သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇပဵၼ်တၢင်းၵၢၼ် ဝၼ်းတီႈ 25/07/2024 ယၢမ်းၵၢင်ၼႂ် ယိုတ်းလႆႈတပ်ႉတိူင်းသိုၵ်း ယမၶ ဢၼ်ပၵ်းဝႆႉတီႈဝဵင်းလႃႈသဵဝ်ႈယဝ်ႉ ပဵၼ်ၸႄႈတွၼ်ႈယႂ်ႇ တပ်ႉတိူင်းသိုၵ်းယႂ်ႇၶွင်သိုၵ်းမၢၼ်ႈ ဢၼ်တူၵ်းတႂ်ႈၵၢၼ်ၽွင်းငမ်း ၼႃႈလိၼ်ၶိုၵ်ႉတွၼ်း ဢၼ်ႁႅၵ်ႈ ဝႃႈၼႆ။

ပၢင်တိုၵ်းတႃႇဢဝ်လႆႈတိူင်းသိုၵ်းမၢၼ်ႈ ယမၶ ၸဵင်ႇႁွင်ႇဝၼ်းဢွၵ်ႇ ဢၼ်ပၵ်းတီႈဝဵင်းလႃႈသဵဝ်ႈ ၼႆႉ သိုၵ်းၵဝ်ႈၵၢင်ႉ လႆႈၸႂ်ႉၶၢဝ်းယၢမ်းလေႃႇတိုၵ်းပိုတ်းယိုဝ်း 23 ဝၼ်း၊ ယၢမ်းဝၢႆးဝၼ်း ဝၼ်းတီႈ 25 ၵျူႊလၢႆႊၼႆႉ သိုၵ်းၵဝ်ႈၵၢင်ႉ MNDAA ၶဝ်ႈယိုတ်းပၵ်းတုင်းၼႂ်းတပ်ႉသိုၵ်းမၢၼ်ႈလၢႆလၢႆဢၼ်ၼႂ်းဝဵင်းလႃႈသဵဝ်ႈ။

ဝၢႆးၼၼ်ႉ ပိုၼ်ၽၢဝ်ႇပႃးဝႃႈ တင်ႈဢဝ်ၼႆႉၵႂႃႇ ဝဵင်းလႃႈသဵဝ်ႈ တူၵ်းပဵၼ်တႂ်ႈၵၢၼ်ၽွင်းငမ်း ၼႃႈလိၼ်ၶိုၵ်းတွၼ်း(ဢထူးတေႇတ) ၶွင် MNDAA ယဝ်ႉလႄႈ တွၼ်ႈတႃႇၸႄႈတွၼ်ႈလႃႈသဵဝ်ႈၼႆႉ- တေၶိုၼ်းမႄးတႅမ်ႈပိူင်ၶွတ်ႇၽွတ်ႈတႃႇၽွင်းငမ်း၊ တႃႇၶိုၼ်းပူၵ်းပွင်ၼႂ်းဝၢၼ်ႈဢိူင်ႇ ဢၼ်လူႉၵွႆယွၼ်ႉပၢင်တိုၵ်း။

လိူဝ်ၼၼ်ႉ တေတမ်းဝၢင်းပိူင်တိုဝ်းၵမ် ၵေႃႉသိုၵ်းၵေႃႉႁၢၼ် MNDAA ယႃႇႁႂ်ႈလႆႈပူၼ်ႉပႅၼ်တဵၵ်းတဵင်ပၢႆးမၢၵ်ႈမီးၵူၼ်းမိူင်းပိုၼ်ႉတီႈ၊ ၽႂ်ပူၼ်ႉပႅၼ်ၸိုင် ႁႂ်ႈၵူၼ်းမိူင်းမႃးတိူင်ႇလၢတ်ႈတီႈလုမ်း MNDAA ၊ ၾၢႆႇၵဵဝ်ႇၶွင်ႈတေဢဝ်လိူင်ႈပၼ်တူတ်ႈတၢမ်ႇၽူႈပူၼ်ႉပႅၼ်ၵႂႃႇ ၼႂ်းၶေႃႈပိုၼ်ၽၢဝ်ႇၾၢႆႇၶႄႇၼၼ်ႉပႃးဝႆႉၼင်ႇၼႆ။

