သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA တိုၵ်ႉသိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈဝဵင်းၵျွၵ်ႉမႄး ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း မၢတ်ႇၸဵပ်းလူႉတၢႆ ၸွမ်းၼႂ်းၵႄႈပၢင်တိုၵ်းထႅင်ႈ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 4 ၶူပ်ႇ ၵေႃႉ ၼိုင်ႈ။

ဝၼ်းတီႈ 21/07/2024 ယၢမ်းၵၢင်ဝၼ်း မၢၵ်ႇလူင်တူၵ်းတႅၵ်ႇ ၼႂ်းဝၢၼ်ႈႁူးတွင်း ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉၺႃး လုၵ်ႈဢွၼ်ႇဢႃယု 4 ၶူပ်ႇ ထိုင်တီႈတိၼ်ပုတ်း မၢတ်ႇၸဵပ်းႁႅင်း လိူတ်ႈဢွၵ်ႇၼမ် လႆႈလူႉသဵင်ႈၵႂႃႇ ယၢမ်း ၵၢင်ၶမ်ႈ ယွၼ်ႉပၢင်တိုၵ်းပဵၼ်ႁႅင်း ဢမ်ႇထၢတ်ႇလႄႈ ယူႇတီႈ ၸုမ်းပရႁိတ ၼႂ်းပိုၼ်ႉတီႈဢမ်ႇၸၢင်ႈၶဝ်ႈၸူး ၸွႆႈထႅမ် ၼႆယဝ်ႉ။

မိူၼ်ၼႆၼင်ႇၵဝ်ႇ ဝၼ်းၼၼ်ႉၵူၺ်း မၢၵ်ႇလူင်တူၵ်းတႅၵ်ႇ ၼႂ်းပွၵ်ႉသွင် ၼမ်ႉတုမ် ၸၢၵ်ႇမၢၵ်ႇတိူဝ်ႉၼၢင်းယိင်း ၵေႃႉၼိုင်ႈလူႉတၢႆ ။ ပူၼ်ႉမႃး မိူဝ်ႈဝၼ်းတီႈ 20 ၼၼ်ႉၵေႃႈ ၼၢင်းယိင်းၵေႃႉၼိုင်ႈ ၺႃးမၢၵ်ႇၵွင်ႈသေ လူႉတၢႆဝႆႉ တီႈႁူင်းႁဵၼ်းမၢႆ 10 ဝႃႈၼႆ။

ၼႂ်းသွင်သၢမ်ဝၼ်းမႃးၼႆႉ သိုၵ်းမၢၼ်ႈတင်း သိုၵ်းတဢၢင်း TNLA  ပဵၼ်ပၢင်တိုၵ်းၵၼ် ၼႂ်းဝဵင်းၵျွၵ်ႉမႄး ႁၢဝ်ႈႁႅင်း မိူၼ် ၼင်ႇ ၼႂ်းပွၵ်ႉသွင် ၵျွၵ်ႉတွင်ႇ ၊ ပွၵ်ႉၵုင်း ၼမ်ႉတုမ် ၊ ပွၵ်ႉသၢမ် မၢၼ်ႈၼႃးတင်း ဝၢၼ်ႈၼမ်ႉ ႁူးတွင်း ၊ ၸေႃးတိၵုင်း ဢိၵ်ႇပႃးထႅင်ႈ တၢင်းပၢင်ပဝ်း ပၢင်မွင် ၊ ၼွင်ပိင်ဢွၼ်ႇလႄႈ ၸွႆးၵုင်း ၸိူဝ်းၼႆႉ။

မိူၼ်ၼင်ႇ တၢင်းလွႆပဝ်း ပွၵ်ႉပႅတ်ႇ ၸိူဝ်းၼၼ်ႉၵေႃႈ သဵင်ၵွင်ႈတႅၵ်ႇႁႅင်း၊ ၵူၼ်းပိုၼ်ႉတီႈလၢတ်ႈဝႃႈ သိုၵ်း တဢၢင်း လေႃႇတိုၵ်း တပ်ႉသိုၵ်းမၢၼ်ႈၶမယ 501 ၊ 502 လႄႈ ၸၵၶ 1 ၊ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ် တိုၵ်း Jet Fighter မႃးပွႆႇမၢၵ်ႇယိုဝ်းၸွႆႈ ႁၢဝ်ႈႁႅင်း၊ မၢၵ်ႇလူင်တူၵ်းတႅၵ်ႇတိူဝ်ႉႁိူၼ်းယေးၵူၼ်းမိူင်း လူႉၵွႆၼမ် ႁူဝ်ၼပ်ႉတႅတ်ႈတေႃးတႄႉ ပႆႇမီးၽႂ်ယိုၼ်ယၼ်။

ၼႂ်းဝၼ်းတီႈ 22 ၼႆႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် တိုၵ်ႉပၼ်ႇလဵပ်ႈၼိူဝ်ဝဵင်းထႅင်ႈ။ ၽွင်းပၢင်တိုၵ်းပဵၼ် ႁၢဝ်ႈႁႅင်း ယူႇ ၼႆႉ ယူႇတီႈ သိုၵ်းတဢၢင်း ဢွၵ်ႇလိၵ်ႈပၼ်ၾၢင်ႉဝႆႉဝႃႈ ၵူၼ်းမိူင်းၵျွၵ်ႉမႄး တႄႇယၢမ်းၵၢင် ၶမ်ႈ 6 မူင်းထိုင် ၵၢင်ၼႂ် 6 မူင်း တေဢမ်ႇလႆႈဢွၵ်ႇႁိူၼ်း၊ ယွၼ်ႉလွင်ႈတၢင်းၵူႈလွင်ႈလွင်ႈသေ သင်တေဢွၵ်ႇတၢင်းၼွၵ်ႈၼႆ တေလႆႈပွင်ႇၶၢဝ်ႇတီႈသိုၵ်းတဢၢင်း ဢွၼ်တၢင်း ဝႃႈၼႆ။

ယဝ်ႉၵေႃႈ တေဢမ်ႇလႆႈတၢင်ႇၵႃႈၶၼ်သေ ၶၢႆတေႃႇၵၼ်၊ သင်ဢမ်ႇႁဵတ်းၸွမ်းၶေႃႈပၼ်ၾၢင်ႉၸိုင် တေဢဝ်တၢင်းၽိတ်း ၸွမ်းၼင်ႇ ၸုမ်း PSLF/TNLA မၵ်းမၢႆဝႆႉ ဝႃႈၼႆ။

တီႈဝဵင်းၵျွၵ်ႉမႄးၼႆႉ တႄႇဝၼ်းတီႈ 25 လိူၼ်ၵျုၼ်ႊမႃး သိုၵ်းတဢၢင်း ၶဝ်ႈလေႃႇတိုၵ်း သိုၵ်းမၢၼ်ႈ ႁၢဝ်ႈႁႅင်း ႁိုင်မႃး ၶၢဝ်းတၢင်း ၸမ်လိူၼ်ယဝ်ႉသေတႃႉ သွင်ၾၢႆႇတိုၵ်ႉၶဵင်ႈၶႅင်တေႃႇၵၼ်ဝႆႉ ႁၢဝ်ႈႁႅင်း။ ယွၼ်ႉပၢင်တိုၵ်းသေ ၵူၼ်းမိူင်းၵမ်ႈၼမ် လႆႈငိူင်ႉပၢႆႈၽေးသိုၵ်းဝႆႉ ယၢပ်ႇၽိုတ်ႇတႃႇယူႇသဝ်းၵိၼ်ယႅမ်ႉလႄႈ ယႃႈယႃ ၼႆယဝ်ႉ။