ၵူၼ်းလႃႈသဵဝ်ႈ သၢမ်မႄႈလုၵ်ႈ ၺႃးၸၢၵ်ႇမၢၵ်ႇၸဵပ်းႁႅင်း ပၢႆႈႁွတ်ႈထိုင်ၵေးသီး  

တႄႇဢဝ် ဝၼ်းတီႈ 2 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ MNDAA ႁႅၼ်းသိုၵ်း လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸႄႈဝဵင်းလႃႈသဵဝ်ႈသေ မၢၵ်ႇလူင်တူၵ်းသႂ်ႇၵူၼ်းမိူင်း လူႉတၢႆမၢတ်ႇၸဵပ်းၼမ်။ ၼႂ်းၼၼ်ႉ ၵူၼ်းထဝ်ႈလႄႈ ၼၢင်းယိင်း မီးလွင်ႈတုမ်ႉတိူဝ်ႉၼမ်။ မၢင်ႁိူၼ်း ဢွၼ်ၵၼ် ယူႇၼႂ်းလုၵ်းထႅင်ႉလုၵ်းပဵမ်ႇဝႆႉၵေႃႈ ဢမ်ႇလွတ်ႈ။

မိူၼ်ၼင်ႇ တီႈပွၵ်ႉ 4  ဝဵင်းလႃႈသဵဝ်ႈၼႆႉ မၢၵ်ႇလူင်တူၵ်းသႂ်ႇႁိမ်းလုၵ်းထႅင်ႉ ဢၼ်သၢမ်ၵေႃႉမႄႈလုၵ်ႈ မူၵ်ႈသွၼ်ႈယူႇၸွမ်းၵၼ်ၼၼ်ႉ ၸၢၵ်ႇ မၢၵ်ႇတိူဝ်ႉသႂ်ႇၶဝ် ဢမ်ႇထိုင်တီႈလူႉတၢႆသေတႃႉ မီးလွင်ႈမၢတ်ႇၸဵပ်းႁႅင်း။ ၵေႃႉပဵၼ်လုၵ်ႈယိင်းယႂ်ႇ လႆႈတိူဝ်ႉမၢတ်ႇၸဵပ်းႁႅင်းဝႆႉ ယၢမ်ႈလဵဝ် ပၢႆႈၽေးႁွတ်ႈထိုင်ဝႆႉ တီႈဝဵင်းၵေးသီး။

ၶၢဝ်းတၢင်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ယိုဝ်းၵၼ်တီႈၸႄႈဝဵင်းလႃႈသဵဝ်ႈၼႆႉ မၢၵ်ႇလူင်တူၵ်းသႂ်ႇ ၵူႈႁူးၵူႈတၢင်း ၸွမ်းၼႂ်းပွၵ်ႉၼႂ်းဢိူင်ႇ ဢၼ်လွတ်ႈမၢၵ်ႇလူင်တူၵ်းသႂ်ႇတႄႉ ဢမ်ႇၶႂ်ႈမီးယဝ်ႉ။ ႁိူၼ်းယေး ဝတ်ႉဝႃးၽႃႇသိူဝ်ႇ လူႉၵွႆၸွမ်းထႅင်ႈၼမ်။ ၵူၼ်းမိူင်း လႆႈပၢႆႈဢွၵ်ႇမိူင်းၵေႃႈၼမ် ၵူၼ်းမၢတ်ႇၸဵပ်း  လူႉတၢႆၵေႃႈ မီးၵူႈဝၼ်း။

ဝၼ်းတီႈ 20/07/2024 ယၢမ်းၵၢင်ၼႂ် 9 မူင်း မၢၵ်ႇလူင်တူၵ်းသႂ်ႇႁိမ်းလုၵ်းထႅင်ႉ ဢၼ်ၼၢင်းယိင်း 3 ၵေႃႉမႄႈလုၵ်ႈ မူၵ်းယူႇဝႆႉၼၼ်ႉ ၵေႃႉပဵၼ်လုၵ်ႈယိင်းၵေႃႉယႂ်ႇ တိူဝ်ႉၸၢၵ်ႇမၢၵ်ႇ မၢတ်ႇၸဵပ်းႁႅင်း မိူၼ်ၼင်ႇ တီႈၼႃႈဢူၵ်းၾၢႆႇသၢႆႉလႄႈ တီႈႁူဝ်တႃ မၼ်းၼၢင်း။ ၵေႃႉပဵၼ်မႄႈၵေႃႈ မၢတ်ႇတိူဝ်ႉတီႈၼႃႈၽၢၵ်ႇ။ ၵေႃႉပဵၼ် လုၵ်ႈယိင်းလဵၵ်ႉတႄႉ ဢမ်ႇတၼ်းတိူဝ်ႉၺႃးသင်။ ၵေႃႉပဵၼ်လုၵ်ႈယိင်းၵေႃႉယႂ်ႇ လၢတ်ႈၼႄဝႆႉၼင်ႇၼႆ –

