သိုၵ်းၸၢဝ်းၶိူဝ်း ၼႂ်းမိူင်းတႆးပွတ်းႁွင်ႇ တိုၵ်းၽဵဝ်ႈသိုၵ်းမၢၼ်ႈ လၢႆၸႄႈဝဵင်းမႃးၼႆႉ ႁိမ်းၸမ်ပီယဝ်ႉ ၵူၼ်းမိူင်းတႆး ဢမ်ႇယွမ်း 10 ၸႄႈဝဵင်း လႆႈပၢႆႈၽေးသိုၵ်း ထပ်းၵၼ်မႃးၶိူဝ်းယႂ်း။ ယၢမ်းလဵဝ်သမ်ႉ မီး ၶၢဝ်ႇလိုဝ်းၼႂ်းဝဵင်းၵျွၵ်ႉမႄး၊ သီႇပေႃႉ၊ မူႇၸေႊ ၸိူဝ်းၼႆႉဝႃႈ ဝဵင်းဢၼ်သိုၵ်းၸၢဝ်းၶိူဝ်းဢွင်ႇပေႉ သိုၵ်းမၢၼ်ႈသေ ၵုမ်းဝႆႉ ၸိူဝ်းၼၼ်ႉ သိုၵ်းမၢၼ်ႈ တေဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ ၼႆလႄႈ ႁဵတ်းႁႂ်ႈ ၵူၼ်း မိူင်းတူၵ်းၸႂ်ၵူဝ်ႁႄ။ ၼႂ်းဝၼ်းသွင်ဝၼ်းၼႆႉ ၵူၼ်းမိူင်းဝဵင်းပၢင်ႇသၢႆး လႄႈ မိူင်းၵူဝ်းၵေႃႈ ဢွၼ်ၵၼ်မႆႈ ၸႂ် လႆႈၾၢင်ႉယူႇၾၢင်ႉၵိၼ် ဝႆႉယူႇ ဝႃႈၼႆ။

ႁူဝ်လိူၼ်ၵျူႊလၢႆႊၼႆႉ မီးၶၢဝ်ႇလိုဝ်းဢွၵ်ႇဝႆႉဝႃႈ တၢမ်တူဝ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင်ႇ လုၵ်ႈၸုမ်းမၼ်းဝႆႉ ႁႂ်ႈႁႅၼ်းသိုၵ်းသၢႆၵၢၼ်မိၼ် လေႃႇတိုၵ်းဢဝ်ၶိုၼ်းဝၢၼ်ႈဝဵင်း ၸိူဝ်းဢၼ် သိုၵ်းလုၵ်ႉၽိုၼ်ႉၶဝ် ယိုတ်းၵုမ်းလႆႈဝႆႉ ၸိူဝ်းၼၼ်ႉ။

ဝၢႆးၶၢဝ်ႇလိုဝ်းယဝ်ႉ ဢမ်ႇတၼ်းႁိုင်သင် ဝၢၼ်ႈဝဵင်းဢၼ် သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA ၵုမ်းၵမ်လႆႈဝႆႉ ၸိူဝ်းၼၼ်ႉ ၺႃးၶိူင်ႈမိၼ်မႃးပွႆႇမၢၵ်ႇသႂ်ႇတႄႉသေဢမ်ႇၵႃး ယၢမ်းလဵဝ် ပႃးၸဵမ်ဝဵင်းလူင်လႃႈသဵဝ်ႈၼႆႉၵေႃႈ ၺႃးသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇဝၼ်းဝၼ်းၶိုၼ်းၶိုၼ်း ၼႆယဝ်ႉ။  

မိူၼ်ၼင်ႇ တၢင်းဝဵင်းပၢင်ႇသၢႆး ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဢၼ်သိုၵ်းၵဝ်ႈၵၢင်ႉ MNDAA ၵုမ်းဝႆႉၼၼ်ႉ ၵေႃႈ ၵူၼ်းမိူင်းလွမ်ၵူဝ် သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ လေႃႇတိုၵ်းဢဝ်ၶိုၼ်း၊ ၵူဝ်လူႉယႂ်ႇသုမ်းၼမ် မႆႈၸႂ်ပႃးလွင်ႈႁူမ်ႇလူမ်ႈ သၢႆၸႂ်ၼႆ ၵူၼ်းပၢင်ႇသၢႆး လၢတ်ႈၼႄဝႆႉၼင်ႇၼႆ –

