ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မွၵ်ႇလၢတ်ႈၶေႃႈၵႂၢမ်း ၼႂ်းငဝ်းႁၢင်ႈသဵင် TV မၢၼ်ႈဝႃႈ – တေသိုပ်ႇပိုတ်းယိုဝ်း တိုၵ်းတေႃးၶိုၼ်း တႃႇႁႂ်ႈဝၢၼ်ႈမိူင်းလႆႈလွင်ႈၵတ်းယဵၼ်ၼိမ်တဵင်ႈ ဝႃႈၼႆ။

ဝၼ်းတီႈ 05/08/2024 ယၢမ်းၵၢင်ၶမ်ႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ – ပၢင်တိုၵ်း ၼႂ်းမိူင်းတႆးပွတ်းႁွင်ႇၼႆႉ – ယူႇတီႈသိုၵ်းမၢၼ်ႈသေ မႆႈၸႂ်လွင်ႈႁူမ်ႇလူမ်ႈၵူၼ်းမိူင်း ၵူဝ်တုမ်ႉတိူဝ်ႉႁိူၼ်းယေး ၵူၼ်းမိူင်းလႄႈ ဢမ်ႇသႂ်ႇႁႅင်း ပိုတ်းယိုဝ်းၶိုၼ်း။ လိုၼ်းသုတ်း ႁဵတ်းႁႂ်ႈသိုၵ်းၸၢဝ်းၶိူဝ်း တီႉၺွပ်းသိုၵ်းမၢၼ်ႈ ယိုတ်းတပ်ႉသိုၵ်းမၢၼ်ႈ ပူၼ်ႉပႅၼ်မႃးႁၢဝ်ႈႁႅင်း။ ၵွပ်ႈၼႆ တေသႂ်ႇႁႅင်းပိုတ်းယိုဝ်းၶိုၼ်း – ဝႃႈၼႆ။

“သိုၵ်းလႄႈပလိၵ်ႈ ဢိၵ်ႇပျီႇတူႉၸိတ်ႉ ၸိူဝ်းလႆႈတူၵ်းသုမ်းလူႉတၢႆၵႂႃႇ ၽွင်းပၢင်တိုၵ်းၼၼ်ႉ ယူႇတီႈ တပ်ႉမတေႃႇသေ ဝႆႉၼၵ်းမၵ်းမၼ်ႈယူႇ။ ယွၼ်ႉပၢင်းတိုၵ်းသေ ၵူၼ်းမိူင်းလႆႈပၢႆႈယၢၼ်ႁိူၼ်းယေး တီႈယူႇ။ ၵွပ်ႈၼႆ တေႁဵတ်းႁႂ်ႈလႆႈလွင်ႈၵတ်းယဵၼ်တင်းမိူင်းယူႇ။ ဢၼ်သိုၵ်းၸၢဝ်းၶိူဝ်း မႃးပူၼ်ႉပႅၼ်ပိုတ်းယိုဝ်း ယိုတ်းတပ်ႉသိုၵ်းမၢၼ်ႈ ယူႇၸိူဝ်းၼႆႉ ယူႇတီႈ သိုၵ်းမၢၼ်ႈသေ တိုၼ်းဢမ်ႇႁပ်ႉလႆႈ။ တေသႂ်ႇႁႅင်းႁဵတ်းသၢင်ႈၵႂႃႇ တေႃႇပေႃးလႆႈ လွင်ႈငမ်းယဵၼ်ပတ်းပိုၼ်ႉၸိုင်ႈမိူင်း”- ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မွၵ်ႇလၢတ်ႈ ၵႂႃႇၼင်ႇၼႆ။

ယၢမ်းလဵဝ် ၼႂ်းၸိုင်ႈတႆးပွတ်းႁွင်ႇၼႆႉ မီးသိုၵ်းၵဝ်ႈၵၢင်ႉ MNDAA – TNLA – AA – KIA – KNU – PDF ၸိူဝ်းၼႆ ႁူမ်ႈ ၵၼ်သေ ပိုတ်းယိုဝ်း သိုၵ်းမၢၼ်ႈယူႇ။

ၸွမ်ၸိၵ်းသိုၵ်းမၢၼ်ႈဝႃႈ – ၸုမ်းသိုၵ်းၸၢဝ်းၶိူဝ်းၸိူဝ်းၼႆႉ ဢဝ်တၢင်းၵမ်ႉၸွႆႈၶိူင်ႈၵွင်ႈၵၢင်ႇ ငိုၼ်းတွင်းလႄႈ လွၵ်းလၢႆးပၢႆးတိုၵ်း တီႈၵူၼ်းၼွၵ်ႈမိူင်း – ဝႃႈၼႆ။

