ၾူၼ်တူၵ်းႁႃႇယႂ်ႇထပ်းၵၼ်လၢႆဝၼ်း ႁဵတ်းႁႂ်ႈၼမ်ႉႁူၺ်ႈၼမ်ႉလွႆ ၼွင်းလူၵ်ႈသဵၼ်ႈတၢင်း ၼႂ်းၵႄႈပၢင်လွင်း – ဢုမ်ႇပဝ်း(ဢွင်ႇပၢၼ်း) – လွႆၶေႃ ၸိူဝ်းၼႆႉ လူႉၵွႆပုတ်းၶၢတ်ႇ ႁဵတ်းႁႂ်ႈၵူၼ်းပိုၼ်ႉတီႈ ၵႂႃႇမႃးယၢပ်ႇထူပ်းၵိၼ်းလၢႆလွင်ႈ။ သဵၼ်ႈတၢင်းဢၼ်လူႉၵွႆ ၸိူဝ်းၼၼ်ႉသမ်ႉ ပဵၼ်သဵၼ်ႈတၢင်းဢၼ် ၵူၼ်းမိူင်း လႆႈပိုင်ႈလႆႈၸႂ်ယႂ်ႇ တႃႇတေႃႉၶူဝ်းၵုၼ်ႇၵႃႉၶၢႆလႄႈ တႃႇၵႂႃႇႁႆႈၵႂႃႇသူၼ်ၸိူဝ်းၼႆႉ။
ယၢမ်းလဵဝ် ၵႂႃႇမႃးၵႃႉၶၢႆၵေႃႈ ဢမ်ႇလႆႈ သူၼ်ႁႆႈၼႃးၵေႃႈ ဢမ်ႇၸၢင်ႈၵႂႃႇလုမ်းလႃး ၵူၼ်းမိူင်းမႆႈၸႂ် ၵူဝ်ပဵၼ်ၶၢဝ်းယၢဝ်း ၵူဝ်လူႉသုမ်း မၢၵ်ႇၶဝ်ႈတဝ်ႈၼမ်ႉ ဢၼ်ၽုၵ်ႇဝႆႉ ၸိူဝ်းၼၼ်ႉၵူၺ်းယဝ်ႉ ဝႃႈၼႆ။
ႁၢင်လိူၼ်ၵျူႊလၢႆႊၼႆႉ တီႈၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၾူၼ်တူၵ်းထပ်းၵၼ် ဢမ်ႇထၢတ်ႇလၢႆဝၼ်းလႄႈ ၼႂ်းဝၼ်းတီႈ 2 ၼႆႉ ၼမ်ႉႁူၺ်ႈ၊ ၼမ်ႉလွႆ ၼွင်းလေႃႈတွင်ႈသႂ်ႇသဵၼ်ႈတၢင်း ရူတ်ႉၵႃး လူႉၵွႆၵူၼ်ႇပင်း ဢမ်ႇယွမ်း 4 တီႈ။ တီႈလွႆၼဵင်ႈ (လက်ဖက်တောင်) ႁိမ်းဝၢၼ်ႈပၢင်ၶွၼ်ၼၼ်ႉ ၼမ်ႉလွႆလေႃႈတွင်ႈ သဵၼ်ႈတၢင်းပေႃးၶၢတ်ႇၵႂႃႇ တေႃႇထိုင်ယၢမ်းလဵဝ် ၵူၼ်းပိုၼ်ႉတီႈဢမ်ႇ ၸၢင်ႈၵႂႃႇမႃး ၵူၼ်းပၢင်လွင်းၼႄဝႆႉၼင်ႇၼႆ –
“ယွၼ်ႉၾူၼ်တူၵ်းထပ်းၵၼ်လၢႆဝၼ်းလႄႈ ႁဵတ်းႁႂ်ႈၼမ်ႉလွႆ တွင်ႈသႂ်ႇသဵၼ်ႈတၢင်းၼၼ်ႉသေ ၸင်ႇၵူၼ်ႇ။ ႁဵတ်းႁႂ်ႈတၢင်းၵူၼ်ႇပင်းလူႉၵွႆ ပဵၼ်သွင်ၾင်ႇၵႂႃႇ။ တီႈၼၼ်ႈ ၵူႈပွၵ်ႈၵေႃႈ မၼ်းပဵၼ်တီႈၼမ်ႉလွႆ ၼွင်းလေႃႈသႂ်ႇႁႅင်းၵူႈပီ။ ပိူၼ်ႈႁဵတ်းဝႆႉ ႁွင်ႈတႃႇၼမ်ႉလႆယူႇ ၵူၺ်းၵႃႈ မၼ်းၵႅပ်ႈၼႃႇလႄႈ မၼ်းဢမ်ႇ ပေႉလႆႈႁႅင်းၼမ်ႉသေ ၸင်ႇထိုင်တီႈသဵၼ်ႈတၢင်းၵူၼ်ႇပင်းပုတ်းၶၢတ်ႇၸွမ်း”- ဝႃႈၼႆ။