“ဢၼ်တိူဝ်ႉမၢတ်ႇၼႆႉ ပဵၼ်သွင်ၵေႃႉ မႄႈႁဝ်းလႄႈ တင်းၶႃႈ။ မႄႈႁဝ်းတႄႉ တိူဝ်ႉမႅၼ်ႈၼႃႈၽၢၵ်ႇ ဢိတ်ႉၼိုင်ႈၵူၺ်း ။ ၶႃႈတႄႉ တိူဝ်ႉၺႃးၼမ်ဢေႃႈ တိူဝ်ႉၸွမ်းဢူၵ်းလႄႈၼႃႈတႃ ။ မိူဝ်ႈႁဝ်းၶႃႈ တႄႇ တိူဝ်ႉၸၢၵ်ႇမၢၵ်ႇၼၼ်ႉတႄႉ တူၵ်းၸႂ်တူၵ်းၶေႃးသေ လႅၼ်ႈႁႃႁူင်းယႃ လႃႈသဵဝ်ႈယူႇ ၵမ်းၼိုင်ႈ။ ဝၢႆး ၵႂႃႇ ၼႄမေႃယႃယဝ်ႉၵေႃႈ ႁိုဝ်တေႁတ်းယူႇသဝ်းယဝ်ႉ ဢွၼ်ၵၼ်ႁႃတၢင်းပၢႆႈဢွၵ်ႇမႃး တၢင်းၵေးသီး ၼႆႉၶႃႈယဝ်ႉ”- ဝႃႈၼႆ။  

ၼႂ်းၶဝ် 3 ၵေႃႉ မႄႈလုၵ်ႈၼႆႉ ၵေႃႉပဵၼ်လုၵ်ႈယိင်းယႂ်ႇ ၸိုဝ်ႈႁွင်ႉ မၼေႃႇသပေႇ ဢႃယု 27 ပီ ၊ ၼွင်ႉ ယိင်းသမ်ႉ ဢႃယု 25 ပီလႄႈ ၵေႃႉပဵၼ်မႄႈ ဢႃယု 50 ပီ ပဵၼ်ၵူၼ်း ၼႂ်းပွၵ်ႉ 4 (ၼႃႈလိၼ်မၢႆ 16) သဵၼ်ႈတၢင်းၵျၢၼ်ႇသိတ်ႉတႃး ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ သၢမ်ၵေႃႉမႄႈလုၵ်ႈၼႆႉ ပိုတ်ႇႁၢၼ်ႉ ၶၢႆၵုၼ်ႇယွႆႈသေ ႁႃၵိၼ်လဵင်ႉတွင်ႉ။ ယၢမ်းလဵဝ် ယွၼ်ႉၵိုင်ႉၵၢင်ႉလႆႈပၢႆႈၽေးသိုၵ်းလႄႈ ဢမ်ႇတၼ်းလႆႈ ဢမ်ႇတၼ်းလႆႈသင်ပၢႆႈမႃး ပဵၼ်ဢၼ်မႆႈၸႂ်တီႈႁိူၼ်းတီႈယေးဝႆႉ ၵူဝ်ၽူႈလၵ်ႉၸၵ်ႉၶုတ်ႈၶဝ်ႈတဝ် ဝႃႈ ၼႆ။

မိူဝ်ႈမၢၵ်ႇလူင် တူၵ်းတႅၵ်ႇႁိမ်းၶဝ် 3 မႄႈလုၵ်ႈၼႆႉ ဢမ်ႇထိုင်တီႈလႆႈလူႉသုမ်းသၢႆၸႂ်သေတႃႉ ယွၼ်ႉ မၢၵ်ႇလူင်တူၵ်းၸမ်လႄႈ မီးလွင်ႈမၢတ်ႇၸဵပ်းၸွမ်းၸိူင်ႉၼႆၼႆႉ ထိုင်မိူဝ်ႈလဵဝ်တိုၵ်ႉမီးၸႂ်ၵူဝ်ႁႄဝႆႉ။ ၵေႃႉပဵၼ်မႄႈၵေႃႈ သမ်ႉမီးတၢင်းပဵၼ်ႁူဝ်ၸႂ်ဝႆႉလႄႈ ယိင်ႈၶႅၼ်း ႁဵတ်းႁႂ်ႈတုမ်ႉတိူဝ်ႉပၢႆးယူႇလီမၼ်း ၼၢင်းထႅင်ႈ – ၵေႃႉပဵၼ်လုၵ်ႈယိင်းယႂ်ႇ သိုပ်ႇလၢတ်ႈၼႄဝႆႉၼင်ႇၼႆ –

