မိူဝ်ႈၼႆႉ ဝၼ်းတီႈ 05/08/2024 ယၢမ်းဝၢႆးဝၼ်းမွၵ်ႈ 3 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈႁိမ်းၵၢတ်ႇလူင် ပွၵ်ႉ 5 ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉၺႃး ၸၢႆးဢွင်ႇထီး ဢႃယုမွၵ်ႈ 40 ပီ လူႉတၢႆထင်တီႈ။

ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇၶႃႈဢေႃႈ မွၵ်ႈ 3-4 လုၵ်ႈၼႆႉဢေႃႈ ၸၢၵ်ႇမၢၵ်ႇတိူဝ်ႉၺႃး ၸၢႆးဢွင်ႇထီး ဢႃယုမွၵ်ႈ 40 ပီ လူႉတၢႆထင်တီႈ။ မိူဝ်ႈၽွင်းၼၼ်ႉ မၼ်းၸၢႆး တိုၵ်ႉၸုၵ်းယူႇၼႃႈႁိူၼ်း ၸိူင်ႉၼၼ်ၶႃႈ။ ယဝ်ႉၵေႃႈ တိူဝ်ႉၺႃး ႁိူၼ်းဢူးဢၢႆႈတွင်း လူႉၵွႆ ၸွမ်းတင်းလင်။ ႁိူၼ်းယေး ၵူၼ်းမိူင်း ဢၼ်ၺႃးၸၢၵ်ႇမၢၵ်ႇသေ လူႉၵွႆၼႆႉ တေမီး 2 လင်။ ၸွမ်းၼင်ႇ ဢၼ်လႆႈႁူႉဝႆႉ”- ဝႃႈၼႆ။

လိူဝ်ၼၼ်ႉ ၸၢၵ်ႇမၢၵ်ႇတိူဝ်ႉၺႃး ႁၢၼ်ႉၶၢႆၶူဝ်းၵုၼ်ႇ တီႈၵၢတ်ႇလူင် ဝဵင်းၵူတ်ႉၶၢႆ လူႉၵွႆၸွမ်းထႅင်ႈ မွၵ်ႈ 20 ႁၢၼ်ႉ လူႉသုမ်း ၼပ်ႉႁူဝ်ႁဵင်သႅၼ်ပျႃး ဝႃႈၼႆ။

“မၢၵ်ႇၼႆႉ တိူဝ်ႉၺႃးသႅင်ႇၶၢႆၶူဝ်း ၸွမ်းၶင်ႈတၢင်း တီႈၵၢတ်ႇလူင်ၼႆႉ လူႉၵွႆမွၵ်ႈ 20 သႅင်ႇ။ ၼိုင်ႈသႅင်ႇလၢႆ ၵႃႈၶၼ် ဢမ်ႇယွမ်း 300 သႅၼ်ပျႃး။ ပေႃးႁူမ်ႈၵၼ်တင်းမူတ်းၼႆ သုမ်းၼပ်ႉႁူဝ်ႁဵင်သႅၼ်ပျႃးၶႃႈဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈ ၼႄၼင်ႇၼႆ။

ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉၺႃးၵူၼ်းမိူင်း မၢတ်ႇၸဵပ်းထႅင်ႈ မွၵ်ႈ 5-6 ၵေႃႉ ယၢမ်းလဵဝ် ယူႇတီႈ ၸုမ်းၸွႆႈထႅမ် ပရႁိတ ဝဵင်းၵူတ်ႉၶၢႆ လႆႈတေႃႉသူင်ႇႁူင်းယႃဝႆႉ – ၵူၼ်းပိုၼ်ႉတီႈလၢတ်ႈ။