ၼႂ်းဝူင်ႈဝၢင်ႈၼႆႉ သိုၵ်း TNLA လေႃႇတိုၵ်း တပ်ႉသိုၵ်းမၢၼ်ႈ တီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ် ပွႆႇမၢၵ်ႇသႂ်ႇႁၢဝ်ႈႁႅင်း လင်ႁိူၼ်းလႄႈ ဝတ်ႉဝၢၼ်ႈၶႃႇ ၺႃးၸၢၵ်ႇမၢၵ်ႇလူႉၵွႆ ၼမ်။

ဝၼ်းတီႈ 04/08/2024 ပူၼ်ႉမႃးၼႆႉ သိုၵ်းတဢၢင်း TNLA သိုပ်ႇလေႃႇတိုၵ်းထႅင်ႈ တပ်ႉသိုၵ်းမၢၼ်ႈ ၶမယ 501 – 502 ႁိမ်းလွႆၸဝ်ႈၶုၼ် ၾၢႆႇႁွင်ႇပွတ်းတူၵ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ သွင်ၾၢႆႇယိုဝ်းတိုၵ်းၵၼ်ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ် တိုၵ်း Y-12 မႃးပွႆႇမၢၵ်ႇၸွႆႈ ဝႃႈၼႆ။

တႄႇႁၢင် လိူၼ်ၵျူႊလၢႆႊပူၼ်ႉမႃး သိုၵ်းမၢၼ်ႈ တတ်းၶၢတ်ႇလႅင်းၾူၼ်းဝႆႉ တီႈဝဵင်းၵျွၵ်ႉမႄး၊ ၽွင်းပၢင်တိုၵ်းၼၼ်ႉ သွင်ၾၢႆႇမီးလွင်ႈမၢတ်ႇၸဵပ်းလူႉတၢႆၼမ်သေတႃႉ ႁူဝ်ၼပ်ႉတႅတ်ႈတေႃးတႄႉ ဢမ်ႇယိုၼ်ယၼ်လႆႈၼႆ ၽူႈတူင်ႉၼိုင် ၵၢၼ်သိုၵ်းၼႂ်းပိုၼ်ႉတီႈ တွပ်ႇဝႆႉတီႈသိုဝ်ႇၶၢဝ်ႇ – သူၺ်ႇၽီႇမျေႇ ၼင်ႇၼႆ။

တႄႇဝၼ်းတီႈ 25 လိူၼ်ၵျုၼ်ႊပူၼ်ႉမႃး သိုၵ်းတဢၢင်း TNLA ၶဝ်ႈလေႃႇတိုၵ်း တပ်ႉသိုၵ်းမၢၼ်ႈ တီႈဝဵင်းၵျွၵ်ႉမႄး ပၢင်တိုၵ်းႁိုင်မႃး ၶၢဝ်းတၢင်းလိူၼ်ပၢႆယဝ်ႉသေတႃႉ ပႆႇယိုတ်းလႆႈ။

ၶၢဝ်းတၢင်းၽႅၼ်ၵၢၼ်ယၼ်ႇသိုၵ်း 1027 တွၼ်ႈသွင်ၼႆႉ သိုၵ်းတဢၢင်း ပိုၼ်ၽၢဝ်ႇ ယိုတ်းၵုမ်းလႆႈဝႆႉ ဝဵင်း ၼွင်ၶဵဝ်၊ မိူင်းၵုတ်ႈလႄႈ မိူင်းမိတ်ႈ။ ယဝ်ႉၵေႃႈ သိုၵ်းၵဝ်ႈၵၢင်ႉ MNDAA ၵေႃႈ ပိုၼ်ၽၢဝ်ႇ ယိုတ်းလႆႈ ငဝ်ႈ ငုၼ်း တိူင်းသိုၵ်းၸဵင်ႇႁွင်ႇဝၼ်းဢွၵ်ႇ လႃႈသဵဝ်ႈ (ယမၶ) သေ တီႉၺွပ်းလႆႈပႃး သိုၵ်းမၢၼ်ႈ ၵၢၼ်ႉသိုၵ်းလႄႈ လုၵ်ႈလၢင်းၼၢင်းမေး သိုၵ်းမၢၼ်ႈ ၼပ်ႉႁူဝ်ႁဵင်းၵေႃႉ ဝႃႈၼႆ။