ႁၢၼ်ႉၶၢႆၾူၼ်း တီႈဝၢၼ်ႈသွင်ၵေး ၸႄႈဝဵင်းသီႇပေႃႉ ၺႃးသွၵ်ႈတဝ် သုမ်းၵႂႃႇၾူၼ်း 30 လုၵ်ႈ မႅၼ်ႈငိုၼ်း မွၵ်ႈ 100 သႅၼ်ပျႃး။
ႁၢင်လိူၼ်ၵျူႊလၢႆႊ 2024 ၼႆႉ ႁၢၼ်ႉၶၢႆၾူၼ်း SK Mobile ဢၼ်ပိုတ်ႇၶၢႆဝႆႉ တီႈဝၢၼ်ႈသွင်ၵေး ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးၵူၼ်းၶဝ်ႈသွၵ်ႈတဝ်ၼႂ်းႁၢၼ်ႉ လႆႈၵႂႃႇၾူၼ်း 30 လုၵ်ႈလႄႈ Power Bank ၸိူဝ်းၼႆႉထႅင်ႈ တင်းၼမ် ၼႆယဝ်ႉ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “တႄႇၸဵမ်မိူဝ်ႈ သိုၵ်းၵဝ်ႈၵၢင်ႉ ၶဝ်ႈမႃးတီႈဝၢၼ်ႈသွင်ၵေး မိူဝ်ႈဝၼ်းတီႈ 20 ၼၼ်ႉသေ ၵူၼ်းဝၢၼ်ႈ ဢွၼ်ၵၼ်ပၢႆႈဢွၵ်ႇဝၢၼ်ႈမႃး ၸဵမ်မိူဝ်ႈဝၼ်းၼၼ်ႉ မူတ်းယဝ်ႉ။ ၽိူဝ်ႇဝႃႈ ၵူၼ်းဝၢၼ်ႈပွၵ်ႈမႃးၸႂ်းႁိူၼ်းယေး၊ ႁၢၼ်ႉၶၢႆၾူၼ်းၵေႃႈ လႆႈႁၼ်ပဵၼ်ၸိူင်ႉၼႆယဝ်ႉ ၾူၼ်းၼႂ်းႁၢၼ်ႉ ဢၼ်ၶဝ်လႆႈၵႂႃႇ ၼၼ်ႉ ပဵၼ်ၾူၼ်း ဢၼ်ပိူၼ်ႈမႃးမႄးဝႆႉ ပဵၼ်ဢၼ်လီ 30 လုၵ်ႈ။ ယဝ်ႉၵေႃႈ Power Bank ထႅင်ႈလၢႆဢၼ် တင်းမူတ်း လူႉသုမ်းၵႂႃႇမွၵ်ႈၶၼ်ငိုၼ်း 100 သႅၼ်ပျႃးၼႆႉ”- ဝႃႈၼႆ။
ယၢမ်းလဵဝ် တီႈဝၢၼ်ႈသွင်ၵေးၼႆႉ မီးဝႆႉ သိုၵ်းၵဝ်ႈၵၢင်ႉ ယူႇဝႆႉၸွမ်းၼႂ်းဝၢၼ်ႈၼႂ်းသူၼ် လိူဝ်ၼၼ်ႉ ၶိူင်ႈမိၼ်သိုၵ်းမၢၼ်ႈၵေႃႈ မႃးပၼ်ႇလဵပ်ႈ ၵူႈဝၼ်း ၼႆယဝ်ႉ။
“ၵူၼ်းဢၼ်ဢဝ်ၵႂႃႇတႄႉ ပဵၼ်ၽႂ်တႄႉ ဢမ်ႇႁူႉၶႃႈ တီႈဝၢၼ်ႈသွင်ၵေးၼႆႉ မီးဝႆႉသိုၵ်းၵဝ်ႈၵၢင်ႉၶဝ်ယူႇဝႆႉ တင်ႈတႄႇၶဝ် ၶဝ်ႈမႃးမိူဝ်ႈဝၼ်းတီႈ 20 ၼၼ်ႉၶႃႈယဝ်ႉ ႁၢၼ်ႉတေႃႇထိုင်ယၢမ်းလဵဝ် တိုၵ်ႉမီးၶဝ်ယူႇဝႆႉ ၼႂ်းဝၢၼ်ႈၼႂ်းသူၼ်ယူႇ။ ႁဵတ်း ႁိုဝ်လႄႈ ႁၢၼ်ႉၶၢႆၾူၼ်းၼၼ်ႉ ၺႃးသွၵ်ႈတဝ်ၵေႃႈ ဢမ်ႇႁူႉၶႃႈ။ ယဝ်ႉၵေႃႈ ၸွမ်းႁိူၼ်းယေး ၸိူဝ်းၼႆႉၵေႃႈ သိုၵ်းၶဝ် ဢဝ်ၵိၼ်ၶူဝ်းၶွင် ၸိူဝ်းၼႆႉၵေႃႈမီးဢေႃႈ”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ဝၢၼ်ႈသွင်ၵေးၼႆႉ မီးလင်ႁိူၼ်း 400 ပၢႆ ယၢၼ်ဝဵင်း 24 လၵ်း မီးၸဵင်ႇၸၢၼ်းဝၼ်းဢွၵ်ႇ ဝဵင်းသီႇပေႃႉ ယဝ်ႉၵေႃႈ မီးၼႂ်းၵႄႈသီႇပေႃႉ – မိူင်းယႆ။ ယၢမ်းလဵဝ် ၵူၼ်းဝၢၼ်ႈသွင်ၵေး ၵူဝ်ပဵၼ်ပၢင်တိုၵ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉသေ ဢွၼ်ၵၼ်ပၢႆႈၵႂႃႇသွၼ်ႈဝႆႉ တၢင်းဢိူင်ႇမိူင်းၶိူဝ်း၊ ဢိူင်ႇသီႇထွၵ်ႈ ၸိူဝ်းၼႆႉဝႆႉ ဝႃႈၼႆ။
