ထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ပီၼႆႉ ႁွႆယႃႉၵဝ်း တူၼ်ႈၶဝ်ႈႁၢဝ်ႈႁႅင်း ၸဝ်ႈၼႃးလူႉသုမ်းၼမ် ဝႃႈၼႆ။

တႄႇလိူၼ်ၵျူႊလၢႆႊမႃး ႁွႆၶဝ်ႈယႃႉ ၶူပ်းတူၼ်ႈၶဝ်ႈ ၼႂ်းထုင်ႉၼႃးတွၼ်ႈတၢင်းဢွၵ်ႇလႄႈ တၢင်းတူၵ်း ၼွင်ႁၢႆးယႃႈ ႁဵတ်းႁႂ်ႈတူၼ်ႈၶဝ်ႈ ၸဝ်ႈၼႃးလူႉသုမ်းၼမ် လိူဝ်တၢင်ႇပီ ၼႆယဝ်ႉ။

ၸဝ်ႈၼႃးၼွင်ႁၢႆးယႃႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ပီၼႆႉတႄႉ ၶဝ်ႈတေဢွၵ်ႇဢေႇ။ ယွၼ်ႉႁွႆယႃႉၵေႃႈပႃး၊ ၾိင်ႈၾႃႉရႃႇသီႇ ဢမ်ႇလီ ၵမ်ႉမႆႈၵမ်ႉၵတ်း၊ ၼမ်ႉထူမ်ႈၼမ်ႉၼွင်း၊ ထႅင်ႈလွင်ႈၼိုင်ႈ တၢင်းမိူင်းပၢႆးၵေႃႈ သိုၵ်းမၢၼ်ႈ ပိုတ်ႇၾၢႆၼမ်ႉထႅင်ႈ ႁဵတ်းႁႂ်ႈၼမ်ႉထူမ်ႈ ၸဝ်ႈၼႃး မီးလွင်ႈလူႉသုမ်းၼမ်”- ဝႃႈၼႆ။

တီႈၼွင်ႁၢႆးယႃႈၼႆႉ ၵူႈပီၵေႃႈ ႁွႆယႃႉတူၼ်ႈၶဝ်ႈယူႇသေတႃႉ ဢမ်ႇၼမ်ပဵင်းပီၼႆႉ။ တႃႇႁႄႉၵင်ႈ လွင်ႈႁွႆ ယႃႉတူၼ်ႈၶဝ်ႈၼၼ်ႉ မိူဝ်ႈပႆႇၽုၵ်ႇၶဝ်ႈၼၼ်ႉ ၸဝ်ႈၼႃးၽဵဝ်ႈပႅတ်ႈႁွႆသေ ၸင်ႇၽုၵ်ႇသွမ်ႈသေတႃႉ ပီၼႆႉ ယွၼ်ႉႁွႆၼမ်ၽႄႈဝႆး ၼႃႇလႄႈ ၵုမ်းဢမ်ႇတၼ်းပေႉလႆႈ ဝႃႈၼႆ။

ပီၼႆႉ ၽွင်းၶၢဝ်းဝၢၼ်ႇၽၼ်းၶဝ်ႈၼၼ်ႉ ၼမ်ႉတႃႇသႂ်ႇၼႃးၵေႃႈႁႅင်ႈလႄႈ ၸဝ်ႈၼႃး တွၼ်ႈဝၼ်းတူၵ်း ၼွင်ႁၢႆးယႃႈ မၢင်ၸိူဝ်း ဢမ်ႇၽုၵ်ႇၶဝ်ႈသေ ၽုၵ်ႇထူဝ်ႇလိၼ်တႅၼ်းတၢင်ၵႂႃႇၵေႃႈမီး ဝႃႈၼႆ။

ၸဝ်ႈၼႃး တွၼ်ႈဝၼ်းတူၵ်းၼွင်ႁၢႆးယႃႈ ဢၼ်ၽုၵ်ႈၶဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ႁဝ်းၶႃႈတႄႉ မုင်ႈမွင်းဝႆႉ ၼမ်ၼႃႇၶႃႈဢေႃႈ ပီၼႆႉ။ ၵူၺ်းႁွႆၵိၼ်တူၼ်ႈၶဝ်ႈႁၢႆႉႁႅင်းၼႃႇသေ ၽွင်းတူၼ်ႈၶဝ်ႈယႂ်ႇမႃး ၾူၼ်တူၵ်းႁႃႇယႂ်ႇ ၼမ်ႉသမ်ႉၼွင်းထူမ်ႈတူၼ်ႈၶဝ်ႈထႅင်ႈ၊ တႃႇပီၼႆႉတႄႉ ႁႃၵိၼ်ယၢပ်ႇဢေႃႈ မၢင်ၸိူဝ်း လႆႈၵႂႃႇၵူႈငိုၼ်းသေ မႃးၸႂ်ႉၼႂ်း ၵၢၼ်ၽုၵ်ႇသွမ်ႈ ၸိူဝ်းၼၼ်ႉၵေႃႈ မႆႈၸႂ် ၵူဝ်ဢမ်ႇၸၢင်ႈသၢႆႈၼီႈ လႆႈၶိုၼ်းၵူၺ်းယဝ်ႉၶႃႈ”- ဝႃႈၼႆ။

ႁွႆယႃႉၵဝ်းတူၼ်ႈၶဝ်ႈ ၼႂ်းၼွင်ႁၢႆးယႃႈၼႆႉ ဢမ်ႇၸႂ်ႈတႄႇမႃး ပီၼႆႉၵူၺ်း။ မီးမႃး ၸဵမ်မိူဝ်ႈလႂ်သေတႃႉၵေႃႈ ဢမ်ႇႁၢႆႉႁႅင်းပဵင်းပီၼႆႉ ၸဝ်ႈၼႃး ၼႂ်းၼွင်ႁၢႆးယႃႈ လၢတ်ႈၼင်ႇၼႆ။

ၼွင်ႁၢႆးယႃႈၼႆႉ မီးယူႇ 32 ဝၢၼ်ႈ၊ ဝၢၼ်ႈဢၼ်ယူႇၼိူဝ်ၼမ်ႉတႄႉ မီးယူႇ 6 ဝၢၼ်ႈ။ ၵမ်ႈၼမ် ႁဵတ်းၵၢၼ်ၽုၵ်ႇၶဝ်ႈ 3 ပုၼ်ႈ 2 ပုၼ်ႈၼႆႉ တႃႇပုၼ်ႈၼိုင်ႈတႄႉ ၽုၵ်ႇမၢၵ်ႇၶိူဝ်သူမ်ႈ။

ၸူဝ်ႈၵၢၼ်ဢႅဝ်ႇယဵမ်ႈတွင်ႈတဵဝ်း ဢမ်ႇပဵၼ်ၵၢၼ်ၼႆႉ ပီႈၼွင်ႉၼွင်ႁၢႆးယႃႈၽုၵ်ႇသွမ်ႈ ႁဵတ်းၵိၼ်လဵင်ႉတွင်ႉ ပဵၼ်ပိူင်လူင်။ ၵမ်းၼမ် ၽုၵ်ႇမၢၵ်ႇၶိူဝ်သူမ်ႈ၊ မၢၵ်ႇၽိတ်ႉ၊ ၶဝ်ႈ ၸဵမ်ၸိူဝ်းၼႆႉ။

တႅမ်ႈ- ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)