ဢၼ်သိုၵ်းမၢၼ်ႈ လႆႈသုမ်းတပ်ႉသိုၵ်း သုမ်းဝဵင်းၼႆႉၵေႃႈ – ၵုမ်ႇလႆႈတူၺ်းႁၼ်လွင်ႈႁူမ်ႇလူမ်ႈၵူၼ်းမိူင်း၊ ၵူဝ်တုမ်ႈတိူဝ်ႉလွင်ႈယူႇသဝ်းၵိၼ်သၢင်ႈၵူၼ်းမိူင်းလႄႈ ဢမ်ႇၶႂ်ႈဢဝ်လၢႆးယိပ်းၵွင်ႈၵၢင်ႇသေ ၵႄႈလိတ်ႈပၼ်ႁႃ ဝႃႈၼႆၵႂႃႇပႃး။

ၵွၼ်ႇၼႃႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တေမွၵ်ႇလၢတ်ႈၶေႃႈၵႂၢမ်း ၼႂ်းထီႊဝီႊမွၵ်ႈ 4 ၸူဝ်ႈမူင်း ၼႆႉၵူၺ်း မီးၶိူင်ႈမိၼ် သိုၵ်းမၢၼ်ႈ မႃးပိုတ်းယိုဝ်း တီႈဝဵင်းၵူတ်ႉၶၢႆ။ တိူဝ်ႉသႂ်ႇၵၢတ်ႇလႄႈ ႁိူၼ်းယေး ၵူၼ်းမိူင်း။ ၵူၼ်းမိူင်း တၢႆယွၼ်ႉ ၸၢၵ်ႇမၢၵ်ႇလူင် သိုၵ်းမၢၼ်ႈ မီး 5 ၵေႃႉ။

မိူၼ်ၼႆ ၼင်ႇၵဝ်ႇ တီႈဝဵင်းသႅၼ်ဝီ၊ လႃႈသဵဝ်ႈ၊ မိူင်းမိတ်ႈ၊ ၵျွၵ်ႈမႄး၊ ၼွင်ၶဵဝ် ၸိူဝ်းၼႆႉၵေႃႈ သိုၵ်းမၢၼ်ႈ ၵႆႉ ယိုဝ်းၵွင်ႈလူင် ၵႆႉဢဝ်ၶိူင်ႈမိၼ်မႃးယိုဝ်းလႄႈ ၼႂ်းၶၢဝ်းတၢင်းၽႅၼ်ယၼ်ႇသိုၵ်း 1027 တွၼ်ႈသွင်ၼႆႉၵူၺ်း ၵူၼ်းမိူင်းတႆးပွတ်းႁွင်ႇတၢႆ ဢမ်ႇယွမ်း 500 မၢတ်ႇၸဵပ်းဢမ်ႇယွမ်း 1,000 ၊ လႆႈပၢႆႈယၢၼ်ႁိူၼ်းယေး တီႈယူႇ ၼပ်ႉႁူဝ်သႅၼ်ယဝ်ႉ။ 

ၸုမ်းသိုၵ်းၸၢဝ်းၶိူဝ်း ယိုတ်းလႆႈဝၢၼ်ႈဝဵင်း ဢိၵ်ႇတပ်ႉသိုၵ်းမၢၼ်ႈ ယူႇလၢႆဝဵင်းယဝ်ႉသေတႃႉ သိုၵ်းမၢၼ်ႈ ဢမ်ႇၶိုၼ်း ယိုတ်းလႆႈၶိုၼ်းတပ်ႉသိုၵ်းၶဝ်။

ၶၢဝ်းတၢင်း ၽႅၼ်ယၼ်ႇသိုၵ်း 1027 တင်ႈတႄႇ လိူၼ်ဢွၵ်ႊထူဝ်ႊပိူဝ်ႊ ပီ 2023 မႃး တေႃႇထိုင်ယၢမ်းလဵဝ် ၸုမ်းဢူၺ်းလီပွတ်းႁွင်ႇ ပိုတ်းယိုဝ်း ယိုတ်းလႆႈတပ်ႉသိုၵ်းမၢၼ်ႈ ၼႂ်းၸႄႈဝဵင်းလၢဝ်ႇၵၢႆး၊ ႁူဝ်ပၢင်ႇ၊ ၵုၼ်လူင်၊ ၼမ်ႉၶမ်း၊ မိူင်းမိတ်ႈ၊ မိူင်းၵုတ်ႈ၊ သႅၼ်ဝီ၊ လႃႈသဵဝ်ႈ၊ ၵျွၵ်ႉမႄးလႄႈ ၼွင်ၶဵဝ် ။ တၢင်းမိူင်းမၢၼ်ႈ ပွတ်းၵၢင်သမ်ႉ ၸုမ်း PDF ၶဝ်ယိုတ်းလႆႈ ဝဵင်းၸိၼ်ႉၵူး၊ တပဵၵ်ႉၵျိၼ်း၊ မတ်ႉတယႃႇ ၸိူဝ်းၼႆႉ။