ၼမ်ႉသၢႆလူၼ်ႉၾင်ႇ ၼွင်းလုပ်ႇထူမ်ႈ ၼႂ်းဝဵင်းတႃႈၶီႈလဵၵ်း ႁၢဝ်ႈႁႅင်းထႅင်ႈ တုမ်ႉတိူဝ်ႉၶူဝ်းၶွင် ၵူၼ်းမိူင်း လူႉသုမ်းၼမ် ဝႃႈၼႆ။

တႄႇဢဝ် ႁူဝ်လိူၼ်ဢေႃႊၵတ်ႊသ်ၼႆႉမႃး ၼမ်ႉသၢႆ လုပ်ႇၼွင်းထူမ်ႈ ၼႂ်းပွၵ်ႉသၼ်သၢႆတႆး၊ ပုင်းထုၼ်၊ မႄႈၶၢဝ်လႄႈ ဢွင်ႈတီႈၶူင်ႈယၢၼ်း ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ယွၼ်ႉၾူၼ်တူၵ်း ထပ်းၵၼ်မႃးလၢႆဝၼ်း ဝႃႈၼႆ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉသၢႆ ၼွင်းထူမ်ႈၵမ်းၼႆႉ ႁိုင်မွၵ်ႈ 4 ဝၼ်း ဢေႃႈ။ လွင်ႈလူႉသုမ်းတႄႉ ၼမ်တႄႉၶႃႈ။ မိူၼ်ၼင်ႇ ၶူဝ်းႁိူၼ်းယေး ဢမ်ႇၸၢင်ႈၶၢႆႉၶိုၼ်ႈတီႈသုင် ၸိူဝ်း ၼႆႉ။ ယဝ်ႉၵေႃႈ ၼမ်ႉထူမ်ႈရူတ်ႉၵႃး – ရူတ်ႉၶိူင်ႈ ၸိူဝ်းၼႆႉၵေႃႈ မီးၼမ်ၼႃႇၶႃႈ ၸွမ်းၼင်ႇႁဝ်းၶႃႈႁူႉတႄႉ။ တီႈၵၢတ်ႇတႃႈလေႃႉတႄႉ ယၢမ်းလဵဝ် ပိၵ်ႉဝႆႉဢေႃႈ။ ၶူဝ်းၶွင်တႄႉ ဢမ်ႇပေႃးလူႉသုမ်းၼမ်ၶႃႈ ပိူၼ်ႈႁၼ် ၾူၼ်တူၵ်းဢမ်ႇၵိုတ်းလႄႈ ၼႅတ်ႈဢွၼ် ၵၼ်ၶၢႆႉၶူဝ်းဝႆႉတီႈသုင် ဢွၼ်တၢင်းယဝ်ႉ ယွၼ်ႉပိူၼ်ႈယၢမ်ႈထူပ်း မႃး မိူဝ်ႈပီဢွၼ်ပူၼ်ႉယဝ်ႉလႄႈ”- ဝႃႈၼႆ။

ဝၼ်းတီႈ 4 ၼႆႉ ၼမ်ႉသၢႆ ယွမ်းလူင်းယဝ်ႉသေတႃႉ ၵူၺ်းၵႃႈ ၼႂ်ၼႆႉ ဝၼ်းတီႈ 5 ၾူၼ်တေတူၵ်းထႅင်ႈလႄႈ ၵူၼ်းပိုၼ်ႉတီႈ ဢွၼ်ၵၼ်မႆႈၸႂ်ဝႆႉ ၵူဝ်ၼမ်ႉသၢႆ လူၼ်ႉၾင်ႇၼွင်းထူမ်ႈထႅင်ႈ ဝႃႈၼႆ။

“ပူၼ်ႉမႃးၼႆႉ ၼမ်ႉထူမ်ႈႁႅင်း မၢင်တီႈ လိုၵ်ႉထိုင်ၶႃလူင်၊ ပဵင်းဢႅဝ် ၸိူဝ်းၼႆႉဢေႃႈ။ ယွၼ်ႉတေႃႈၼမ်ႉ တၼ်ယုၵ်းယၢၵ်းၶမ်တေႃႈဢေႃႈ။ မိူၼ်ၼင်ႇ တီႈပွၵ်ႉသၼ်သၢႆးၼႆႉ ၼမ်ႉႁွင်ႈလႆ ၸွမ်းၼႂ်းပွၵ်ႉ ပေႃးဢမ်ႇ မီးယဝ်ႉ။ ပေႃးမီးၵေႃႈ တိုၼ်ႈတၼ်မူတ်းယဝ်ႉ။ ၵွပ်ႈၼႆလႄႈ သင်ၼမ်ႉၾူၼ်၊ ၼမ်ႉသၢႆ ၼွင်းမႃးၼႆ ယွၼ်ႉ ဢမ်ႇမီးႁွင်ႈၼမ်ႉလႆလႆႈလီလီလႄႈ ၼမ်ႉၸင်ႇထူမ်ႈႁႅင်းၼၼ်ႉၶႃႈယဝ်ႉ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼမ်ႉသၢႆ ၼွင်းထူမ်ႈ ၸိူင်ႉၼႆၼႆႉ ဢမ်ႇၵႃး တၢင်းၾင်ႇတႃႈၶီႈလဵၵ်းၼႆႉၵူၺ်း ယဝ်ႉၵေႃႈ တၢင်းၾင်ႇဝဵင်းမႄႈသၢႆ ၸိုင်ႈထႆး ၼၼ်ႉၵေႃႈ ၼမ်ႉသၢႆၼွင်းထူမ်ႈ ႁၢဝ်ႈႁႅင်းမိူၼ်ၵၼ် ဝႃႈၼႆ။

ၵဵဝ်ႇလူၺ်ႈ လွင်ႈၼမ်ႉသၢႆ ၼွင်းထူမ်းၼႆႉ ပွၵ်ႈၼႆႉ ဢမ်ႇၸႂ်ႈပဵၼ်ပွၵ်ႈႁႅၵ်ႈ ပေႃးထိုင်ၶၢဝ်းႁိုတ်ႉၶၢဝ်းၾူၼ် မႃးၸိူင်ႉၼႆ ၵူႈပီၸိုင် ၼမ်ႉသၢႆၼႆႉ ၵႆႉလုပ်ႇထူမ်ႈ ၸိူင်ႉၼႆမႃး ၵူႈပီယဝ်ႉ ယွၼ်ႉႁွင်ႈၼမ်ႉသၢႆ ၵႅပ်ႈတိုၼ်ႈ ၵေႃႈ ပိူင်ၼိုင်ႈ၊ ယုၵ်းယၢၵ်း ၵိုတ်းၶမ်ၵေႃႈ ပိူင်ၼိုင်ႈ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 18/06/2024 ၼၼ်ႉ ယူႇတီႈ ၶွမ်ႊမတီႊ လႅၼ်လိၼ်ထႆး – မၢၼ်ႈ ႁူပ်ႉဢုပ်ႇဢူဝ်းၵၼ် လွင်ႈပၼ်ႁႃ ၸွမ်းလႅၼ်လိၼ် တီႈႁူင်းႁႅမ်း 1G1 ဝဵင်းတႃႈၶီႈလဵၵ်း ၼႆႉသေ ၼႂ်းပၢင်ၵုမ်ၼၼ်ႉ လႆႈဢုပ်ႇဢူဝ်းပႃး တႃႇၵႄႈလိတ်ႈပၼ်ႁႃ လွင်ႈၼမ်ႉသၢႆ ၼွင်းထူမ်ႈၼႆႉပႃး ဝႃႈၼႆ။