တွၼ်ႈတႃႇ ၵူၼ်းမိူင်းတႆး ပေႃးတေလႆႈလွင်ႈငမ်းယဵၼ်ၼၼ်ႉ ယူႇတီႈ ၵူၼ်းမူႇၸေႊ ႁူဝ်ၵူၼ်း 100 ပၢႆ ႁူမ်ႈၵၼ် တႆႈတဵၼ်းယွၼ်းသူးထိုင် ၼႆယဝ်ႉ။
ဝၼ်းတီႈ 30/07/2024 ယၢမ်းၵၢင်ၶမ်ႈ 7 မူင်းၶိုင်ႈ ယူႇတီႈ ၵေႃလိၵ်ႈလၢႆး၊ ၸုမ်းပရႁိတလႄႈ ၸုမ်းပၢႆးမွၼ်း မူႇၸေႊ ႁူမ်ႈၵၼ် ၸတ်းႁဵတ်းပၢင်တႆႈတဵၼ်း ယွၼ်းသူးထိုင် ၵူၼ်းမိူင်းတႆးလႄႈ ၸိူဝ်းထူပ်းၽေးသိုၵ်းဝႆႉၼၼ်ႉ ႁႂ်ႈလွတ်ႈၽေးၵတ်းယဵၼ် တီႈဝတ်ႉၼၼ်ႇတဝၼ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ် တႆး – ၶႄႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ ႁူမ်ႈၵၼ်ၸတ်းႁဵတ်း ပၢင်တႆႈတဵၼ်း ယွၼ်းသူးထိုင် ၵူၼ်းမိူင်းတႆး ႁႂ်ႈလွတ်ႈၽေးၵတ်းယဵၼ်ၼႆၶႃႈဢေႃႈ။ လႆႈႁူႉဝႃႈ မိူဝ်ႈၼႆႉ ၵၢင်ၶမ်ႈ တေဢွၼ်ၵၼ် ၵႂႃႇသူးတွင်းထႅင်ႈ တီႈၽၵ်းတူလူင် (ၼၢၼ်းတေႃႇပဝ်ႉ) ၼႆၶႃႈဢေႃႈ။ လႆႈငိၼ်းဝႃႈ ယူႇတီႈ ၽူႈၵွၼ်း ၸႄႈတွၼ်ႈမူႇၸေႊ ယွၼ်းတၢင်းၸွႆႈထႅမ်မႃး ႁႂ်ႈႁဵတ်းပၢင်ယွၼ်းသူးၼႆႉသေ ယွၼ်းႁႂ်ႈၵေႃလိၵ်ႈလၢႆး ၵူႈၸုမ်းၸုမ်း၊ ၸုမ်းပရႁိတ ၵူႈၸုမ်းၸုမ်းလႄႈ ၽူႈဢုပ်ႉပိူင်ႇ ၵူႈပွၵ်ႉၵူႈၾၢႆႇ ၸိူဝ်းၼႆႉ ၶဝ်ႈႁူမ်ႈၸွမ်း”- ဝႃႈၼႆ။
ၸုမ်းတူင်ႉၼိုင် တူင်ႇဝူင်းၵူၼ်း ဢၼ်ၶဝ်ႈႁူမ်ႈ ပၢင်တႆႈတဵၼ်း ယွၼ်းသူးၼႆႉသမ်ႉ မိူၼ်ၼင်ႇ ၵေႃလိၵ်ႈလၢႆးတႆး ဝဵင်းမူႇၸေႊ၊ ၵေႃလိၵ်ႈလၢႆး မူင်းဝုၼ်းပႃႇမႃႇ (မုံးဝန်းဗမာ)။ ယဝ်ႉၵေႃႈ ၸုမ်းပရႁိတသမ်ႉ မိူၼ်ၼင်ႇ ၸုမ်းၼႃႈလူင်းလ (နှလုံးလှ) ၊ ၸုမ်းသိၼ်ႇၽိဝ်ႇတေႃႇ (ဆင်ဖြူတော်) လႄႈ ၸုမ်းတွင်ႇပၢႆးတႃး (တောင်ပိုင်းသား) ၸိူဝ်းၼႆႉ ၶဝ်ႈႁူမ်ႈ။
လိူဝ်ၼၼ်ႉ တႄႇဢဝ် ဝၼ်းတီႈ 29-31/07/2024 ၶၢဝ်းတၢင်း 3 ဝၼ်းၼႆႉ ယူႇတီႈ ၸုမ်းပၢႆးမွၼ်း ထုင်ႉမၢဝ်း ႁူမ်ႈၵၼ်သေ ႁႃငိုၼ်းၵွင်ၵၢင် တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ တီႈႁိမ်းၵၢတ်ႇလူင် မူႇၸေႊ မၢႆ 1 ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