ၶေႃႈပိုၼ်ၽၢဝ်ႇဢွၵ်ႇဝႆႉၼင်ႇၼၼ်သေတႃႉ တေႃႇထိုင်ၶၢဝ်းယၢမ်းဝၢႆးဝၼ်း 4 မူင်းၼႆႉသဵင်ၵွင်ႈသဵင်မၢၵ်ႇတိုၵ်ႉတႅၵ်ႇယူႇပႆႇထၢတ်ႇ။ ၵူၼ်းပိုၼ်ႉတီႈတႄႉလၢတ်ႈဝႃႈ – ၵိုတ်းတပ်ႉပၢင်သဝ်းသိုၵ်းမၢၼ်ႈၼႂ်းတပ်ႉၶမယ ၶလယ သိုၵ်းမၢၼ်ႈထႅင်ႈလၢႆလၢႆဢၼ် ဢၼ်တပ်ႉသိုၵ်းၶႄႇၵဝ်ႈၵၢင်ႉပႆႇယိုတ်းလႆႈ။ ၵွပ်ႈၼႆလႄႈ သဵင်ၵွင်ႈတႄႉ တိုၵ်ႉဢွၵ်ႇယူႇပႆႇထၢတ်ႇ ဝႃႈၼႆ။

“ၶဝ်ပႆႇယိုတ်းလႆႈတင်းမူတ်းၶႃႈ။ တၢင်း 68 ၵေႃႈၵိုတ်းတပ်ႉပၢင်သဝ်းထႅင်ႈဢိတ်းဢွတ်း။ လႆႈငိၼ်းဝႃႈ သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈတၢင်း 68 ၼႆဢေႃႈ။ တၢင်း 41 ၵေႃႉၵိုတ်းဢိတ်းဢွတ်း။ ၼႂ်းဝဵင်းၵေႃႈမီးလွင်ႈပိုတ်းယိုဝ်းၵၼ်။ မိူဝ်ႈၼႆႉယိုဝ်းၵၼ်ႁႅင်းဝႆႉဢေႃႈ” ဝႃႈၼႆ။

လွင်ႈမၢတ်ႇၸဵပ်းလူႉတၢႆမီးမွၵ်ႈႁိုဝ်တႄႉဢမ်ႇပႆႇလႆႈႁူႉ။ ၵူၼ်းမိူင်းၸိူဝ်းၵိုတ်းၶၢင်ႉဝႆႉ ၸိူဝ်းဢမ်ႇပၢႆႈၼၼ်ႉၵေႃႈ ယၢမ်းလဵဝ် ပၢင်တိုၵ်းပဵၼ်ႁႅင်းမႃးလႄႈၶႂ်ႈပၢႆႈယူႇသေတႃႉ ဢမ်ႇၸၢင်ႈပၢႆႈ။ ဢမ်ႇၸၢင်ႈဢွၵ်ႇႁိူၼ်း- ပဵၼ်ဢၼ်ယၢပ်ႇၽိုတ်ႇဝႆႉဝႃႈၼႆ။

ၼႂ်ၵႆႈ ယၢမ်းၵၢင်ၼႂ်မွၵ်ႈ 7 မူင်းၼႆႉၵေႃႈ ၽွင်းတိုၵ်ႉၸွႆႈထႅမ်ၵူၼ်းမိူင်းၸိူဝ်းၶၢင်ႉၶမ်ပၢင်တိုၵ်းယူႇၼၼ်ႉ ၵူၼ်းၼႂ်းၸုမ်းပရႁိတ ၵေႃႉၼိုင်ႈ ၺႃးယိုဝ်း။ မၢၵ်ႇၵွင်ႈတိူဝ်ႉၺႃးတီႈၶႃ မၢတ်ႇၸဵပ်းလိူတ်ႈဢွၵ်ႇ။