ၸုမ်းပၢႆးမွၼ်းၽဵင်းၵႂၢမ်းတႆး ဢိူင်ႇထုင်ႉမၢဝ်း ႁႃငိုၼ်းၵွင်ၵၢင် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆး ပွတ်းႁွင်ႇ တင်းမူတ်းလႆႈငိုၼ်းၵမ်ႉၸွႆႈမွၵ်ႈ 700 သႅၼ်ပျႃးလႄႈ ငိုၼ်းၶႄႇ 6,000 ယႂၼ်ႊပၢႆ ၼႆယဝ်ႉ။

တႄႇဢဝ် ဝၼ်းတီႈ 29-31/07/2024 ယၢမ်းၵၢင်ၼႂ် 8 မူင်း ထိုင် 5 မူင်းႁူဝ်ၶမ်ႈ ၸုမ်းပၢႆးမွၼ်းၽဵင်းၵႂၢမ်းတႆး ဢိူင်ႇထုင်ႉမၢဝ်း ႁူမ်ႈၵၼ်သေ ႁႃငိုၼ်းၵွင်ၵၢင် တီႈႁိမ်းၵၢတ်ႇလူင် မၢႆ 1 ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ တႃႇၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ ၼႆယဝ်ႉ။

ၸၢႆးသၢႆၾူၼ် ၽူႈႁွင်ႉၽဵင်းၵႂၢမ်းတႆး ဢိူင်ႇထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “တင်းမူတ်း ႁဝ်းၶႃႈ ၸတ်းႁဵတ်း 3 ဝၼ်းၶႃႈ။ ဝၼ်းထူၼ်ႈၼိုင်ႈတႄႉ ႁဝ်းၶႃႈ လႆႈႁပ်ႉငိုၼ်းမၢၼ်ႈၵမ်ႉၸွႆႈ 140 သႅၼ်ပၢႆ ၊ ငိုၼ်း ၶႄႇ 2,000 ပၢႆ ၊ ဝၼ်းထူၼ်ႈသွင် လႆႈငိုၼ်းမၢၼ်ႈ 240 သႅၼ်ပျႃး ၊ ငိုၼ်းၶႄႇ 2,000 ပၢႆလႄႈ ဝၼ်းထူၼ်ႈ သၢမ် လႆႈငိုၼ်းမၢၼ်ႈ 290 သႅၼ်ပၢႆလႄႈ ငိုၼ်းၶႄႇ 2,000 ပၢႆ။ ပႆႇပႃး ဢၼ်တီႈပီႈၼွင်ႉႁဝ်းၶႃႈ ဢူၼ်းမႃး တၢင်း K – Pay လႄႈ ပီႈၼွင်ႉႁဝ်းတၢင်းမိူင်း ၶႄႇ ၵမ်ႉၸွႆႈမႃး ၸိူဝ်းၼၼ်ႉထႅင်ႈ”- ဝႃႈၼႆ။

ဢိင်ၼိူဝ် လွင်ႈငိုၼ်းၵွင်ၵၢင် တီႈလႆႈမႃးၼႆႉသေ တေယူႇတီႈ ၸုမ်းပၢႆးမွၼ်းၽဵင်းၵႂၢမ်းတႆး ဢိူင်ႇထုင်ႉမၢဝ်း ၼႆႉ တေဢုပ်ႇၵုမ်ၵၼ် ထႅင်ႈၵမ်းၼိုင်ႈသေ ၸတ်းၵၢၼ်ၵႂႃႇ – ၸၢႆးသၢႆၾူၼ် ၽူႈႁွင်ႉၽဵင်းၵႂၢမ်းတႆး သိုပ်ႇလၢတ်ႈၼႄၼင်ႇၼႆ။