သဵၼ်ႈတၢင်းလူႉၵွႆ ၶၢတ်ႇၵႂႃႇၼႆႉ ယၢၼ်ၵႆၵၼ် တၢင်းဝဵင်းပၢင်လွင်း 8 လၵ်း၊ ပေႃးၶီႇၵႃးၵႂႃႇ ႁိုင်ၸမ်ၶိုင်ႈ ၸူဝ်ႈမူင်း ပဵၼ်သဵၼ်ႈတၢင်းၵၢႆႇၸူး ၸႄႈမိူင်းယၢင်းလႅင် မိူၼ်ၼင်ႇ ၾၢႆၶုၼ်၊ မိူင်းပၢႆး၊ လွႆၶေႃ ၸိူဝ်းၼႆႉ။ မၢင်တီႈသဵၼ်ႈတၢင်း ဢမ်ႇၵွႆ ၵေႃႈ ပၢၼ်းတၢပ်ႈလွႆ ၵူၼ်ႇတဵင်ဝႆႉလႄႈ သဵၼ်ႈတၢင်းတၼ်ပႅတ်ႈ ၸိူဝ်းၼႆႉ မီးမွၵ်ႈ 4 တီႈ။ မိူၼ်ၼင်ႇ တီႈႁိမ်းဝၢၼ်ႈၼမ်ႉပၢၼ်းၼၼ်ႉ လိၼ်ၵူၼ်ႇသႂ်ႇ သူၼ်ၼဵင်ႈ လူႉသုမ်းပႅတ်ႈ တၢင်းသူၼ်ၵေႃႈမီး။ တၢင်းဝၢၼ်ႈထမ်ႈၽႃၵေႃႈ ၼမ်ႉၼွင်း ၶဝ်ႈၼႂ်းသူၼ် မၢၵ်ႇၶိူဝ်သူမ်ႈ၊ မၢၵ်ႇၽိတ်ႉ၊ ၶဝ်ႈၵၢပ်ႇ ၸိူဝ်းၼႆႉ။ ထုင်ႉၼႆႉ ၼမ်ႉထူမ်ႈသူၼ်ၽၵ်းၶဵဝ် မွၵ်ႈ 50 ဢေႊၶိူဝ်ႊ – ၵူၼ်းမိူင်းဝဵင်းပၢင်လွင်း လၢတ်ႈၼင်ႇၼႆ။
ၾၢႆႇၼိုင်ႈ ႁိမ်းသဵၼ်ႈတၢင်းဢၼ်လူႉၵွႆဝႆႉၼၼ်ႉ မီးဝၢၼ်ႈဢွၼ်ႇဝၢၼ်ႈဢိတ်းလၢႆဝၢၼ်ႈ၊ ဢၼ်ယႂ်ႇသေ ပိူၼ်ႈပဵၼ်ဝၢၼ်ႈပၢင်ၶွၼ်လႄႈ ဝၢၼ်ႈၶျွင်းပျွင်း၊ ၼိုင်ႈဝၢၼ်ႈလႂ် လင်ၶႃးႁိူၼ်း မီး 1,000 ပၢႆ။ ယၢမ်းလဵဝ် ၵူၼ်းဝၢၼ်ႈ ၸိူဝ်းၼၼ်ႉ ဢမ်ႇၸၢင်ႈၵႃႉၶၢႆၵႂႃႇမႃးလႄႈ ပဵၼ်ဢၼ်ယၢပ်ႇၽိုတ်ႇ၊ ၶူဝ်းၵုၼ်ႇၸႂ်ႉသွႆလႄႈ လွင်ႈၵိၼ်ယႅမ်ႉၵေႃႈ ဢမ်ႇၸၢင်ႈၵႂႃႇဢဝ်မႃးၶၢႆတေႃႇၵၼ်။
