ပၢင်ၶုၵ်ႉထူပ်းမွင်ၸႂ်လႄႈ သူင်ႇၵုသူလ် တၢင်းလီပၼ်ပုၼ်ႈတႃႇ ၸၢႆးသၢႆမၢဝ်း မေႃႁွင်ႉၽဵင်းၵႂၢမ်းတႆး – မၢၼ်ႈ ၵိုၵ်းပိုၼ်း ၸၼ်ႉၸိုင်ႈမိူင်းႁူမ်ႈတုမ်ၼႆသေ ၸတ်းႁဵတ်းၵႂႃႇ တီႈဝဵင်းတႃႈၶီႈလဵၵ်း မီးၽူႈၶဝ်ႈႁူမ်ႈ 300 ပၢႆ။
ဝၼ်းတီႈ 30/07/2024 ယၢမ်းၵၢင်ၼႂ် 10 မူင်းၶိုင်ႈ ယူႇတီႈ သင်ၶၸဝ်ႈ ႁူမ်ႈလူၺ်ႈ ၼၢင်းလၢဝ်လၢဝ် (မေးၼၢင်းၵေႃႉၵဝ်ႇ) လႄႈ လုၵ်ႈၸၢႆး ၸၢႆးသၢႆမိူင်း ဢိၵ်ႇတင်း ၸုမ်းပၢႆးမွၼ်းတႆး၊ တၵ်ႉၵႃႇသတ်ႉထႃး ပွတ်းဢွၵ်ႇၶူင်း ႁူမ်ႈၵၼ် ႁႅၼ်းသွမ်းလူႇတၢၼ်းပၼ် ၸၢႆးသၢႆမၢဝ်း တီႈဝတ်ႉၵမ်မထၢၼ်း မႁႃၽေႃးထိ ဝဵင်းတႃႈ ၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၼႆယဝ်ႉ။
ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ၵိင်ႇၽႄငဝ်ႈငုၼ်းမုၵ်ႉၸုမ်းလူင် သင်ႇၶႃႇၸဝ်ႈ ၸိုင်ႈတႆး ပွတ်း ဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “ၸၢႆးသၢႆမၢဝ်း ဢၼ်ဝႃႈၼႆႉ ပဵၼ်ၵူၼ်းၵေႃႉၵိုၵ်းပိုၼ်း တႆးႁဝ်းၵေႃႈၸႂ်ႈ ၸဝ်ႈပၢႆးမွၼ်းတႆး ၵိုၵ်းပိုၼ်းၵေႃႉၼိုင်ႈၵေႃႈၸႂ်ႈလႄႈ ၸင်ႇလႆႈၸတ်းႁဵတ်း ပၢင်ႁႅၼ်းသွမ်းလူႇတၢၼ်းပၼ် ႁႂ်ႈၵူၼ်းတင်းၼမ် ႁူမ်ႈႁူႉႁူမ်ႈငိၼ်းႁူမ်ႈသထု ၸွမ်းမၼ်းၸၢႆးသေ ၸင်ႇလႆႈမႃး ၸတ်းပၢင်ၶုၵ်ႉထူပ်း ပၼ်ၸၢႆးသၢႆမၢဝ်း တီႈဝတ်ႉၵမ်မထၢၼ်း မႁႃၽေႃးထိၼႆႉၶႃႈယဝ်ႉ”- ဝႃႈၼႆ။
ပၢင်ၶုၵ်ႉထူပ်း ၸၢႆးသၢႆမၢဝ်း ဢၼ်လႆႈၸတ်းႁဵတ်းၵႂႃႇ တီႈဝတ်ႉၵမ်မထၢၼ်း မႁႃၽေႃးထိၼႆႉ ယူႇတီႈ ၸုမ်းပၢႆးမွၼ်းတႆး၊ ပႃႇတီႇတႆး 2 ၸုမ်း၊ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတႃႈၶီႈလဵၵ်း၊ ၸုမ်းၵူၼ်းၼုမ်ႇတႆး ႁူမ်ႈလူၺ်ႈ တၵ်ႉၵႃႇသတ်ႉထႃး တီႈၸမ်ၵႆ ၶဝ်ႈႁူမ်ႈ ဢမ်ႇယွမ်း 300 ၵေႃႉ ၼႆယဝ်ႉ။