တႃႇတေပဵၼ်မႃး ၸုမ်းပၢႆးမွၼ်းၽဵင်းၵႂၢမ်းတႆး ဢိူင်ႇထုင်ႉမၢဝ်းၼႆႉ မိူဝ်ႈဝၼ်းတီႈ 22/07/2024 ၽွင်းႁႅၼ်းသွမ်း လူႇတၢၼ်းပၼ် ၸၢႆးသၢႆမၢဝ်း တီႈဝတ်ႉၼၼ်ႇတဝၼ်ႇ ဝဵင်းမူႇၸေႊၼၼ်ႉ ယူႇတီႈ ၽူႈႁွင်ႈၽဵင်းၵႂၢမ်းတႆး တၢင်းၼမ်ႉၶမ်း၊ မူႇၸေႊ၊ ထုင်ႉလွႆႁူဝ်သိူဝ်လႄႈ မိူင်းမၢဝ်း ၸင်ႇၽွမ်ႉႁူမ်ႈလႆႈၸႂ်ၵၼ်သေ ၶွတ်ႇၽွတ်ႈၸုမ်းမႃး တႃႇႁႃငိုၼ်းၵွင်ၵၢင် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ ၼႆယဝ်ႉ။  

“ဢၼ်ႁဝ်းၶႃႈ လႆႈတူင်ႉၼိုင် ၶၢဝ်းတၢင်း 3 ဝၼ်းမႃးၼႆႉ တေလႆႈဝႃႈ ယဝ်ႉတူဝ်ႈၵႂႃႇယဝ်ႉ ၵူၺ်းၵႃႈ လွင်ႈ ႁပ်ႉငိုၼ်းၸွႆႈထႅမ်တႄႉ ႁဝ်းၶႃႈ တိုၵ်ႉပိုတ်ႇႁပ်ႉဝႆႉယူႇတႃႇသေႇၶႃႈ။ သိုပ်ႇသေၼႆႉ ႁဝ်းၶႃႈ ယိူင်းဢၢၼ်းဝႆႉ တႃႇၸွႆႈထႅမ် ၵူၼ်းပၢႆႈ ၽေးၼၼ်ႉ တေၶွတ်ႇၽွတ်ႈၸုမ်းလီလီသေ တေသိုပ်ႇတူင်ႉၼိုင်ၵႂႃႇထႅင်ႈ ၶၢဝ်း ယၢဝ်းယူႇ။ ၵွပ်ႈၼႆလႄႈ တိုၵ်းသူၼ်းထိုင် ပီႈၼွင်ႉၼႂ်းမိူင်း/ ၼွၵ်ႈမိူင်း တင်းသဵင်ႈ ၼင်ႇပွင်ပဵၼ်လႆႈ ၼမ် လႄႈဢေႇ ႁဝ်းၶႃႈ ႁပ်ႉႁွင်းယူႇၶႃႈ”- ၸၢႆးသၢႆ ၾူၼ် သိုပ်ႇလၢတ်ႈၼႄၼင်ႇၼႆ။

ယွၼ်ႉၽႅၼ်ယၼ်ႇသိုၵ်း 1027 ဢၼ်ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် ပိုတ်ႇပၢင်တိုၵ်း တေႃႇသိုၵ်းမၢၼ်း ယိုတ်းမိူင်းမႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇသေ ယဵၼ်ၵႂႃႇၵမ်းၼိုင်ႈ။

ထိုင်မႃး ႁၢင်လိူၼ်ၵျုၼ်ႊ 2024 ၼႆႉ သိုၵ်း TNLA လႄႈ သိုၵ်း MNDAA ႁူမ်ႈလူၺ်ႈ PDF သေ တႄႇပဵၼ် ပၢင်တိုၵ်း တေႃႇသိုၵ်းမၢၼ်ႈမႃးထႅင်ႈ ႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄး၊ သီႇပေႃႉ၊ ၼွင်ၶဵဝ်၊ မိူင်းမိတ်ႈ၊ မိူင်းၵုတ်ႈလႄႈ လႃႈသဵဝ်ႈ ၸိူဝ်းၼႆႉ ႁဵတ်းႁႂ်ႈၵူၼ်းမိူင်း လူႉတၢႆမၢတ်ႇၸဵပ်းၸွမ်းၼမ် ယဝ်ႉၵေႃႈ ႁူဝ်ၵူၼ်းၼပ်ႉသႅၼ် လႆႈပၢႆႈၽေးသိုၵ်းထႅင်ႈ ႁိူၼ်းယေး၊ ဝတ်ႉဝႃးၽႃသိူဝ်ႇ ၸိူဝ်းၼႆႉၵေႃႈ လူႉၵွႆထႅင်ႈတင်းၼမ် ၼႆယဝ်ႉ။