ဝၼ်းတီႈ 21/07/2024 မၢၵ်ႇလူင် တူၵ်းသႂ်ႇ တီႈဝတ်ႉၼႃးမူၼ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႉ ၸဝ်ႈၸၢင်း လူႉလွၼ်ႇတူၼ်ၼိုင်ႈ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ် ႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မၢၵ်ႇလူင် (ရှော့တိုက်တုံး) တူၵ်းသႂ်ႇ တိူဝ်ႉၺႃးၸဝ်ႈၸၢင်း လွၼ်ႇပႃးၼိုင်ႈၶႃႈ။ ပၢင်တိုၵ်းၼႆႉ ပဵၼ်ၵူႈဝၼ်းၶႃႈယဝ်ႉ မၢၵ်ႇၵေႃႈ တူၵ်းၵူႈ ဝၼ်းၶႃႈယဝ်ႉ။ ၶိူင်ႈမိၼ်ၵေႃႈ မႃးပွႆႇမၢၵ်ႇၵူႈဝၼ်းယဝ်ႉၶႃႈ။ ပေႃးပၢင်တိုၵ်းၵျၢမ်းၵေႃႈ ၶိူင်ႈမိၼ်ၵေႃႈ မႃးပွႆႇမၢၵ်ႇၶႃႈယဝ်ႉ။ ၶႂ်ႈဝႃႈ တူၵ်းၵူႈပွၵ်ႉယဝ်ႉၶႃႈ။ ပွၵ်ႉလႂ် ဢၼ်လွတ်ႈမၢၵ်ႇတႄႉ ဢမ်ႇမီးယဝ်ႉယူဝ်ႉ တီႈလႃႈသဵဝ်ႈၼႆႉ”- ဝႃႈၼႆ။

တႄႇဢဝ် ဝၼ်းတီႈ 2 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ MNDAA ႁႅၼ်းသိုၵ်း လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း တီႈၸႄႈဝဵင်းလႃႈသဵဝ်ႈ မၢၵ်ႇလူင်တူၵ်းသႂ်ႇၵူၼ်းမိူင်းလူႉတၢႆ ဢမ်ႇယွမ်း 40 ၵေႃႉ၊ မၢတ်ႇၸဵပ်း 40 ပၢႆ ၵူၼ်းမိူင်းပၢႆႈၽေးသိုၵ်း ၼပ်ႉႁူဝ်မိုၼ်ႇ ၼႆယဝ်ႉ။

မိူဝ်ႈဝၼ်းတီႈ 14 ယၢမ်းၵၢင်ဝၼ်း ယူႇတီႈ သိုၵ်းၵဝ်ႈၵၢင်ႇ MNDAA ပိုၼ်ၽၢဝ်ႇ ၵိုတ်းတိုၵ်းဝႆႉ ၸူဝ်ႈၶၢဝ်း တေႃႇထိုင် ဝၼ်းတီႈ 18 ယၢမ်းၵၢင်ၶိုၼ်း ထိုင်မႃးဝၼ်းတီႈ 19 ၶိုၼ်းသိုပ်ႇပိုၼ်ၽၢဝ်ႇ ၵိုတ်းတိုၵ်းထႅင်ႈ တေႃႇထိုင်လိူၼ်ၼႆႉသဵင်ႈ ဝႃႈၼႆသေတႃႉ ၵူၺ်းၵႃႈ တီႈဝဵင်းလႃႈသဵဝ်ႈတႄႉ သဵင်ၵွင်ႈယင်းပႆႇယဵၼ် တိုၵ်ႉတႅၵ်ႇယူႇၵူႈဝၼ်း ဝႃႈၼႆ။

ၸူဝ်ႈပဵၼ်ပၢင်တိုၵ်း တီႈဝဵင်းလႃႈသဵဝ်ႈၼႆႉမႃး ၸဵမ်လႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊ ၸိူဝ်းၼႆႉ ထုၵ်ႇတတ်းၶၢတ်ႇ ႁၢၼ်ႉတေႃႇထိုင်ယၢမ်းလဵဝ် ၵပ်းသိုပ်ႇတိတ်းတေႃႇၵၼ် ဢမ်ႇလႆႈ ပဵၼ်ဢၼ်ယၢပ်ႇၽိုတ်ႇႁႅင်း ၼႆယဝ်ႉ။