“ၵူၼ်းမိူင်းတႄႉၵေႃႈ ၸိူင်ႉလႆႈငိၼ်းၶၢဝ်ႇၼၼ်ႉၼႃႇၼေႃႈ ဢၼ်ဝႃႈ သိုၵ်းမၢၼ်ႈၶဝ် တေဢဝ်ၶိူင်ႈမိၼ် မႃးလေႃႇတိုၵ်း ဢွင်ႈတီႈၸိူဝ်း ဢၼ်ယၢမ်ႈပဵၼ်ပၢင်တိုၵ်းမႃး မိူဝ်ႈလိူၼ် ပူၼ်ႉမႃးၸိူဝ်းၼၼ်ႉ ၼႆဢေႃႈ။ မိူၼ်ၼင်ႇ ပၢင်ႇသၢႆး – မိူင်းၵူဝ်း ၸိူဝ်းၼႆႉၵေႃႈ ပႃးၼႂ်းသဵၼ်ႈမၢႆၶဝ် ဢၼ်တေမႃးပွႆႇမၢၵ်ႇသႂ်ႇ။ ၵူၼ်းမိူင်းတႄႉၵေႃႈ လႆႈၾၢင်ႉယူႇၾၢင်ႉၵိၼ်။ ၵူဝ်သဵင်ၶိူင်ႈမိၼ် လတ်းမႃးၼိူဝ်ၵၢင်ႁၢဝ်။ ဢၼ်လႆႈၵူဝ်တႄႉ မီးဢၼ်ၼၼ်ႉၵူၺ်းယဝ်ႉ။ မၼ်းၸၢင်ႈပဵၼ်လႆႈၵူႈၶိင်ႇၶၢဝ်းယၢမ်းလႄႈ လႆႈၵူဝ်ၵၼ်ၵူႈၵေႃႉၶႃႈဢေႃႈ”- ဝႃႈၼႆ။   

တႄႇဢဝ် ဝၼ်းတီႈ 28/11/2023 ၼၼ်ႉမႃး သိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ ဝဵင်းပၢင်ႇသၢႆးၼႆႉ ၶၢဝ်းတၢင်းၸမ် ၼိုင်ႈပီသေ သဵင်ၵွင်ႈယဵၼ်ဝႆႉယူႇဝႃႈၼႆသေတႃႉ ၾၢႆႇသိုၵ်းမၢၼ်ႈသမ်ႉ တတ်းၶၢတ်ႇပႅတ်ႈ လႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊ ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်း ဢမ်ႇၸၢင်ႈၵပ်းသိုပ်ႇ ၸူးၵၼ်ငၢႆႈလႄႈ မီးဝႆႉလွင်ႈ ယၢပ်ႇၽိုတ်ႇလၢႆၸိူဝ်ႉလၢႆပိူင်။ တႃႇဢွၵ်ႇၶၢဝ်းတၢင်း ၵႂႃႇမႃးႁႃၵၼ် ၸိူဝ်းၼႆႉၵေႃႈယၢပ်ႇလႄႈ လွင်ႈတေႃႉသူင်ႇၶဝ်ႈၼမ်ႉတၢင်းၵိၼ် ၸူးၵၼ် ၵူၺ်းၵေႃႈ ဢမ်ႇထၢင်ႇႁၢင်ႈ ပဵၼ် ဢၼ်ယၢပ်ႇယဵၼ်းဝႆႉ ဝႃႈၼႆ။

ယၢမ်းလဵဝ် ငဝ်းလၢႆးတီႈပၢင်ႇသၢႆးၼႆႉ ဢမ်ႇမီးပၢင်တိုၵ်းသိုၵ်းသိူဝ်သင်သေတႃႉ ယူႇတီႈ သိုၵ်းၵဝ်ႈၵၢင်ႉ ၶဝ်တႄႉလူင်း ၾိုၵ်းၵၢၼ်သိုၵ်း ၼႂ်းဢွင်ႈတီႈၵူၼ်းမိူင်းယူႇသဝ်း မိူၼ်ၼင်ႇ ၼႂ်းဝၢင်းပိတ်ႉမၢၵ်ႇၼင် ၸိူဝ်းၼႆႉ ၵူႈဝၼ်း။ ႁူဝ်ၼပ်ႉ ၵူၼ်းၶဝ် မီးမွၵ်ႈ 100 ပၢႆ။ လႆႈႁၼ်သိုၵ်းတူင်ႉၼိုင်ႈယူႇၵူႈဝၼ်းၸိူင်ႉၼႆ ၼႂ်းၸႂ်တႄႉ ပဵၼ်လိူတ်ႇပဵၼ်မႆႈ ဢမ်ႇၵတ်းယဵၼ်ၸႂ်လႆႈသေပွၵ်ႈၼႆ ၵူၼ်းပိုၼ်ႉတီႈလၢတ်ႈ။

