ၽွင်းၵူၼ်းမိူင်း ၼွၼ်းလပ်းယဵၼ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလၢဝ်ႇၵၢႆးထႅင်ႈ တုမ်ႉတိူဝ်ႉ ႁိူၼ်းယေး ၵူၼ်းမိူင်းလူႉၵွႆၼမ် ၼႂ်းလိူၼ်ၼႆႉၵူၺ်း မႃးပွႆႇမၢၵ်ႇ ဢမ်ႇယွမ်း 2 ပွၵ်ႈယဝ်ႉ။

ဝၼ်းတီႈ 23/07/2024 ယၢမ်းၵၢင်ၼႂ်ၸဝ်ႉ 1 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် တင်ႈၸႂ်ပွႆႇမၢၵ်ႇ သႂ်ႇထႅင်ႈ တီႈပွၵ်ႉတုင်သျဵင်ႇ (တုံချိန်ရပ်ကွက်) ၼႂ်းဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ ႁိူၼ်းယေး ၊ ႁူင်းႁႅမ်းလႄႈ ႁၢၼ်ႉတၢင်းၶၢႆ လူႉၵွႆၼမ်၊ လွင်ႈၵူၼ်းမၢတ်ႇၸဵပ်းလူႉတၢႆတႄႉ ပႆႇမီးၽႂ်ယိုၼ်ယၼ် ဝႃႈၼႆ။

ၵူၼ်းပိုၼ်ႉတီႈ ဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇ။ တင်းမူတ်းမႃးပွႆႇလၢႆလုၵ်ႈတႄႉ ဢမ်ႇႁူႉၶႃႈ။ တိူဝ်ႉၺႃး ႁၢၼ်ႉတၢင်းၶၢႆ ႁိမ်းႁူင်းႁႅမ်း CKC ၼၼ်ႉ လူႉၵွႆတင်းၼမ် ဢေႃႈ။ လွင်ႈတုမ်ႉတိူဝ်ႉၵူၼ်းလူႉတၢႆမၢတ်ႇၸဵပ်းတႄႉ ပႆႇႁူႉၶႃႈ”- ဝႃႈၼႆ။

မိူဝ်ႈဝၼ်းတီႈ 14 ပူၼ်ႉမႃးၼႆႉၵေႃႈ ယၢမ်းၵၢင်ၶိုၼ်း ၽွင်းၵူၼ်းမိူင်းလၢဝ်ႇၵၢႆး ၼွၼ်းလပ်းလီၼၼ်ႉ ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈ တင်ႈၸႂ်ပွႆႇမၢၵ်ႇသႂ်ႇ ၼႂ်းဝဵင်း ၵူၼ်းမိူင်းလူႉတၢႆ ၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ – The Kokang ပိုၼ်ၽၢဝ်ႇဝႆႉၼင်ႇၼႆ။

မိူၼ်ၼႆ တီႈဝဵင်းသႅၼ်ဝီၵေႃႈ ဢမ်ႇပဵၼ်ပၢင်တိုၵ်းသေ သိုၵ်းမၢၼ်ႈတင်ႈၸႂ် ပွႆႇမၢၵ်ႇသႂ်ႇ ၼႂ်းၵၢင်ဝဵင်းႁိမ်းၵၢတ်ႇ၊ ၵူၼ်းမိူင်းလူႉတၢႆ 10 ပၢႆ ၊ မၢတ်ႇၸဵပ်းထႅင်ႈ မွၵ်ႈ 30 ၊ ၼႂ်းၵူၼ်းလူႉတၢႆၼၼ်ႉ ပႃးၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသႅၼ်ဝီ ဝႃႈၼႆ။

ၸွမ်းၼင်ႇ မိူင်းၶႄႇတုၵ်းယွၼ်းသေ တႄႇဝၼ်းတီႈ 19 တေႃႇထိုင် လိူၼ်ၼႆႉသဵင်ႈ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇၵိုတ်းတိုၵ်းဝႆႉ။ ၵူၺ်းၵႃႈ ၼႂ်းၸႄႈဝဵင်းလႃႈသဵဝ်ႈၼႆႉ သဵင်ၵွင်ႈပႆႇယဵၼ် ၵူၼ်းမိူင်းတိုၵ်ႉပၢႆႈဢွၵ်ႇ ဝဵင်းထႅင်ႈတင်းၼမ်။