ပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA တီႈဝဵင်းၵျွၵ်ႉမႄး ၶၢဝ်းတၢင်း 3 ဝၼ်းၼႆႉၵူၺ်း ၵူၼ်းမိူင်းလူႉတၢႆၸွမ်း ဢမ်ႇယွမ်း 15 ၵေႃႉယဝ်ႉ ဝႃႈၼႆ။
ၼႂ်းဝၼ်းတီႈ 20-22/07/2024 ၶၢဝ်းတၢင်း 3 ဝၼ်းမႃးၼႆႉ သိုၵ်းမၢၼ်ႈတင်း သိုၵ်းတဢၢင်း သိုပ်ႇပဵၼ်ပၢင် တိုၵ်းၵၼ်ထႅင်ႈ သွင်ၾၢႆႇၸႂ်ႉၶိူင်ႈၵွင်ႈလူင် ယိုဝ်းတိုၵ်းၵၼ် တၢင်းပွၵ်ႉသွင် ႁိမ်းတိၼ်လွႆ ၼမ်ႉၸဵတ်းလိၼ်း၊ ၼမ်ႉႁူးတွင်း၊ လွႆပဝ်း၊ ပၢင်မွင်လႄႈ ၸွႆးၵုင်း ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 10 ပၢႆ ၊ မၢတ်ႇၸဵပ်း ၸွမ်းထႅင်ႈတင်းၼမ် ၼႆယဝ်ႉ။
ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ဝၼ်းသဝ်၊ ဝၼ်းတိတ်ႉ ပူၼ်ႉမႃးၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ၼပ်ႉပၢၵ်ႇသေ သိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်းထႅင်ႈၶႃႈဢေႃႈ။ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလူႉတၢႆ 10 ပၢႆ ။ ၶၢပ်ႈတူဝ်တၢႆ ၵူၼ်းမိူင်း မၢင်တီႈတႄႉ ပႆႇၸၢင်ႈၵႂႃႇတေႃႉၶႃႈ။ ယဝ်ႉၵေႃႈ မၢတ်ႇ ၸဵပ်းၸွမ်းထႅင်ႈၵေႃႈ မီးၼမ်ဢေႃႈ”- ဝႃႈၼႆ။
ၶၢဝ်းတၢင်း ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA တီႈဝဵင်းၵျွၵ်ႉမႄးၼႆႉ တႄႇမႃး မိူဝ်ႈဝၼ်းတီႈ 25 လိူၼ် ၵျုၼ်ႊပူၼ်ႉမႃးၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် တေတဵမ်လိူၼ်ယဝ်ႉ ပၢင်တိုၵ်းပႆႇယဵၼ် ႁဵတ်းႁႂ်ႈၵူၼ်းမိူင်းလူႉတၢႆၸွမ်း ၼႂ်းၵႄႈပၢင်တိုၵ်း မီးမွၵ်ႈ 80 ၵေႃႉယဝ်ႉ လိူဝ်ၼၼ်ႉ မၢတ်ႇၸဵပ်းထႅင်ႈတင်းၼမ် – ၽူႈၶဝ်ႈၸုမ်းၸွႆႈထႅမ် တူင်ႇဝူင်းၵူၼ်း ၵေႃႉၼိုင်ႈလၢတ်ႈ။
ယွၼ်ႉပၢင်တိုၵ်းၼႆႉသေ ၵူၼ်းမိူင်းၼပ်ႉႁူဝ်မိုၼ်ႇ လႆႈငိူင်ႉပၢႆႈၽေးသိုၵ်းဝႆႉ ယၢမ်းလဵဝ် ယၢပ်ႇၽိုတ်ႇၶဝ်ႈ ၼမ်ႉတၢင်း ၵိၼ်လႄႈ ယႃႈယႃ ႁၢဝ်ႈႁႅင်းၼႆ – ၽူႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