ၼႂ်းပၢင်ၶုၵ်ႉထူပ်းၼႆႉ ယူႇတီႈ သင်ၶၸဝ်ႈ၊ လုၵ်ႈလၢင်းၼၢင်းမေး၊ ပႃႇတီႇၵၢၼ်မိူင်း၊ ၵေႃလိၵ်ႈလၢႆးလႄႈ ၵူၼ်းၼုမ်ႇတႆး မႃးဢုပ်ႇၶႆႈၼႄ လွင်ႈၸၢႆးသၢႆမၢဝ်း ဢၼ်တီႈလႆႈမိုတ်ႈၵိုတ်းၸမ်ၸႂ်လႄႈ လွင်ႈႁဵတ်းသၢင်ႈ တူင်ႉၼိုင်မၼ်းၸၢႆး ၸိူဝ်း ၼႆႉ။
ယဝ်ႉၵေႃႈ တီႈပၢင်ၶုၵ်ႉထူပ်းမွင်ၸႂ်ၼႆႉ ယူႇတီႈ ၽူႈၶဝ်ႈႁူမ်ႈ တင်းမူတ်း ႁူမ်ႈၵၼ် သႂ်ႇၶူဝ်းၼုင်ႈတင်းဝႂ် သီၶၢဝ်သေ ၶဝ်ႈႁူမ်ႈ။ ယဝ်ႉၵေႃႈ လဵင်ႉလူၸႃႇၵသေ ၸုမ်းပၢႆးမွၼ်း ႁူမ်ႈၵၼ် ႁွင်ႉၽဵင်းၵႂၢမ်းၸၢႆးသၢႆမၢဝ် ႁုပ်ႈသိမ်းပၢင်ၵႂႃႇ ၼႆယဝ်ႉ။
သိုပ်ႇသေၼၼ်ႉ ဝၢႆးပၢင်ၶုၵ်ႉထူပ်းယဝ်ႉၵႂႃႇၼႆ ယူႇတီႈ သင်ၶၸဝ်ႈလႄႈ ၵူႈၾၢႆႇၵူႈတၢင်း ဢုပ်ႇဢူဝ်းလႆႈၸႂ် ၵၼ်သေ တေႁၢင်ႈႁႅၼ်းဢိတ်ႇပပ်ႉဢွၵ်ႇ တႃႇမၢႆတွင်း ၸၢႆးသၢႆမၢဝ်း ၵဵဝ်ႇလူၺ်ႈပိုၼ်းမၼ်းၸၢႆးလႄႈ လွင်ႈၽဵင်းၵႂၢမ်း ၸိူဝ်းၼႆႉ ဝႃႈၼႆ။
မိူဝ်ႈဝၼ်းတီႈ 22 တင်း 24 လိူၼ်ၵျူႊလၢႆႊ ပူၼ်ႉမႃးၼႆႉ ယူႇတီႈ ၵူၼ်းမိူင်းလႄႈ ၸုမ်းပၢႆးမွၼ်းတႆး ၸတ်းႁဵတ်းပၢင်လူႇတၢၼ်း သွမ်း 7 ပၼ် ၸၢႆးသၢႆမၢဝ်း တီႈဝဵင်းမူႇၸေႊလႄႈ ဝဵင်းလိူဝ်ႇ (မၼ်းတလေး) ၵႂႃႇ ၼႆယဝ်ႉ။
ၸၢႆးသၢႆမၢဝ်းၼႆႉ လူႉသဵင်ႈၵႂႃႇ လူၺ်ႈတၢင်းပဵၼ် ၵူၼ်းထဝ်ႈ ၽွင်းဢႃယုလႆႈ 77 ပီ တီႈဝဵင်းတႃႈၵုင်ႈ မိူဝ်ႈဝၼ်းတီႈ 17/07/2024 ယၢမ်းၵၢင်ၶမ်ႈ 7:15 မူင်းသေ ထိုင်မႃး ဝၼ်းတီႈ 19 ယၢမ်းဝၢႆးဝၼ်း 3 မူင်း ၸင်ႇပူၼ်ႉၶၢပ်ႈတူဝ်ၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