သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ယိုဝ်းၵၼ် တီႈဢိူင်ႇၼွင်ၵေႃႈ ၸႄႈဝဵင်းသီႇပေႃႉ ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ်။

ဝၼ်းတီႈ 28/07/2024 တႄႇဢဝ်ယၢမ်းၵၢင်ၼႂ်ထိုင် ႁူဝ်ၶမ်ႈ သိုၵ်းၵဝ်ႈၵၢင်ႉ ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ တပ်ႉၵွင် 147 ဢၼ်ပၵ်းဝႆႉတီႈဢိူင်ႇဝၢၼ်ႈၼွင်ၵေႃႈလႄႈ တပ်ႉၵႃးၵၢပ်ႇလဵၵ်း ဢၼ်မီးဝႆႉတီႈ ဝၢၼ်ႈၼႃးၵၢင် ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ သွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း သိုၵ်းၵဝ်ႈၵၢင်ႉၶႃႈဢေႃႈ ဢၼ်ၶဝ် ယိုဝ်းၵၼ်ႁၢဝ်ႈႁႅင်းၼႆႉ တင်ႈတႄႇမိူဝ်ႈဝႃးမႃး ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ်။ တီႈတပ်ႉသိုၵ်းမၢၼ်ႈ ၼၼ်ႉ ၵေႃႈ သိုၵ်းၵဝ်ႈၵၢင်ႉၶဝ် ပႆႇသိမ်းလႆႈ။ လႆႈငိၼ်းဝႃႈ တပ်ႉၵႃးၵၢပ်ႇလဵၵ်းသိုၵ်းမၢၼ်ႈ တီႈဝၢၼ်ႈၼႃးၵၢင်ၼၼ်ႉၵေႃႈ မႃး ၶွၼ်ႈဝႆႉတီႈ ဝၢၼ်ႈၼွင်ၵေႃႈ မူတ်းယဝ်ႉၼႆဢေႃႈ။ သိုၵ်းၵဝ်ႈၵၢင်ႉ ၸိူဝ်းၼႆႉသမ်ႉ လုၵ်ႉတၢင်းမိူင်းယႆ လူင်းတိုၵ်းၶႃႈ ဢေႃႈ”- ဝႃႈၼႆ။

ယၢမ်းလဵဝ် သိုၵ်းၵဝ်ႈၵၢင်ႉၼႆႉ မႃးဢဝ်တီႈယူႇဝႆႉ ၸွမ်းၼႂ်းဝၢၼ်ႈၼႃးမၢၵ်ႇၶေႃ၊ ဝၢၼ်ႈၵွင်းမူး၊ ဝၢၼ်ႈႁူဝ်ၼႃး ၸိူဝ်းၼႆႉ ယဝ်ႉၵေႃႈ ၸွမ်းသၢပ်ႇဝဵင်းၼမ်ႉလၼ်ႈ ၸိူဝ်းၼႆႉထႅင်ႈ တင်းၼမ် ဝႃႈၼႆ။

“မိူဝ်ႈၶမ်ႈဝႃးၼႆႉ သိုၵ်းမၢၼ်ႈဢဝ်ၶိူင်ႈမိၼ် မႃးပၼ်ႇလဵပ်ႈတၢင်း ဢိူင်ႇၼွင်ၵေႃႈလႄႈ ၼမ်ႉလၼ်ႈၼႆႉ တင်းၶိုၼ်ႈၶႃႈယဝ်ႉ။ မၢၵ်ႇတႄႉ ပႆႇႁၼ်ပွႆႇၶႃႈ မႃးပၼ်ႇလဵပ်ႈ ၸိူင်ႉၼၼ်သေၵေႃႈ ၵႂႃႇၶိုၼ်းၵူၺ်း။ ယၢမ်းလဵဝ် ႁိူၼ်းယေး ၵူၼ်းဝၢၼ်ႈ ၼႃးမၢၵ်ႇၶေႃ၊ ဝၢၼ်ႈၵွင်းမူး၊ ႁူဝ်ၼႃး ၸိူဝ်းၼႆႉ သိုၵ်းၵဝ်ႈၵၢင်ႇ ၶဝ်ႈယူႇမူတ်းယဝ်ႉ ၶႃႈ။ ယဝ်ႉၵေႃႈ ၸွမ်းသၢပ်ႇဝဵင်းၼမ်ႉလၼ်ႈထႅင်ႈ ၵူၼ်းမိူင်းတႄႉ မႆႈၸႂ်ႁႅင်းဢေႃႈ မၢင်ၸိူဝ်းငိူင်ႉပၢႆႈဝႆႉၵေႃႈ  မီးဢေႃႈ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈပၢင်တိုၵ်း တီႈဢိူင်ႇၼွင်ၵေႃႈၼႆႉသေ ႁဵတ်းႁႂ်ႈၵူၼ်းမိူင်း ဢွၼ်ၵၼ်ပၢႆႈၽေးသိုၵ်း ႁွတ်ႈ ထိုင်ဝႆႉ မိူင်းယႆ၊ ၼမ်ႉလၼ်ႈ ၸိူဝ်းၼႆႉဝႆႉ။ ယဝ်ႉၵေႃႈ ဢိူင်ႇၼွင်ၵေႃႈၼႆႉ တေယၢၼ်ဝဵင်းသီႇပေႃႉ 14 လၵ်း လႄႈ ယၢၼ်ဝဵင်းၼမ်လၼ်ႈ 24 လၵ်း ၼႆယဝ်ႉ။

မိူဝ်ႈၼႆႉ ဝၼ်းတီႈ 29 ယၢမ်းၵၢင်ၼႂ် သိုၵ်းမၢၼ်ႈ ထႅမ်ႁႅင်းသိုၵ်း လုၵ်ႉပွတ်းၸၢၼ်း မုင်ႈၸူး မႃးတၢင်း ပွတ်းႁွင်ႈၼႆႉ ဢဵၼ်ႁႅင်းဢမ်ႇယွမ်း 1,000 – ၵူၼ်းပိုၼ်ႉတီႈလၢတ်ႈ။