သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO  ယိုဝ်းမၢၵ်ႇသႂ်ႇ ငဝ်ႈငုၼ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ဢၼ်မီးတီႈၸႄႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်း ၵူၼ်းမိူင်းမႆႈၸႂ် လွင်ႈႁူမ်ႇလူမ်ႈသေ ဢွၼ်ၵၼ်ပၢႆႈၽေးသိုၵ်းထႅင်ႈ။

ဝၼ်းတီႈ 03/08/2024 ၼႆႉ ပၢင်တိုၵ်းဢမ်ႇပဵၼ်သေ သိုၵ်းမၢၼ်ႈတင်း တပ်ႉသိုၵ်းၵူၼ်းမိူင်း ပျီႇတူႉၸိတ်ႉပဢူဝ်း PNO ယိုဝ်းၵွင်ႈလူင် ဢမ်ႇယွမ်း 10 ၵမ်း တူၵ်းသႂ်ႇႁိမ်းဝၢၼ်ႈပၢင်မိူတ်ႇ ၸႄႈဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်း ၸၢၼ်း။

ၵူၼ်းမိူင်း ၼႂ်းဝဵင်းသီႇသႅင်ႇ (ဢၼ်ယၢၼ်ၵႆၵၼ်တင်း ဝဵင်းမွၵ်ႇမႆႇမွၵ်ႈ 69 လၵ်း) ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၶႃႈႁဝ်းၶဝ် မႃးယူႇႁိူၼ်းပႆႇႁိုင် ပေႃးလႆႈပၢႆႈထႅင်ႈယဝ်ႉ။ မိူဝ်ႈဢမ်ႇမႃးယူႇႁိူၼ်းၵေႃႈ ဝႃႈတေသိမ်း ႁိူၼ်းယေး၊ ၽိူဝ်ႇမႃးယူႇႁိူၼ်းၶိုၼ်းၵေႃႈ ဢမ်ႇမီးလွင်ႈ ႁူမ်ႇလူမ်ႈ၊ တေပၢႆႈၵႂႃႇတၢင်းလႂ်ထႅင်ႈၵေႃႈ လႆႈဝူၼ်ႉ ယၢပ်ႇ၊ ၼမ်ႉမၼ်းၸၢၵ်ႈၵေႃႈ လႆႈသိုဝ်ႉယၢပ်ႇၼႃႇ ဢမ်ႇၸၢင်ႈႁဵတ်းႁိုဝ်”- ဝႃႈၼႆ။

ဢိင်ၼိူဝ် ပၢင်တိုၵ်း ၼႂ်းၵႄႈသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်းတင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ဢၼ်ပဵၼ်မိူဝ်ႈႁူဝ်ပီၼႆႉသေ ၵူၼ်းမိူင်းဝဵင်းသီႇသႅင်ႇ ဢွၼ်ၵၼ်ပၢႆႈၽေးသိုၵ်းၵႂႃႇယူႇတၢင်ႇ တီႈႁိုင်မွၵ်ႈ 3 လိူၼ်။  

သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO တဵၵ်းႁႂ်ႈမႃးယူႇႁိူၼ်းၶိုၼ်းလႄႈ ၵမ်ႈၽွင်ႈ ၸင်ႇႁႃပွၵ်ႈမႃးလႆႈ မွၵ်ႈ 3 လိူၼ်ၵူၺ်း။

ယၢမ်းလဵဝ် သဵင်ၵွင်ႈသဵင်မၢၵ်ႇၶိုၼ်းမေႃးလႄႈ ၵူၼ်းမိူင်းၼႂ်းဝဵင်းသီႇသႅင်ႇၵေႃႈ ဢွၼ်ၵၢၼ် မႆႈၸႂ်လွင်ႈႁူမ်ႇလူမ်ႈသေ ဢွၼ်ၵၼ်ၵဵပ်းၶူဝ်းၵဵပ်းလဵင်း ၶိုင်တႃႇပၢႆႈၽေးသိုၵ်းထႅင်ႈယူႇ။