“မိူဝ်ႈမၢၵ်ႇမႃးတႅၵ်ႇသႂ်ႇၼႆႉ တူၵ်းၸႂ်ၵူဝ်တႄႉတႄႉၶႃႈ။ ပေႃးဢမ်ႇႁတ်းတူင်ႉတူဝ်ယဝ်ႉ။ ၵူၺ်းၵႃႈ မႄႈ လႄႈၼွင်ႉၶႃႈတႄႉ ဢမ်ႇပဵၼ်သင် ၶႅၼ်းၸႂ်ၶႃႈဢိတ်ႉၼိုင်ႈ။ ပေႃးဢမ်ႇၼၼ် မႆႈၸႂ်ၼႃႇ။ မိူၼ်ၼင်ႇ မႄႈႁဝ်းၵေႃႈ ပဵၼ်တၢင်းပဵၼ်ယဵဝ်ႈဝၢၼ်ဝႆႉလႄႈ တၢင်းပဵၼ်ႁူဝ်ၸႂ်။ ယွၼ်ႉၼၼ် မႄႈႁဝ်းၼႆႉ ပေႃး ငိၼ်းသဵင်ၵွင်ႈၼႆ တူၵ်းၸႂ်ၵူဝ်ႁႄပေႃးသၼ်ႇဢေႃႈ။ ၶႃႈၵေႃႈ တူၵ်းၸႂ်မိူၼ်ၼၼ်ယဝ်ႉ” – ဝႃႈၼႆ။  

သင်ပဵၼ်လႆႈတႄႉ ၶႂ်ႈႁႂ်ႈဝၢၼ်ႈမိူင်းႁဝ်းၵတ်းယဵၼ် ၶႂ်ႈႁႂ်ႈၵူၼ်းမိူင်းႁဝ်း လႆႈယူႇမူၼ်ႈမူၼ်ႈသိူဝ်းသိူဝ်း ၸွမ်းၵၼ်ၶိုၼ်း။ ဢမ်ႇၶႂ်ႈႁႂ်ႈမီးပၢင်တိုၵ်းၸိူင်ႉၼႆ။ ယၢမ်းလဵဝ် လႆႈၽၢတ်ႇႁိူၼ်းယေး ဢမ်ႇမီးၵၢၼ် ငၢၼ်းၸိူင်ႉၼႆ တႃႇၶၢဝ်းယၢဝ်း တေႁဵတ်းႁိုဝ်ယူႇၵိၼ်ၼႆ ၵူၼ်းပၢႆႈၽေးသိုၵ်း ဢွၼ်ၵၼ်ၶၢင်းပွင်ႉၼင်ႇၼႆ။

လိူဝ်ၼၼ်ႉ ၵူၼ်းၸၢႆးတီႈဝၢၼ်ႈမႄႈႁၢၼ်ႇ ၸႄႈဝဵင်းလႃႈသဵဝ်ႈ ဢႃယု မွၵ်ႈ 70 တိူဝ်ႉၸၢၵ်ႇမၢၵ်ႇ မၢတ်ႇ ၸဵပ်းႁၢဝ်ႈႁႅင်း။ ယၢမ်းလဵဝ် မုင်ႉႁေႃႁိူၼ်းၶဝ် ဢွၼ်ၵၼ်ပၢႆႈႁွတ်ႈထိုင်ဝႆႉ ဝဵင်းၵေးသီးသေ ယူတ်းယႃ တူဝ်ဝႆႉတီႈႁူင်းယႃ ၊ ယွၼ်ႉဢႃယုၵေႃႈသုင်လႄႈ တႃႇၽႃႇတတ်း ဢဝ်ၸၢၵ်ႇမၢၵ်ႇဢွၵ်ႇ ႁႂ်ႈမူတ်းမူတ်းၼၼ်ႉ ပႆႇၸၢင်ႈဢဝ်ဢွၵ်ႇ ယွၼ်ႉၵူဝ်လိူတ်ႇ ဢွၵ်ႇၼမ်သေ လူႉသဵင်ႈသၢႆၸႂ်ၵႂႃႇ ဝႃႈၼႆ။

ဝၼ်းတီႈ 21/07/2024 ၼၼ်ႉၵေႃႈ မၢၵ်ႇလူင် တူၵ်းသႂ်ႇ တီႈဝတ်ႉၼႃးမူၼ်း ၸႄႈဝဵင်းလႃႈသဵဝ်ႈ ၸၢၵ်ႇမၢၵ်ႇတိူဝ်ႉသႂ်ႉ ၸဝ်ႈၸၢင်း လူႉလွၼ်ႇတူၼ်ၼိုင်ႈ ၼႆယဝ်ႉ။