သွင်ၽူဝ်မေး ယဵပ်ႇၺႃးမၢၵ်ႇမႅင်း တီႈဝၢၼ်ႈၵၢၼ်ႇၵျီး ၽွင်းၵႂႃႇႁဵတ်းၵၢၼ် ၵေႃႉပဵၼ်ၸဝ်ႈၽူဝ် လႆႈတိူဝ်ႉမၢတ်ႇၸဵပ်းႁႅင်း ထိုင်တီႈၶႃပုတ်း ၶွၼ်ၼိုင်ႈ ဝႃႈၼႆ။

ဝၼ်းတီႈ 24/07/2024 ယၢမ်းၵၢင်ၼႂ် 8 မူင်းပၢႆ သွင်ၽူဝ်မေး ဢၼ်ယူႇသဝ်း တီႈႁိမ်းတူဝ်းၵဵတ်ႉ ႁူၺ်ႈၵိုတ်ႈၼၼ်ႉသေ မႃးယဵပ်ႇၺႃးမၢၵ်ႇမႅင်း တီႈဝၢၼ်ႈၵၢၼ်ႇၵျီး ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မိူဝ်ႈၽွင်းၵႂႃႇႁဵတ်းၵၢၼ် ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ -“သွင်ၽူဝ်မေးၼႆႉ ၶႃၵႂႃႇၵိၼ်ၸၢင်ႈ လုမ်းလႃးၶွၵ်ႈၵႆႇ ပၼ်ပိူၼ်ႈတၢင်းဝၢၼ်ႈၵၢၼ်ႇၵျီးပုၼ်ႉဢေႃႈ။ ၵေႃႉပဵၼ်မေးမၼ်းသမ်ႉ ၵႂႃႇၸွမ်းတၢင်းလင်ၽူဝ်မၼ်းလႄႈ ဢမ်ႇတၼ်းၺႃး ၸၢၵ်ႇမၢၵ်ႇသင်။ ၽူဝ်မၼ်းတႄႉ ၶႃၾၢႆႇၶႂႃ တင်ႈတႄႇႁူဝ်ၶဝ်ႇလူင်းတႂ်ႈ လုပ်ႇမၼ်းတႅၵ်ႇလႅဝ်ယွၵ်းယွႆမူတ်းယဝ်ႉ။ ၶႃ ၾၢႆႇသၢႆႉသမ်ႉ တိူဝ်ႉမၢတ်ႇၼမ်ယူႇ ၵူၺ်းဢမ်ႇထိုင်တီႈပုတ်း။ ယၢမ်းလဵဝ် လႆႈသူင်ႇယူတ်းယႃဝႆႉတီႈ ပၢင်ႇဢူႈလူင်ယဝ်ႉ”- ဝႃႈၼႆ။

သွင်ၽူဝ်မေးၼႆႉ တေမီးဢႃယု သႅၼ်းပၢၼ် ၼႂ်းၵႄႈ 30 – 40 ပဵၼ်ၵူၼ်း တၢင်းမိူင်းမၢၼ်ႈတူင်ႈပဵင်းသေ မႃးႁႃၵိၼ် ၸၢင်ႈပိူၼ်ႈ လုမ်းလႃးၶွၵ်ႈၵႆႇတၢင်းဝၢၼ်ႈၵၢၼ်ႇၵျီး ဢၼ်မီးၾၢႆႇၸၢၼ်း ဝဵင်းမိူင်းမိတ်ႈ ႁိမ်းသဵၼ်ႈတၢင်းလူင် ၼွင်ၶဵဝ် – လွၵ်ႉၸွၵ်ႇ ဝႃႈၼႆ။

မၢၵ်ႇမႅင်းဢၼ်ၵူၼ်းမိူင်း ယဵပ်ႇၺႃးၼၼ်ႉ ပဵၼ်မၢၵ်ႇဢၼ်သိုၵ်းမၢၼ်ႈၶဝ် ယိုဝ်းမႃးသေ ဢမ်ႇတႅၵ်ႇ ၵိုတ်းဝႆႉႁိုဝ် ဢမ်ႇ ႁူႉ ဢမ်ႇၼၼ် ပဵၼ်မၢၵ်ႇမႅင်းၾင်ႇလိၼ်ႁိုဝ် ဢမ်ႇႁူႉ ႁၢၼ်ႉတေႃႇထိုင်ယၢမ်းလဵဝ် ပႆႇမီးၽႂ်ယိုၼ်ယၼ်လႆႈ – ၵူၼ်းပိုၼ်ႉတီႈလၢတ်ႈ။

တႄႇဢဝ် ဝၼ်းတီႈ 26 လိူၼ်ၵျုၼ်ႊပူၼ်ႉမႃးၼၼ်ႉသေ တေႃႇထိုင်ဝၼ်းတီႈ 9 လိူၼ်ၵျူႊလၢႆႊ ယၢမ်းၵၢင်ၶိုၼ်းၼႆႉ ယူႇတီႈ သိုၵ်းတဢၢင်း TNLA ၊ ၸုမ်းၵႅတ်ႇၶႄၵူၼ်းမိူင်း ထၼု DPLA လႄႈ ၸုမ်းၵႅတ်ႇၶႄၵူၼ်းမိူင်း ဝဵင်းလိူဝ်ႇ MDY – PDF သေ ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်း တီႈၸႄႈဝဵင်းၼွင်ၶဵဝ် မႃးႁၢဝ်ႈႁႅင်း ယိုတ်းလႆႈ တပ်ႉၶမယ 114 တင်း 115 လႄႈ တပ်ႉၵွင်ႈလူင် 606 ထႅင်ႈ ၼႆယဝ်ႉ။