ၵူၼ်းတူၼ်ႈတီး ႁႄႇၵၼ်ၶဝ်ႈထႅဝ် ပႂ်ႉသိုဝ်ႉၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) တီႈပၢမ်ႉၼမ်ႉမၼ်း ၵိုၼ်းၶွၼ်ႈသတ်ႉၼႅၼ်ႈ ဝႃႈၼႆ။

တႄႇဢဝ် ဝၼ်းတီႈ 30/07/2024 ၼၼ်ႉမႃး ႁၢၼ်ႉတေႃႇထိုင် မိူဝ်ႈၼႆႉ ဝၼ်းတီႈ 02/08/2024 ၵူၼ်းမိူင်း ဢွၼ်ၵၼ် ၵႂႃႇၶဝ်ႈထႅဝ် ပႂ်ႉသိုဝ်ႉၼမ်ႉမၼ်းၸၢၵ်ႈ တီႈပၢမ်ႉၼမ်ႉမၼ်း BOC ၼႂ်းဝဵင်းတူၼ်ႈတီး ၸိုင်ႈတႆး ပွတ်းၸၢၼ်း လႆႈပႂ်ႉႁိုင် ၼပ်ႉၸူဝ်ႈမူင်းမၼ်း ဝႃႈၼႆ။

ၵူၼ်းပိုၼ်ႉတီႈ ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၶၢဝ်းတၢင်း 3-4 ဝၼ်းမႃးၼႆႉ တီႈဝဵင်းတူၼ်ႈတီးၼႆႉ ၵူၼ်းမိူင်း လႆၵၼ်ၵႂႃႇ သႂ်ႇၼမ်ႉမၼ်းရူတ်ႉၵၼ် ထႅဝ်ပေႃးယၢဝ်းလူင်ဝႆႉဢေႃႈ။ မၢင်ၸိူဝ်း လုၵ်ႉၵႂႃႇပႂ်ႉၶဝ်ႈထႅဝ် 4 မူင်းၵၢင်ၼႂ် 5 မူင်းၵၢင်ၼႂ်ၵေႃႈ မီးဢေႃႈ။ ပၢမ်ႉၼမ်ႉမၼ်းသမ်ႉ ပိုတ်ႇ 10 မူင်းၵၢင်ၼႂ်လႄႈ ၼပ်ႉတူၺ်းလူး ၸိူဝ်းလုၵ်ႉၵႂႃႇပႂ်ႉ ၼၼ်ႉ ၶဝ်လႆႈပႂ်ႉႁိုင် 4-5 ၸူဝ်ႈမူင်းၶႃႈဢေႃႈ တႃႇတေလႆႈၼမ်ႉမၼ်းၼႆႉ” – ဝႃႈၼႆ။

မိူဝ်ႈၼႆႉ ဝၼ်းတီႈ 02/08/2024 ၶၼ်ၼမ်ႉမၼ်းၸၢၵ်ႈ တီႈပၢမ်ႇ BOC တူၼ်ႈတီးသမ်ႉ (95) 1 လိတ်ႊ 2,950 ပျႃး – 3,000 ပျႃး။ (92) 1 လိတ်ႊ 2,800 ပျႃး – 29,00 ပျႃး။ မိူဝ်ႈဝၼ်းတီႈ 30/07/2024 ၼၼ်ႉ တီႈ ပၢမ်ႉၼမ်ႉမၼ်း BOC ၼႆႉ သႂ်ႇပၼ်ၵႃး 1 လမ်းလႂ် တႃႇၶၼ်ငိုၼ်း 50,000 ပျႃး။ ဝၼ်းတီႈ 31/07/2024 သမ်ႉ သႂ်ႇပၼ် 20,000 ပျႃး၊ ဝၼ်းတီႈ 01-02/08/2024 ၼႆႉသမ်ႉ သႂ်ႇပၼ် 30,000 ပျႃး ၼႆယဝ်ႉ။

