သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉ မႄး ၶၢဝ်းတၢင်းၼိုင်ႈလိူၼ်မႃးၼႆႉ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလူႉတၢႆၸမ် 100 ယဝ်ႉ – ၽူႈၸွႆႈထႅမ် ၸုမ်းပရႁိတလၢတ်ႈ။

တႄႇဢဝ် ဝၼ်းတီႈ 25/06/2024 ၼၼ်ႉမႃးႁၢၼ်ႉတေႃႇထိုင် ယၢမ်းလဵဝ်ၼႆႉ သိုၵ်းတဢၢင်း TNLA တင်း PDF ႁူမ်ႈ ၵၼ်သေ လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ သွင်ၾၢႆႇၸႂ်ႉမၢၵ်ႇလူင်၊ တရူၼ်း ၸိူဝ်းၼႆႉ ပွႆႇမၢၵ်ႇၸူးၵၼ်တင်းၼမ် ယဝ်ႉၵေႃႈ ၾၢႆႇသိုၵ်း မၢၼ်ႈ ၸႂ်ႉပႃးၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇထႅင်ႈလႄႈ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ ၸွမ်းၼႂ်းၵႄႈပၢင်တိုၵ်းၼႆႉ ၸမ် 100 ယဝ်ႉ ဝႃႈၼႆ။  

ၽူႈၶဝ်ႈၸုမ်း ပရႁိတ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ႁဝ်းၶႃႈ ၵႂႃႇတေႃႉတူဝ်တၢႆ မိူဝ်ႈၼႆႉတႄႉ တေပဵၼ်ၵူၼ်းတၢႆဝႆႉ မိူဝ်ႈဝႃးတင်း မိူဝ်ႈသိုၼ်းၼၼ်ႉၶႃႈဢေႃႈ။ မိူဝ်ႈၼႆႉၵေႃႈ မီးထႅင်ႈ တီႈၼမ်ႉၸဵတ်းလိၼ်း 2 ၵေႃႉ။ လွႆပဝ်း 4 ၵေႃႉ။ မိူဝ်ႈဝႃးတင်း မိူဝ်ႈသိုၼ်းတႄႉ မီး 23 ၵေႃႉ။ လွင်ႈၵူၼ်းတၢႆၼႆႉ ယူႇတီႈ ႁဝ်းၶႃႈ လႆႈၵဵပ်းသဵၼ်ႈမၢႆဝႆႉ မီးၸမ် 100 ယဝ်ႉ ၸူဝ်ႈပဵၼ်ပၢင်တိုၵ်းၼႆႉမႃး။ တၢင်ႇၸုမ်း ဢၼ်လႆႈၵဵပ်းဝႆႉတႄႉ တေမီးယူႇၼၼ်ႉတႄႉ တေမီးႁူဝ်ၵူၼ်းၵႃႈႁိုဝ်တႄႉ ႁဝ်းၶႃႈပႆႇႁူႉ”- ဝႃႈၼႆ။

ယၢမ်းလဵဝ် ယူႇတီႈ ၵူၼ်းမိူင်းၵျွၵ်ႉမႄးတႄႉ ဢွၼ်ၵၼ်မႆႈၸႂ်ဝႆႉ သင်ဝႃႈ ပၢင်တိုၵ်းၼႆႉ သိုပ်ႇပဵၼ်ၶၢဝ်း ယၢဝ်းၸိုင် ၵူၼ်းမိူင်းၸိူဝ်းပၢႆႈၽေးဝႆႉၼၼ်ႉတႄႉ မႆႈၸႂ်ၵူၼ်းတၢင်းလင် ဢၼ်ၵိုတ်းၶမ်ဝႆႉသေ ၵူဝ်တိူဝ်ႉၺႃး ၸၢၵ်ႇမၢၵ်ႇလူႉတၢႆ ၼႂ်းပၢင်တိုၵ်းၸိူဝ်းၼႆႉထႅင်ႈ ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ မၢၵ်ႇလူင်ၵႆႉတူၵ်းၼႂ်းဝဵင်းလႄႈ ၵူၼ်းမိူင်းဢမ်ႇႁတ်း ယူႇၵိၼ်ၸွမ်းဝဵင်း။ ၵမ်ႈၽွင်ႈ ဢွၼ်ၵၼ်ပၢႆႈမႃးတၢင်းၸိုင်ႈတႆး ပွတ်းၸၢၼ်း။ ၵမ်ႈၽွင်ႈ ပၢႆႈၵႂႃႇသွၼ်ႈဝႆႉ ၸွမ်း ဝတ်ႉဝႃးၽႃသိူဝ်ႇ တီႈယၢၼ်ၵႆဝဵင်း။ ပေႃးမႃးႁုပ်ႈသဵၼ်ႈမၢႆ ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄးၼႆႉ မီးၸမ် 10,000 ယဝ်ႉ ဝႃႈၼႆ။