ၽွင်းငဝ်းလၢႆး ၵူၼ်းမိူင်းတူၵ်းၸႂ်သဵင်ၵွင်ႈသဵင်မၢၵ်ႇသေ ပၢႆႈယူႇၼႆႉ သိုၵ်းမၢၼ်ႈသမ်ႉ သင်ႇႁၢမ်ႈဝႆႉ ဢမ်ႇပၼ်ၵူၼ်းမိူင်းၶဝ်ႈ/ ဢွၵ်ႇဝဵင်း ၶၢဝ်းယၢမ်းၵၢင်ၶမ်ႈ 6 မူင်းထိုင် ၵၢင်ၼႂ် 6 မူင်း။

ၸဝ်ႈတူၼ်ၶူး ၽူႈၼင်ႈၵျွင်း တီႈဝဵင်းသီႇသႅင်ႇ ၸဝ်ႈၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းၵူႈၵေႃႉတႄႉ သေးလၢႆ သၢႆ ၸႂ်ၽႂ်မၼ်းၼေႃ၊ မၢင်ၸိူဝ်းၵေႃႈ ဢမ်ႇမီးငိုၼ်း ဢမ်ႇမီးရူတ်ႉၵႃး တႃႇပၢႆႈ၊ ပေႃးပၢႆႈယဝ်ႉၵေႃႈ ၶဝ်တေၵႂႃႇႁဵတ်းၵိၼ်သင် လႆႈမႆႈၸႂ်ထႅင်ႈတင်းၼိုင်ႈ ယွၼ်ႉၼၼ် မၢင်ၸိူဝ်းၵေႃႈ လႆႈပႂ်ႉတူၺ်းငဝ်းလၢႆး ၵွၼ်ႇ”- ဝႃႈၼႆ။

ယၢမ်းလဵဝ် ၼႂ်းဝဵင်းသီႇသႅင်ႇၼႆႉ ဢမ်ႇမီးပၢင်တိုၵ်း ပိုတ်းယိုဝ်းၵၼ်သေတႃႉ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ ၸႂ်ႉ ၵူၼ်းမိူင်းငိူင်ႉပၢႆႈဝႆႉ ဝႃႈၼႆသေတႃႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈတႄႉ ဢမ်ႇလႆႈၶေႃႈယိုၼ်ယၼ် တီႈၸုမ်းသိုၵ်းၼႂ်းပိုၼ်ႉတီႈ။

တီႈဝဵင်းသီႇသႅင်ႇၼႆႉ ယၢမ်းလဵဝ် မီးၸုမ်းသိုၵ်းမၢၼ်ႈတင်း ပျီႇတူႉၸိတ်ႉ PNO လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပ ဢူဝ်း PNLA တူင်ႉၼိုင်ဝႆႉ။

ပၢင်တိုၵ်း ၼႂ်းၵႄႈသိုၵ်းပဢူဝ်း သွင်ၸုမ်းၼႆႉ တႄႇမႃးမိူဝ်ႈ လိူၼ်ၵျႅၼ်ႊၼိဝ်ႊရီႊ ဝၼ်းတီႈ 21 ။ ၽွင်းၼၼ်ႉ သိုၵ်းမၢၼ်ႈလႄႈ ပျီႇတူႉၸိတ်ႉ PNO ႁႄႉႁၢမ်ႈ ရူတ်ႉၵႃး တၢင်ႇမၢၵ်ႇမိုဝ်ႈၸိုၼ်းယၢမ်း သိုၵ်းပဢူဝ်း PNLA တီႈဝၢၼ်ႈၸၢမ်ၵႃး ထုင်ႉလွႆမႆႇ(မဲနယ်တောင်) ၾၢႆႇ PNLA သမ်ႉ ဢမ်ႇၵိုတ်းပၼ်လႄႈ တႄႇယိုဝ်းၵၼ်မႃး။ ပၢင်တိုၵ်း ပဵၼ်ထိုင်ၼႂ်းဝဵင်း သိုၵ်းမၢၼ်ႈ ဢဝ်ၶိူင်ႈမိၼ်သိုၵ်း မႃးယိုဝ်းၼႂ်းဝဵင်း၊ ၵူၼ်းမိူင်းဝဵင်းသီႇသႅင်ႇ ၶိုင်ႈပၢႆ လႆႈပၢႆႈၽေးသိုၵ်း။

 တႅမ်ႈ- ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)