ဢိင်ၼိူဝ် လွင်ႈသိုၵ်းမၢၼ်ႈ တေဢဝ်မၢၵ်ႇမႃးပွႆႇသႂ်ႇ ဢွင်ႈတီႈ ဢၼ်သိုၵ်းလုၵ်ႉၽိုၼ်ႉၶဝ် ၵုမ်းဝႆႉၼႆႉသေ ၾဵတ်ႉ The Kachin Sub – State Media တႄႉ တႅမ်ႈတၢင်ႇဝႆႉဝႃႈ ၽူႈမီးၸၼ်ႉ CDM ၵေႃႉၼိုင်ႈ လၢတ်ႈၶဝ်ဝႃႈ ၸွမ်ၸိၵ်းသိုၵ်း မၢၼ်ႈမိၼ်းဢွင်ႇလၢႆႇ ၸီႉသင်ႇလုၵ်ႈၸုမ်း ပႃႈတႂ်ႈမၼ်း ႁႂ်ႈဢဝ်ၶိူင်ႈ မိၼ်လေႃႇတိုၵ်းဢဝ်ၶိုၼ်း။

ၼႂ်းၼၼ်ႉ တေပႃးဝႆႉ သဵၼ်ႈၸိုဝ်ႈဝဵင်း ၼႂ်းၸိုင်ႈတႆးပွတ်းႁွင်ႇ မိူင်ၼင်ႇ ဝဵင်းဢၼ် သိုၵ်းတဢၢင်း TNLA ၵုမ်းဝႆႉ မိူင်းငေႃႉ၊ မိူင်းလူင်၊ မၢၼ်ႈတူင်ႈ၊ ၼမ်ႉတူႈ၊ ၼမ်ႉၶမ်း၊ ၵူတ်ႉၶၢႆ၊ ၼမ်ႉသၼ်ႇ။ ဝဵင်းဢၼ် သိုၵ်းၵဝ်ႈၵၢင်ႉ MNDAA  ၵုမ်းဝႆႉ လၢဝ်ႇၵၢႆး၊ ပၢင်ႇလူင်၊ သႅၼ်ဝီ၊ ၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ)၊  ၵုၼ် လူင်၊ ၵုင်းၸၢင်ႉ၊ မိူင်းၵူဝ်း၊ ပၢင်ႇသၢႆး၊ တႃႈမိူင်းငႅၼ်း၊ မိူင်းၸီး၊ ၼမ်ႉၸလၢပ်ႈ။ မိူၼ်ၼင်ႇ သိုၵ်းၶၢင် KIA ၵုမ်းဝႆႉ ၼမ်ႉၽၵ်းၵႃ။ သမ်ႉထႅင်ႈ ဢွင်ႈတီႈဢၼ် ၸုမ်း ဢူၺ်းလီပွတ်းႁွင်ႇ 3 ၸုမ်းႁူမ်ႈၵၼ်ၵုမ်းဝႆႉ 105 လၵ်းတီႈမူႇၸေႊလႄႈ ၶူဝ်ၼမ်ႉပေႃႈ ၸိူဝ်းၼႆႉ။

