မိူဝ်ႈၼႆႉ ဝၼ်းတီႈ 25/07/2024 ပီ ယၢမ်းၵၢင်ၼႂ် မွၵ်ႈ 5 မူင်း မၢၵ်ႇတရူၼ်း တူၵ်းသႂ်ႇ တီႈဝတ်ႉလိၼ်လႅင် ၼႂ်းၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းသေ ႁဵတ်းႁႂ်ႈဝတ်ႉဝႃးၽႃသိူဝ်ႇ လူႉၵွႆတင်းၼမ်လၢႆ ၼႆယဝ်ႉ။

ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇတရူၼ်းၶႃႈဢေႃႈ ဢၼ်မႃးတူၵ်းသႂ်ႇ တီႈၵျွင်းလိၼ်လႅင်ၼႆႉ ပဵၼ်မၢၵ်ႇၽႂ် ၸုမ်းလႂ်မႃးပွႆႇတႄႉ ပႆႇလႆႈႁူႉတႅတ်ႈတေႃး။ ၵူၺ်းၵႃႈ ၸူဝ်ႈၶၢဝ်းယၢမ်းၼႆႉ သိုၵ်း RCSS တင်း SSPP ပဵၼ်ပၢင်တိုၵ်းၵၼ်ဝႆႉ ၼႂ်းၸႄႈဝဵင်းလွၵ်ႉၸွၵ်ႇၼႆႉဢေႃႈ။ ယွၼ်ႉမၢၵ်ႇတရူၼ်းၼႆႉသေ တိူဝ်ႉၺႃးႁဵၵ်းမုင်းၵျွင်း၊ ၶူဝ်းၶွင်ၼႂ်းၵၢၼ်ႇ ၼႂ်းၵျွင်း ၸိူဝ်းၼႆႉၵေႃႈ လူမ်ႇ၊ ႁၵ်း လူႉၵွႆမူတ်း”- ဝႃႈၼႆ။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 24 ယၢမ်းၵၢင်ၼႂ်ၸဝ်ႉ မွၵ်ႈ 2 မူင်း ၼၼ်ႉၵေႃႈ မၢၵ်ႇတရူၼ်း တူၵ်းသႂ်ႇတီႈဝၢၼ်ႈတပ်ႉ ဢူး ၼႂ်းၸႄႈဝဵင်းလွၵ်ႉၸွၵ်ႇ တိူဝ်ႉၺႃးဝတ်ႉဝႃးၽႃသိူဝ်ႇလႄႈ ႁိူၼ်းယေးၵူၼ်းမိူင်းလူႉၵွႆ ၸွမ်းလၢႆလင်။ ယဝ်ႉၵေႃႈ တိူဝ်ႉၺႃးမႄႈလုၵ်ႈဢွၼ်ႇလႄႈ ၸဝ်ႈသၢင်ႇဢွၼ်ႇ တူၼ်ၼိုင်ႈ လႆႈမၢတ်ႇၸဵပ်းၸွမ်း။

သိုၵ်း RCSS တင်း SSPP ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းလွၵ်ႉၸွၵ်ႇၼႆႉ မီးမႃး 2 – 3 ဝၼ်းယဝ်ႉ။ ၽွင်းပၢင်တိုၵ်းၼႆႉ သိုၵ်းတင်းသွင်ၾၢႆႇ ၸႂ်ႉပႃးတရူၼ်းပွႆႇမၢၵ်ႇသႂ်ႇၵၼ်လႄႈ ႁဵတ်းႁႂ်ႈတိူဝ်ႉၺႃး ၸဝ်ႈသၢင်ႇဢွၼ်ႇတူၼ်ၼိုင်ႈလႄႈ ၵူၼ်းမိူင်းမၢတ်ႇၸဵပ်း 7 ၵေႃႉ။

လိူဝ်ၼၼ်ႉ မၢၵ်ႇတူၵ်းတိူဝ်ႉသႂ်ႇပႃး ဝတ်ႉဝႃးၽႃသိူဝ်ႇ လူႉၵွႆၸွမ်းထႅင်ႈ 3 လင်၊ ႁိူၼ်းယေးၵူၼ်းမိူင်း ၸိူဝ်းၼႆႉၵေႃႈ လႆႈလူႉၵွႆၵႂႃႇ မွၵ်ႈ 4 လင် ၼႆယဝ်ႉ။