မိူဝ်ႈၼႆႉ ဝၼ်းတီႈ 28/07/2024 ယၢမ်းၵၢင်ၼႂ်မွၵ်ႈ 7 မူင်းၶိုင်ႈ ၵႃးလူင်တၢင်ႇၵုၼ်ႇ 12 လေႃႉ လေႃႈၽႃႇသႂ်ႇ တီႈႁူင်း ႁဵၼ်းၸၼ်ႉဢွၼ် ဝၢၼ်ႈပၢင်ႇလေႃႉတႂ်ႈ ဢိူင်ႇမိူင်းၸဵမ်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ၶူင်း မီးၵူၼ်းမၢတ်ႇၸဵပ်းၸွမ်း ၵေႃႉၼိုင်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵႃးလူင် 12 လေႃႉ လုၵ်ႉတၢင်း လွႆပၢင် ၵႂၢႆးၼၼ်ႉသေ လူင်းမႃး တမ်သႂ်ႇႁူင်းႁဵၼ်းတီႈဝၢၼ်ႈပၢင်ႇလေႃႉတႂ်ႈၼႆႉဢေႃႈ။ ၵတ်းၵႃႈ ဢမ်ႇတိူဝ်ႉၺႃး လုၵ်ႈဢွၼ်ႇ ၵွၼ်ႇဢေႃႈ။ ယွၼ်ႉဝႃႈ မိူဝ်ႈၼႆႉ ပဵၼ်ဝၼ်းပိၵ်ႉႁူင်းႁဵၼ်း (ဝၼ်းတိတ်ႉ) လႄႈဝႃႈဢေႃႈ။ တီႈႁူင်းႁဵၼ်းၼႆႉ ၺႃးၵႃးတမ်သႂ်ႇ ၸိူင်ႉၼႆၼႆႉ မီးမႃး 3 ပွၵ်ႈယဝ်ႉ။ ၼႂ်း 3 ပွၵ်ႈၼၼ်ႉ ပႃးရူတ်ႉၶိူင်ႈသၢမ်လေႃႉ ပွၵ်ႈၼိုင်ႈ၊ ၵႃး 2 ပွၵ်ႈ” – ဝႃႈၼႆ။
ဢိင်ၼိူဝ် လွင်ႈၽေးၵိုင်ႉၵၢင်ႉၼႆႉသေ မီးၵူၼ်းမၢတ်ႇၸဵပ်း ၸွမ်းၵေႃႉၼိုင်ႈ ၼၼ်ႉတႄႉ ယူႇတီႈ ၸုမ်းၸွႆႈထႅမ် ပရႁိတ ဝဵင်းၵဵင်းတုင် လႆႈၵႂႃႇတေႃႉဢဝ်မႃး ယူတ်းယႃတူဝ်ဝႆႉ တီႈႁူင်းယႃလူင် ၵဵင်းတုင်ယဝ်ႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 15 ယၢမ်းၵၢင်ၼႂ် 8 မူင်းၶိုင်ႈ ၼၼ်ႉၵေႃႈ ၵႃးဢွၼ်ႇတင်း ၵႃးလူင် ၽႃႇသႂ်ႇၵၼ် တီႈႁိမ်းၸဝ်ႈမိူင်း ဝၢၼ်ႈပၢင်ႇလေႃႉတႂ်ႈၼႆႉ ၵႃးဢွၼ်ႇၾႆးမႆႈလူႉၵွႆသဵင်ႈ မီးၵူၼ်းလူႉတၢႆ 6 ၵေႃႉ။ ၼႂ်းၼၼ်ႉ ပဵၼ်ၽူႈၸၢႆး 4 ၵေႃႉလႄႈ ယိင်း 2 ၵေႃႉ။ ၵႃးလူင် 12 လေႃႉသမ်ႉ ပိၼ်ႈၶွမ်ႈၵႂႃႇသေ ၽူႈၸၢႆး 2 ၵေႃႉ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း ၼႆယဝ်ႉ။
