တႆးႁွတ်ႈၵဵင်းမႂ်ႇ – လမ်းပုၼ်း ႁူမ်ႈၵၼ်သေ ၸတ်းႁဵတ်ပၢင်တႅမ်ႈတွပ်ႇလိၵ်ႈတႆး ၶၢဝ်းမႆႈ တီႈဝဵင်းၵဵင်းမႂ်ႇ ၸိုင်ႈထႆး ပွၵ်ႈၵမ်းႁႅၵ်ႈ မီးလုၵ်ႈႁဵၼ်း ၶဝ်ႈတွပ်ႇ 81 ၵေႃႉ။
ဝၼ်းတီႈ 27/07/2027 ယၢမ်းၵၢင်ၼႂ် 8 မူင်းထိုင် 1 မူင်းဝၢႆးဝၼ်း ယူႇတီႈ ႁွင်ႈၵၢၼ်လူင် တိတ်းတေႃႇထႆးလႄႈ ႁွင်ႈ ၵၢၼ်လူင် ၾၢႆႇပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး RCSS ႁူမ်ႈလူၺ်ႈ သင်ၶၸဝ်ႈ၊ ၶူးသွၼ်/ မေႃသွၼ်သေ ၸတ်းႁဵတ်းပၢင်တွပ်ႇလိၵ်ႈတႆး ၶၢဝ်းမႆႈ တီႈဝတ်ႉသူၼ်ၻွၵ်ႇ ဝဵင်းၵဵင်းမႂ်ႇ ၸိုင်ႈထႆး ၼႆယဝ်ႉ။
မေႃသွၼ် ၼၢင်းႁွမ် တီႈႁူင်းႁဵၼ်းဝတ်ႉသီဝူဝ်ငိုၼ်း လၢတ်ႈတီႈၽူႈတွႆႇႁွၵ်ႈဝႃႈ – “ယိၼ်းၸူမ်းၶွပ်ႈၸႂ်ထိုင် ၸုမ်းၶူးသွၼ်၊ လုၵ်ႈႁဵၼ်းႁဝ်းၶႃႈ တႃႇၼႂ်းပီ 2024 ၼႆႉ ပဵၼ်ဢၼ်ၶႅမ်ႉလႅပ်ႈလီငၢမ်းၵႂႃႇယဝ်ႉ။ ႁူမ်ႈလူၺ်ႈ ပေႃႈမႄႈလုၵ်ႈႁဵၼ်းသေ တွၼ်ႈတႃႇ ပီၼႆႉ လုၵ်ႈႁဵၼ်းၸိူဝ်းတူၵ်းလႃႈတူၵ်းလိုၼ်းၵႂႃႇၼၼ်ႉ ဢမ်ႇတၼ်း မႃးၶိုတ်းၼႆ သင်ဝႃႈ ပီၼႃႈၽႃႉမႂ်ႇမႃး ပေႃးပိၵ်ႉႁူင်းႁဵၼ်းထႆးယဝ်ႉၼႆၸိုင် ႁဝ်းၶႃႈ တေပိုတ်ႇသွၼ်ၵမ်းလဵဝ် တႃႇၶၢဝ်းတၢင်း 3 လိူၼ်ၶႃႈ။ ၼင်ႇႁိုဝ် ၾိင်ႈငႄႈလိၵ်ႈလၢႆးႁဝ်း ပေႃးတေဢမ်ႇႁၢႆ၊ ၼင်ႇႁိုဝ် လုၵ်ႈဢွၼ်ႇတႆးႁဝ်း ပေႃးတေဢမ်ႇသုမ်းၶၢဝ်းယၢမ်းလႄႈ တေဢမ်ႇတိတ်းၵဵမ်း (လဵၼ်ႈၵဵမ်း)၊ လဵၼ်ႈၾူၼ်း(မိုဝ်းထိုဝ်) ၸိူဝ်းၼႆႉပႃးထႅင်ႈ”- ဝႃႈၼႆ။
လုၵ်ႈႁဵၼ်း ဢၼ်မႃးၶဝ်ႈႁူမ်ႈတွပ်ႇလိၵ်ႈသမ်ႉ တင်းမူတ်း မီး 81 ၵေႃႉ ၼႂ်းၼၼ်ႉ တေပဵၼ်ႁူင်းႁဵၼ်း ဝတ်ႉသီဝူဝ်ငိုၼ်း၊ ႁူင်းႁဵၼ်းဝၢၼ်ႈမႂ်ႇတႆး မၼ်ႈၵိုၼ်း ပႃႇၽႆႇ မိူင်ၵႅဝ်ႈ၊ ႁူင်းႁဵၼ်းဝၢၼ်ႈလွႆပူင်ႇယဵင်းၼွၵ်ႈလႄႈ ႁူင်းႁဵၼ်းဝတ်ႉသၼ်ပႃႇႁဵင် လမ်းပုၼ်း ၸိူဝ်းၼႆႉ။
ပၢင်သွၼ်လိၵ်ႈတႆး ၶၢဝ်းမႆႈ တီႈၵဵင်းမႂ်ႇ – လမ်းပုၼ်းပီၼႆႉ တႄႇပူင်သွၼ်မႃး ၼႂ်းလိူၼ်မၢတ်ႊၶျ် တေႃႇထိုင် လိူၼ်ၵျူႊလၢႆႊၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