ပၢင်တိုၵ်း သိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တိုၵ်ႉသိုပ်ႇပဵၼ်ထႅင်ႈပႆႇယဝ်ႉပႆႇတူဝ်ႈ လႄႈ ဝၼ်းတီႈ 01/08/2024 မိူဝ်ႈဝႃး ယၢမ်းၵၢင်ဝၼ်း မၢၵ်ႇလူင်တူၵ်းသႂ်ႇ ႁူင်းယႃတပ်ႉသိုၵ်း မၢႆ 9 (အမှတ် ၉ ကုတင် ၁၀၀ ဆန့်ဆေးရုံ) ၵူၼ်းတီႈႁူင်းယႃ မၢတ်ႇၸဵပ်းလူႉတၢႆ ဢမ်ႇယွမ်း 30 ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၸုမ်းၵူၼ်းၼုမ်ႇၶႄႇ ဢၼ်ယူႇဝႆႉၼႂ်းဝဵင်းလႃႈသဵဝ်ႈတႄႉ လၢတ်ႈဝႆႉဝႃႈ – “ၸႂ်ႈၶႃႈဢေႃႈ မိူဝ်ႈဝႃး ၼႆႉ မၢၵ်ႇလူင်တူၵ်းသႂ်ႇ တီႈႁူင်းယႃလူင်ဝဵင်းလႃႈသဵဝ်ႈဢေႃႈ။ ပဵၼ်မၢၵ်ႇလူင်သႅၼ်းၼမ်ႉၼၵ်း 500 ပွင်ႇ(ပွၼ်ႊ) လုၵ်ႈ ၼိုင်ႈလႄႈ မၢၵ်ႇလူင် RPG  ထႅင်ႈ 3 လုၵ်ႈ။ ၵူၼ်းၸိူဝ်းဢၼ်မီးဝႆႉၼႂ်းႁူင်းယႃၼၼ်ႉတႄႉ တၢႆၼမ်ၶႃႈဢေႃႈ မၢတ်ႇၸဵပ်း လႄႈလူႉတၢႆ တေဢမ်ႇယွမ်း 30 ၶႃႈ။ မၢၵ်ႇဢၼ်ယိုဝ်းမႃးၼႆႉ လႅပ်ႈတေပဵၼ်မၢၵ်ႇၸုမ်း သိုၵ်းၵဝ်ႈၵၢင်ႉ MNDAA ၶဝ်ၶႃႈ ဢေႃႈ”- ဝႃႈၼႆ။

ၶၢဝ်ႇ Eleven Media ၶွင်ၸုမ်းသိုၵ်းမၢၼ်ႈၵေႃႈတႅမ်ႈ တၢင်ႇဝႆႉဝႃႈ သိုၵ်းၵဝ်ႈၵၢင်ႉ MNDAA ပိုတ်းယိုဝ်း ႁူင်းယႃတပ်ႉသိုၵ်းယူႇ 2-3 ဝၼ်းယဝ်ႉ။ လိုၼ်းသုတ်း ယိုဝ်းမၢၵ်ႇလူင်သႂ်ႇ ႁဵတ်းႁႂ်ႈႁူင်းယႃပေႃးလူႉၵွႆ၊ ၵူၼ်းလႆႈတၢႆ 30 ပၢႆ။ ပဵၼ်ၵူၼ်း မိူင်းပိုၼ်ႉတီႈလႄႈ ၵူၼ်းၼႂ်းတပ်ႉသိုၵ်း ဢၼ်ဢမ်ႇယူႇလီသေ ယူတ်းယႃတူဝ်ဝႆႉ၊ ၵူၼ်းၸိူဝ်းမၢတ်ႇၸဵပ်းႁႅင်း ၵေႃႈမီး၊ ၼႂ်ၼႆႉ ဝၼ်းတီႈ 02/08/2024 ၼႆႉ လႆႈၶၢႆႉဝႆႉတီႈ လွတ်ႈလႅဝ်းယဝ်ႉဝႃႈၼႆသေတႃႉ လွင်ႈမၢတ်ႇၸဵပ်းလူႉတၢႆလႄႈ ႁူဝ် ယွႆႈမၼ်းတႄႉ ပႆႇလႆႈႁူႉတႅတ်ႈတေႃးတႅမ်ႈဝႆႉ ၼင်ႇၼႆ။

