – ၸုမ်းၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈၼင်ႇၼႆ။

ၼႂ်းၶၢဝ်းတၢင်း ပၢင်တိုၵ်းၼႆႉ ၵူၼ်းမိူင်းဢၼ်လႆႈလူႉတၢႆၸွမ်း ဢမ်ႇယွမ်း 200  ၵေႃႉလႄႈ ၵူၼ်းမၢတ်ႇၸဵပ်းၵေႃႈ ဢမ်ႇယွမ်း 300 ၵေႃႉ။ ယွၼ်ႉပၢင်တိုၵ်းသေ မေႃယႃတီႈႁူင်းယႃ ဝဵင်းၵျွၵ်ႉမႄး ဢွၼ်ၵၼ်ပၢႆႈမူတ်း၊ ၵူၼ်းမၢတ်ႇၸဵပ်းဢိတ်း ဢွတ်းတႄႉ လႆႈယူတ်းယႃတူဝ် ဢဝ်ႁင်းၵူၺ်း။ ၸိူဝ်းမၢတ်ႇၸဵပ်းႁႅင်းသမ်ႉ သူင်ႇယူတ်းယႃ တီႈပၢင်ႇဢူႈလူင်၊ ဝဵင်းလိူဝ်ႇ ၸိူဝ်းၼၼ်ႉ။

ၽွင်းပၢင်တိုၵ်း ၽႅၼ်ယၼ်ႇသိုၵ်း 1027 သိုပ်ႇပဵၼ်မႃး ႁၢင်လိူၼ်ၵျုၼ်ႊၼႆႉ သိုၵ်းတဢၢင်း TNLA ႁူမ်ႈ PDF ပိုၼ်ၽၢဝ်ႇဝႃႈ ယိုတ်းလႆႈတပ်ႉသိုၵ်းမၢၼ်ႈ ၼႂ်းဝဵင်းမိူင်းမိတ်ႈ၊ ဝဵင်းမိူင်းၵုတ်ႈ၊ ဝဵင်းၼွင်ၶဵဝ်လႄႈ ဝဵင်းၵျွၵ်ႉမႄး။ ဢၼ်ပႆႇယိုတ်းလႆႈတႄႉ ပဵၼ်ဝဵင်းသီႇပေႃႉ။

ဝဵင်းၵျွၵ်ႉမႄးၼႆႉ ၽူႈၵုမ်းၵမ်ယၼ်ႇသိုၵ်း ပဵၼ်ၸဝ်ႈသိုၵ်း ဢွင်ႇၶၢႆႇမူဝ်း ၵႅမ်ၽူႈၵွၼ်း ၸၵၶ – 1 (စကခ – 1)။ တူဝ်ၽူႈ ၵွၼ်း ၸၵၶ – 1 တႄႉ ပဵၼ်ၵႅမ်ၸွမ်ႁၢၼ် မဵဝ်းမိၼ်းထူၺ်း။ မၼ်းၸၢႆးသမ်ႉ ၺႃးသိုၵ်း MNDAA တီႉလႆႈတူဝ်လိပ်း ၼႂ်းတိူင်းသိုၵ်း ယမၶ တီႈဝဵင်းလႃႈသဵဝ်ႈယဝ်ႉ – ၶၢဝ်ႇဢီႊရႃႊဝတီႊ ၾၢႆႇမၢၼ်ႈဢွၵ်ႇဝႆႉၼင်ႇၼႆ။