ၵူၺ်းၵႃႈ လွင်ႈၼႆႉတႄႉ ဢမ်ႇၸၢင်ႈဢဝ်ၶေႃႈယိုၼ်ယၼ်လႆႈတီႈၽႂ်။ ဢမ်ႇမီးၸုမ်းလႂ် ယိုၼ်ယၼ်ဝႃႈ ၼႆသေတႃႉ ပိူင်ပဵၼ်တႄႉသမ်ႉ ဝဵင်းဢၼ်သိုၵ်းလုၵ်ႉၽိုၼ်ႉ တႄႇႁႃၵုမ်းဝႆႉ မိူၼ်ၼင်ႇ ဝဵင်းသႅၼ်ဝီ၊ ၼမ်ႉသၼ်ႇ ၊ လၢဝ်ႇၵၢႆး ၸိူဝ်း ၼၼ်ႉၵေႃႈ ၺႃးၶိူင်ႈမိၼ်မႃးပွႆႇမၢၵ်ႇသႂ်ႇ ယင်းပႃးဝဵင်းလူင်လႃႈသဵဝ်ႈထႅင်ႈ လူးၵွၼ်ႇၼႆ ၵူၼ်းမိူင်းတႆးပွတ်းႁွင်ႇ ၾၢင်ႉႁၼ်သေ လၢတ်ႈၼႄတၢင်းႁၼ်ထိုင်ဝႆႉၼင်ႇၼႆ –

“ၶၢဝ်ႇၼႆႉ တေဝႃႈဢမ်ႇယိုၼ်ယၼ်လႆႈလႄႈ ဢမ်ႇၸႂ်ႈတႄႉႁႃႉၼႆၵေႃႈ မိူၼ်ၼင်ႇ တၢင်းသႅၼ်ဝီ၊ လၢဝ်ႇၵၢႆးၼႆႉ သမ်ႉၺႃးယူႇတႄႉ။ မိူၼ်ၼင်ႇ ၽၵ်းတူၶဝ်ႈဢွၵ်ႇ လႅၼ်လိၼ်တႆး- ၶႄႇ တၢင်းပၢင်ႇသၢႆး၊ လၢဝ်ႇၵၢႆး၊ ၼမ်ႉၶမ်း ၸိူဝ်းၼႆႉ ၵေႃႈ ၶႄႇၶဝ် ပိၵ်ႉဝႆႉမူတ်း ၵိုတ်းတၢင်းမူႇၸေႊၼႆႉ တီႈလဵဝ်ၵူၺ်းၼႃႇၼေႃ။ ဢၼ်ၼႆႉၵေႃႈ တေၵဵဝ်ႇၶွင်ႈ လွင်ႈပၢင်တိုၵ်းၼႆႉၵူၺ်း။ ၶဝ်တေပႆႇငူပ်ႉငီႉတူၵ်းလူင်းသင်ၵၼ်လႆႈၵႂႃႈ”- ဝႃႈၼႆ။

ယူႇတီႈ ၽူႈၶၢၼ်ပၢၵ်ႇ ႁွင်ႈၵၢၼ်ၾၢႆႇၼွၵ်ႈမိူင်း မိူင်းၶႄႇ မၢဝ်ၼိင်တႄႉၵေႃႈ လၢတ်ႈၵႂႃႇၼႂ်းပၢင်သပ်း ၸႅင်ႈၶၢဝ်ႇ မိူဝ်ႈဝၼ်းတီႈ 25/07/2024 ၼၼ်ႉဝႃႈ – ယူႇတီႈ မိူင်းၶႄႇသေ လႆႈပၵ်းတႃပႂ်ႉတူၺ်း ပၢင်တိုၵ်း တီႈၼႂ်းၸိုင်ႈတႆးပွတ်းႁွင်ႇ ဝႆႉယူႇ။

ယႃႇႁႂ်ႈပၢင်တိုၵ်းၼႆႉ လႆႈတုမ်ႉတိူဝ်ႉၵႂႃႇ ၾၢႆႇတၢင်းမိူင်းၶႄႇ၊ ပိူင်လူင် ယႃႇႁႂ်ႈတုမ်ႉတိူဝ်ႉ ၵူၼ်းမိူင်းၶႄႇ ဢၼ်ႁဵတ်းၵၢၼ်ဝႆႉယူႇ ၼႂ်းၸိုင်ႈတႆးပွတ်းႁွင်ႇလႄႈ ၸွမ်းလႅၼ်လိၼ်ၶႄႇ – မၢၼ်ႈ၊ ယႃႇႁႂ်ႈတုမ်ႉတိူဝ်ႉ ၶူင်းၵၢၼ် လူင်ပွင်ၸိုင်ႈၶႄႇ ဢၼ်မီးၼႂ်းမိူင်းတႆးပွတ်းႁွင်ႇ ၸိူဝ်းၼၼ်ႉလႃးလႃး ဝႃႈၼႆ။