ၼႂ်းလိူၼ်ၼႆႉ တီႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ ဢမ်ႇပဵၼ်ပၢင်တိုၵ်းသေ သိုၵ်းမၢၼ်ႈၸႂ်ႉၶိူင်ႈမိၼ် တင်ႈၸႂ်ပွႆႇမၢၵ်ႇသႂ်ႇ ဢမ်ႇယွမ်း 3 ပွၵ်ႈယဝ်ႉ တုမ်ႉတိူဝ်ႉၵူၼ်းမိူင်း မၢတ်ႇၸဵပ်းလူႉတၢႆ ႁိူၼ်းယေး ႁူင်းႁႅမ်း လူႉၵွႆၼမ်။

ဝၼ်းတီႈ 23/07/2024 ယၢမ်းၵၢင်ၼႂ်ၸဝ်ႉ မွၵ်ႈ 2 မူင်း ၽွင်းၵူၼ်းမိူင်းတိုၵ်ႉၼွၼ်းလပ်းလီယူႇၼၼ်ႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ ၼႂ်းဝဵင်းလၢဝ်ႇၵၢႆး ၸၢၵ်ႇမၢၵ်ႇတိူဝ်ႉၵူၼ်းမိူင်း လူႉတၢႆ 2 ၵေႃႉ၊ မၢတ်ႇၸဵပ်း 3 ၵေႃႉ၊ ႁိူၼ်းယေးလႄႈ ႁူင်းႁႅမ်း လူႉၵွႆ ၸွမ်းထႅင်ႈတင်းၼမ် ၼႆယဝ်ႉ။

မိူၼ်ၼႆ ၼႂ်းဝၼ်းတီႈ 24 ယၢမ်းၵၢင်ၼႂ်ၸဝ်ႉမွၵ်ႈ 3 မူင်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇထႅင်ႈ ၼႂ်းဝဵင်းလၢဝ်ႇၵၢႆး ႁိူၼ်းယေးလူႉၵွႆၼမ် လွင်ႈၵူၼ်းမိူင်းမၢတ်ႇၸဵပ်းလူႉတၢႆတႄႉ ပႆႇမီးၽႂ်ယိုၼ်ယၼ်။

ပူၼ်ႉမႃးမိူဝ်ႈ ဝၼ်းတီႈ 14 ၼၼ်ႉၵေႃႈ ယၢမ်းၵၢင်ၼႂ်ၸဝ်ႉ 2 မူင်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းဝဵင်း လၢဝ်ႇၵၢႆး ၵူၼ်းမိူင်းလူႉတၢႆ ၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈၼႆ သိုဝ်ႇၶၢဝ်ႇ The Kokang ပိုၼ်ၽၢဝ်ႇဝႆႉၼင်ႇၼႆ။

ဢိင်ၼိူဝ် ပၢင်တိုၵ်း ၼႂ်းၸိုင်ႈတႆးပွတ်းႁွင်ႇသေ ၸွမ်းၼင်ႇ မိူင်းၶႄႇတုၵ်းယွၼ်းမႃးၼၼ်ႉ ဝၼ်းတီႈ 19 လိူၼ်ၼႆႉ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ၵိုတ်းတိုၵ်း ၵမ်းထူၼ်ႈသွင် တေႃႇထိုင်လိူၼ်သဵင်ႈ၊ ၵူၺ်းၵႃႈ တေႃႇထိုင်ဝၼ်းမိူဝ်ႈၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉႁၢဝ်ႈႁႅင်း။