ၸုမ်းၵူၼ်းၼုမ်ႇၶႄႇၼၼ်ႉ လၢတ်ႈထႅင်ႈဝႃႈ ဢၼ်ႁူႉဝႆႉသဵၼ်ႈမၢႆတႄႉ ၼႂ်းဢၼ်လူႉတၢႆၼၼ်ႉ ပႃးမႄႈလႄႈ လုၵ်ႈ ဢွၼ်ႇလႅင် ဢၼ်တိုၵ်ႉၵိူတ်ႇမႂ်ႇမႂ်ႇ 4 ၵူႈ၊ ၵူၼ်းထဝ်ႈလႄႈ လုၵ်ႈဢွၼ်ႇ ဢၼ်မႃးယူတ်းယႃတူဝ်လႄႈ မႃးပၢႆႈၽေးဝႆႉ 12 ၵေႃႉ၊ မုၼ်ၸဝ်ႈ 1 ပႃး ၊ မေႃယႃလူင် 1 ၵေႃႉလႄႈ မေႃယႃဢွၼ်ႇ 7 ၵေႃႉ၊ ပဵၼ်တင်းၵူၼ်းမိူင်းလႄႈ လုၵ်ႈမေးၵူၼ်းသိုၵ်း – ဝႃႈၼႆဝႆႉ။

ၵဵဝ်ႇလူၺ်ႈလွင်ႈၼႆႉ ၾၢႆႇသိုၵ်းမၢၼ်ႈလႄႈ တင်းသိုၵ်းၵဝ်ႈၵၢင်ႉ ပႆႇပိုၼ်ၽၢဝ်ႇသင်ပဵၼ်တၢင်းၵၢၼ်။

တေႃႇထိုင်ယၢမ်းဝၢႆးဝၼ်း 3 မူင်းၶိုင်ႈၼႆႉ တီႈဝဵင်းလႃႈသဵဝ်ႈ ပၢင်တိုၵ်းတိုၵ်ႉတႅၵ်ႇၼၼ်ႈ ပႆႇယဵၼ်။ ၼႂ်းတိူင်းသိုၵ်းယမၶ ၵေႃႈ တိုၵ်ႉမီးလွင်ႈပိုတ်းယိုဝ်းၵၼ်ယူႇ ဝႃႈၼႆ။

ပၢင်တိုၵ်းတီႈဝဵင်းလႃႈသဵဝ်ႈၼႆႉ မီးမႃးၶၢဝ်းတၢင်း 1 လိူၼ်ပၢႆယဝ်ႉသေတႃႉ ပႆႇယဝ်ႉပႆႇတူဝ်ႈ။ ၵူၼ်းမိူင်းၸိူဝ်းလႆႈတိူဝ်ႉ ၺႃးၸၢၵ်ႇမၢၵ်ႇသေလူႉတၢႆၵေႃႈ ဢမ်ႇယွမ်း 130 ၵေႃႉယဝ်ႉ။ ႁိူၼ်းယေးၵူၼ်းမိူင်း ႁူင်းႁႅမ်းလႄႈ ၵၢတ်ႇလူင်ၺႃးၸၢၵ်ႇ မၢၵ်ႇလူႉၵွႆ။ မၢၵ်ႇလူင်တူၵ်းဝႆႉ ၵၢင်ဝဵင်းၵေႃႈ ဢမ်ႇမီးၽႂ်ၽဵဝ်ႈပၼ်။ ထႅဝ်သိုၵ်းၵဝ်ႈၵၢင်ႉတႄႉ ယူႇယူႇ ပၼ်ႇလဵပ်ႈၸွမ်း ၵၢင်ဝဵင်းပဵၼ်တီႈ။ ၵူၼ်းမိူင်း 90 % တႄႉ ပၢႆႈယၢၼ်ဢွၵ်ႇဝဵင်းသေ ၵႂႃႇသွၼ်ႈယူႇသဝ်းဝႆႉၸွမ်းပီႈၽႂ် ၼွင်ႉမၼ်းတၢင်ႇ တီႈတၢင်ႇဝဵင်း။