မီးတၢင်းလတ်း ယူႇသေတႃႉ ပဵၼ်တၢင်းထိူၼ်ႇလႄႈ ၵႂႃႇမႃးယၢပ်ႇ၊ ရူတ်ႉၵႃးဢမ်ႇၸၢင်ႈၵႂႃႇ၊ ရူတ်ႉၶိူင်ႈ ၵူၺ်းၵႂႃႇလႆႈ၊ တႃႇတေႃႉၶူဝ်းၸႂ်ႉၼႂ်းသူၼ် ၼႂ်းၼႃးသႅၼ်းယႂ်ႇသႅၼ်းၼၵ်းသမ်ႉ ဢမ်ႇလႆႈ။ ပိူင်လူင်ပဵၼ် တၢင်းထိူၼ်ႇလႄႈ ၵူဝ်ယဵပ်ႇၺႃးမၢၵ်ႇမႅင်းၾင်လိၼ်လႄႈ မၢၵ်ႇမိုဝ်ႈၸိုၼ်းယၢမ်း ဢၼ်ၵိုတ်းဝႆႉ ၽွင်းပၢင်တိုၵ်းၸိူဝ်းၼၼ်ႉၵူၺ်းယဝ်ႉၼႆ ၵူၼ်းပၢင်လွင်းသိုပ်ႇလၢတ်ႈၼႄၼင်ႇၼႆ –
“သဵၼ်ႈတၢင်းလတ်းတႄႉ တေမီးယူႇ 3 သဵၼ်ႈၼႆႉ ၵူၺ်းၵႃႈ ရူတ်ႉၶိူင်ႈၵူၺ်း ဢၼ်ၵႂႃႇလႆႈ။ တႃႇတေ တေႃႉၶူဝ်းၵုၼ်ႇလႄႈသင် တႃႇတေႃႉၸိူဝ်းၽၼ်းလႄႈ လိၼ်ပုၺ် ၸိူဝ်းၼႆႉတႄႉ ယၢပ်ႇဢေႃႈ။ ယၢမ်းလဵဝ် ပဵၼ်ၶၢဝ်းတႃႇလုမ်းလႃး တူၼ်ႈမၢၵ်ႇၶိူဝ်သူမ်ႈ၊ မၢၵ်ႇၽိတ်ႉလႄႈ ၶဝ်ႈၵၢပ်ႇ ၸိူဝ်းၼႆႉ။ ပဵၼ်ၶၢဝ်း လူဝ်ႇသိတ်ႇယႃ ၶႃႈမႅင်းလႄႈသင် ၾုၼ်ႇထၢတ်ႈ ၸိူဝ်းၼႆႉ။ သဵၼ်ႈတၢင်းသမ်ႉ မႃးလူႉၵွႆၸိူင်ႉၼႆ ယၢပ်ႇတႃႇ တေႃႉၶိူင်ႈၸႂ်ႉၶူဝ်းသွႆၵႂႃႇၼႂ်းသူၼ်ယဝ်ႉၶႃႈ”- ဝႃႈၼႆ။
ၼႂ်းၸႄႈဝဵင်းပၢင်လွင်းၼႆႉ ယွၼ်ႉလွႆၵူၼ်ႇတဵင်ထူမ်ႈတၢင်းလၢႆတီႈ မိူၼ်ၼင်ႇ သဵၼ်ႈတၢင်း ၵႂႃႇၸူးၼေႇပျီႇတေႃႇလႄႈ သဵၼ်ႈတၢင်းၵႂႃႇၸူး ၸႄႈမိူင်းယၢင်းလႅင် ၸိူဝ်းၼႆႉ ႁဵတ်းႁႂ်ႈၵူၼ်းၸိူဝ်းမီးၵၢၼ် ၶိုၵ်ႉၶၵ်ႉ လူဝ်ႇၵႂႃႇမႃးထူပ်းတၢင်းယၢပ်ႇ။ ဢၼ်ၵိၼ်းၸႂ်သုတ်းၵေႃႈ တေပဵၼ်ၵူၼ်းပၢႆႈၽေးသိုၵ်းလႄႈ ၵူၼ်းပၢႆႈၽေးၼမ်ႉ တၢင်းၸႄႈမိူင်းယၢင်းလႅင် ၸိူဝ်း ၼၼ်ႉ ဢၢၼ်းပၢႆႈမႃးတၢင်းဝဵင်းပၢင်လွင်းၵေႃႈ ယၢမ်းလဵဝ် သဵၼ်ႈတၢင်းလူႉၵွႆလႄႈ ၵိုတ်းၶမ်ဝႆႉပွတ်းတၢင်းၵေႃႈ မီးၼႆ – ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