“သွင်သၢမ်ဝၼ်းပူၼ်ႉမႃးၼႆႉ ပဵၼ်ရူတ်ႉၵႃးဢေႃႈ လႆၵၼ်ၵႂႃႇသႂ်ႇၼမ်။ မိူဝ်ႈၼႆႉသမ်ႉ ပဵၼ်ရူတ်ႉၶိူင်ႈၼမ်ဢေႃႈ။ ဢိင်ၼိူဝ် လွင်ႈၵူၼ်းမိူင်း ႁိပ်ႈၵၼ်ၵႂႃႇသိုဝ်ႉၼမ်ႉမၼ်းၸၢၵ်ႈၼႆႉ ယွၼ်ႉမီးၶၢဝ်ႇလိုဝ်းဝႃႈ ၼမ်ႉ မၼ်းတေမူတ်းယဝ်ႉၼႆသေ ႁိပ်ႈၼႅတ်ႈၵၼ်ၵႂႃႇသႂ်ႇ တီႈတႄႉမႃး ၵႃးၼမ်ႉမၼ်း ဢၼ်တေႃႉတၢင်ႇ လုၵ်ႉတၢင်းမိူင်းမၢၼ်ႈ တေႃႉမႃးၼၼ်ႉ ဢမ်ႇၶိုတ်းလႄႈ ပဵၼ်ၵူၺ်း”- ၵူၼ်းပိုၼ်ႉတီႈ တူၼ်ႈတီး သိုပ်ႇလၢတ်ႈ ၼင်ႇၼႆ။

သိုပ်ႇလၢတ်ႈဝႃႈ – “ၵွပ်ႈၼႆလႄႈ ထုၵ်ႇၶီႈၵူၼ်းၵႃႉၶဝ်ၵူၺ်းၶႃႈဢေႃႈ။ ၶဝ်သိုဝ်ႉဝႆႉၵႃႈၶၼ်ထုၵ်ႇ လႆႈၶၢႆၵႃႈ ၶၼ်သုင် ၸိူင်ႉၼၼ်ၶႃႈယဝ်ႉ။ ဢမ်ႇၸႂ်ႈၼမ်ႉမၼ်းၸၢၵ်ႈၼႆႉၵူၺ်း မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်းၵိၼ် ၵေႃႈ မိူၼ်ၵၼ်ယဝ်ႉ။ ပေႃးၵူၼ်းမိူင်း သိုဝ်ႉၵၼ်ဝႆႉမူတ်းယဝ်ႉ ၶၼ်ၼမ်ႉမၼ်းၵေႃႈ လူင်းၶိုၼ်းမိူၼ်ၵဝ်ႇယဝ်ႉ။ သင်ပဵၼ်လႆႈတႄႉ ယၢမ်းလဵဝ်ႈၼႆႉ ပႆႇလူဝ်ႇသိုဝ်ႉဝႆႉၶႃႈ ပႂ်ႉထႅင်ႈဝၼ်းသွင်ဝၼ်း ၶႂ်ႈသိုဝ်ႉၼႆ ယိင်ႈၶႅၼ်းလီ ၶၼ်ၼမ်ႉမၼ်း တေလူင်းၶိုၼ်းယဝ်ႉ”- ဝႃႈၼႆ။

ၼႂ်းၸႄႈဝဵင်းတူၼ်ႈတီးၼႆႉ ပၢမ်ႉၼမ်ႉမၼ်း BOC ၼၼ်ႉ တင်းမူတ်း မီး 3 တီႈ မိူၼ်ၼင်ႇ ၵၢင်ဝဵင်းတူၼ်ႈတီး တီႈၼိုင်ႈ၊ တၢင်းၶဝ်ႈဝဵင်း တူၼ်ႈတီး – ႁူဝ်ပူင်း တီႈၼိုင်ႈလႄႈ တၢင်းဝဵင်းဢေးတႃႇယႃႇ တီႈၼိုင်ႈ ၼႆယဝ်ႉ။

ယၢမ်းလဵဝ် ၼမ်ႉမၼ်းၸၢၵ်ႈ ဢၼ်သႂ်ႇတဝ်ႈၼမ်ႉသေ ၶၢႆတၢင်းၼွၵ်ႈသမ်ႉ 1 တဝ်ႈလၢႆ 5,000 ပၢႆယဝ်ႉ တီႈဝဵင်းတူၼ်ႈတီး ၼႆယဝ်ႉ။