သိုၵ်းမၢၼ်ႈ ယိုတ်းမိူင်း ၼင်ႇၵၼ် ယိုဝ်းၽိတ်းၵၼ်ၶိုၼ်း တီႈဝဵင်းမိူင်းယႆ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလႄႈ သိုၵ်းမၢၼ်ႈ မၢတ်ႇၸဵပ်းၸွမ်း ၵမ်ႈၽွင်ႈ။
ဝၼ်းတီႈ 04/08/2024 ယၢမ်းၵၢင်ဝၼ်း 11 မူင်းၶိုင်ႈ သိုၵ်းမၢၼ်ႈ တူၺ်းၽိတ်းၵၼ်သေ ယိုဝ်းမႅၼ်ႈၵၼ်ၶိုၼ်း တီႈၼႃႈ ႁူင်းယႃ ဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၺႃး ၵူၼ်းမိူင်းမၢတ်ႇၸဵပ်း 1 ၵေႃႉလႄႈ သိုၵ်းမၢၼ်ႈထႅင်ႈ 3 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “ၵႃးသိုၵ်းမၢၼ်ႈ 3 လမ်း ႁႅင်းၵူၼ်း 50 ပၢႆ လုၵ်ႉတၢင်းႁူဝ်ယ မႃးၵိုတ်းၵႃးၶဝ် ၾၢႆႇၼႃႈႁူင်းယႃ မိူင်းယႆ။ သိုၵ်းမၢၼ်ႈ ဢၼ်ယူႇဝႆႉ တီႈၼႂ်းၵျွင်းပီႇၺႃႇမၢၼ်ႇၼၼ်ႉ မီးႁႅင်းၵူၼ်းၶဝ် မွၵ်ႈ 7 ၵေႃႉ။ လႅပ်ႈၶဝ် တေဢမ်ႇပွင်ႇၶၢဝ်ႇၸူးၵၼ်ႁိုဝ်ဢမ်ႇႁူႉ တူၺ်းၽိတ်းၵၼ်သေ တူၵ်းၸႂ်ယိုဝ်းၵၼ်ၶိုၼ်း။ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇ 1 ၵေႃႉ ယဝ်ႉၵေႃႈ ၵူၼ်းသိုၵ်းမၢၼ်ႈ ၶဝ်မၢတ်ႇထႅင်ႈ 3 ၵေႃႉၶႃႈ”- ဝႃႈၼႆ။
မိူဝ်ႈဝၼ်းတီႈ 3 ယၢမ်းၵၢင်ၼႂ် 8:12 မူင်း ၵႃးသိုၵ်းမၢၼ်ႈ 5 လမ်း ၵူၼ်းသိုၵ်းတဵမ်ၵႃးသေ လုၵ်ႉၼႂ်းတပ်ႉဝၢၼ်ႈၵၢတ်ႈ ၵႂႃႇတၢင်းမိူင်းပၢတ်ႇ – လွႆပၢင် ၸႄႈဝဵင်းတၢင်ႉယၢၼ်း။ ထိုင်မႃး ယမ်းၵၢင်ၼႂ် 8:48 မူင်းသမ်ႉ ၵႃးသိုၵ်းမၢၼ်ႈ မွၵ်ႈ 20 လမ်း ၸဵမ်ၵူၼ်းသိုၵ်း၊ မၢၵ်ႇမိုဝ်ႉၸိုၼ်းယၢမ်း တဵမ်ၵႃးသေ လုၵ်ႉတၢင်းဝၢၼ်ႈပုင်ႇ ၶဝ်ႈၸူးဝဵင်းမိူင်းယႆ ၼႆယဝ်ႉ။
“မိူဝ်ႈဝၼ်းတီႈ 3 ၼၼ်ႉ ၸုမ်းယိပ်းၵွင်ႈ ယူႇတၢင်းမိူင်းပၢတ်ႇ ယိုဝ်းသႂ်ႇ တီႈမိူင်းယႆၼႆႉ လၢႆၵမ်းဢေႃႈ။ လႅပ်ႈပဵၼ်သိုၵ်းဝႃႉ ယိုဝ်းမႃးႁိုဝ် ဢမ်ႇႁူႉ ယွၼ်ႉဝႃႈ သၢႆတၢင်းပုၼ်ႉ ပဵၼ်ၶဝ်တူင်ႉၼိုင်ဝႆႉလႄႈ ၼႂ်းဝၼ်းတီႈ 3 – 4 ၼႆႉ တီႈဢိူင်ႇႁူဝ်ယ ၼႆႉ သဵင်ၵွင်ႈတႅၵ်ႇၶိုၼ်းဢေႃႈ”- ၵူၼ်းပိုၼ်ႉတီႈ ဝဵင်းမိူင်းယႆ သိုပ်ႇလၢတ်ႈၼႄၼင်ႇၼႆ။
မိူဝ်ႈၼႆႉ ဝၼ်းတီႈ 5 ယၢမ်းၵၢင်ၼႂ်ၸဝ်ႉမွၵ်ႈ 2 မူင်း မၢၵ်ႇလူင်တူၵ်းသႂ်ႇ ၼႂ်းဢိူင်ႇႁူဝ်ယ ဝဵင်းမိူင်းယႆထႅင်ႈ ဢိင်ၼိူဝ်လွင်ႈၼႆႉ ပႆႇလႆႈႁူႉႁူဝ်ယွႆႈ လွင်ႈလူႉသုမ်းသင် ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 07/07/2024 သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA သွင်ၾၢႆႇပိုတ်း ယိုဝ်းၵၼ်သေ ႁဵတ်းႁႂ်ႈမၢၵ်ႇလူင် တူၵ်းသႂ်ႇႁိူၼ်းၵူၼ်းဝၢၼ်ႈလူင် ၼႂ်းဢိူင်ႇႁူဝ်ယ ၾႆးမႆႈလူႉၵွႆ 2 လင် ၼႆယဝ်ႉ။
ၼႂ်းၸႄႈဝဵင်းမိူင်းယႆၼႆႉ ပဵၼ်ပိုၼ်ႉတီႈ ၶွင်တပ်ႉသိုၵ်းတႆး SSPP ၵုမ်းၵမ် တူင်ႉၼိုင်ယူႇဝႆႉ။ မိူဝ်ႈဝၼ်းတီႈ 13 လိူၼ် ၵျူႊလၢႆႊၼၼ်ႉ သိုၵ်း SSPP ၶဝ်ႈဢဝ်တီႈယူႇ တူင်ႉၼိုင်ဝႆႉ ၼႂ်းဝဵင်းၼပ်ႉႁူဝ်ႁဵင် ထႅဝ်ရူတ်ႉၵႃးသိုၵ်း ပၵ်းတုင်း SSPP သေ လတ်းၵၢင်ဝဵင်းမႃး။ ၵူၺ်းၵႃႈ တေႃႇထိုင်ယၢမ်းလဵဝ်ၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ တိုၵ်ႉယိုဝ်းၵၼ်ယူႇ ထိုင်တီႈတုမ်ႉတိူဝ်ႉၵူၼ်းမိူင်း လူႉတၢႆၵေႃႉၼိုင်ႈ ဝႃႈၼႆ။
