သိုၵ်းမၢၼ်ႈတင်း ၸုမ်း PDF ယိုဝ်းၵၼ် တီႈဢိူင်ႇၸၢမ်ၵႃး ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းၼပ်ႉႁဵင် လႆႈပၢႆႈၽေးသိုၵ်း ယွၼ်ႉၵူဝ်သိုၵ်းမၢၼ်ႈ မႃးပွႆႇမၢၵ်ႇသႂ်ႇၼႂ်းဝၢၼ်ႈ ဝႃႈၼႆ။
တႄႇဢဝ် ဝၼ်းတီႈ 18/07/2024 ၼႆႉမႃး သိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်း ၵၼ်ႁၢဝ်ႈႁႅင်း တီႈဢိူင်ႇၸၢမ်ၵႃး ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း 2,000 ပၢႆ လႆႈပၢႆႈၽေးသိုၵ်း ၼႆယဝ်ႉ။
ၵူၼ်းပိုၼ်ႉတီႈ ဢိူင်ႇၸၢမ်ၵႃး လၢတ်ႈတီႈၽူႈတွႆႇႁွၵ်ႈဝႃႈ – “ဢေႃႈၶႃႈ လႆႈမႆႈၸႂ်ၶႃႈဢေႃႈ ၶဝ်ၸႂ်ႉမၢၵ်ႇလူင် ယိုဝ်းတိၵ်းတိၵ်းလႄႈ ၵူဝ်တူၵ်းသႂ်ႇၼႂ်းဝၢၼ်ႈ ၸိူဝ်းၼႆႉၶႃႈဢေႃႈ။ ထႅင်ႈလွင်ႈၼိုင်ႈၵေႃႈ ၵူဝ်သိုၵ်းမၢၼ်ႈ ၶဝ်ၸႂ်ႉၶိူင်ႈမိၼ်တိုၵ်း လၢမ်းလိမ်းပွႆႇမၢၵ်ႇသႂ်ႇ ၸွမ်းၼႂ်းဝၢၼ်ႈ ၼႂ်းသူၼ်ၸိူဝ်းၼၼ်ႉၶႃႈဢေႃႈ။ ပၢင်တိုၵ်း ၼႆႉ တေပဵၼ်ႁိမ်းဝၢၼ်ႈၸၢမ်ၵႃး။ သိုၵ်းမၢၼ်ႈၼႆႉ တေလုၵ်ႉတၢင်းဝဵင်းပၢင်လွင်းသေ ယိုဝ်းမၢၵ်ႇလူင်သႂ်ႇ ၶႃႈ။ မၢၵ်ႇလူင် ၸိူဝ်းၼႆႉသမ်ႉ မႃးတူၵ်းၸွမ်းႁိမ်းႁွမ်း တႃႈႁိူဝ်းလႄႈ ၼႂ်းဝၢၼ်ႈၸိူဝ်းၼႆႉပႃး”- ဝႃႈၼႆ။
ၼႂ်းဢိူင်ႇၸၢမ်ၵႃးၼႆႉ မီးဝႆႉ ၵူၼ်းမိူင်းယၢင်းလႅင် ပၢႆႈၽေးမႃးသွၼ်ႈဝႆႉထႅင်ႈတင်းၼမ် ယွၼ်ႉပၢင်တိုၵ်း ပွၵ်ႈၼႆႉသေ ႁဵတ်းႁႂ်ႈၵူၼ်းဝၢၼ်ႈလႄႈ ၵူၼ်းပၢႆႈၽေးသိုၵ်း လႆႈဢွၼ်ၵၼ်သိုပ်ႇပၢႆႈၽေးသိုၵ်းထႅင်ႈတၢင်ႇ တီႈ ၼႆယဝ်ႉ။
“ယၢမ်းလဵဝ်ၼႆႉ ၵူၼ်းဝၢၼ်ႈၶဝ် ပၢႆႈဢွၵ်ႇဝၢၼ်ႈၵမ်ႈၼမ်ယဝ်ႉၶႃႈ။ တေမီးယူႇ ႁူဝ်ၵူၼ်း 2 ႁဵင်ပၢႆၶႃႈဢေႃႈ။ ယွၼ်ႉၵူၼ်းပၢႆႈၽေး တၢင်းမိူင်းယၢင်းလႅင်ၵေႃႈ မႃးမီးဝႆႉတီႈၸၢမ်ၵႃးၼႆႉၼမ်ၼႃႇၶႃႈလူး။ ၵွပ်ႈၼႆလႄႈ ၸဵမ်ၵူၼ်းဝၢၼ်ႈတင်း ၵူၼ်းပၢႆႈၽေးသိုၵ်း လႆႈသိုပ်ႇပၢႆႈထႅင်ႈၼၼ်ႉၶႃႈယဝ်ႉ။ မၢင်ၸိူဝ်း ပၢႆႈၵႂႃႇတၢင်းၼမ်ႉပၼ်ႇ ဢၼ်မီးၾၢႆႇႁွင်ႇၼွင်။ ပၢင်တိုၵ်းသမ်ႉ မီးၾၢႆႇၸၢၼ်းၼွင်ၶႃႈဢေႃႈ”- ၵူၼ်းပိုၼ်ႉတီႈ ဢိူင်ႇၸၢမ်ၵႃး သိုပ်ႇလၢတ်ႈၼႄၼင်ႇၼႆ။
ၽွင်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ ယိုဝ်းၵွင်ႈလူင် မၢၵ်ႇလူင်သႂ်ႇၼႂ်းဝၢၼ်ႈလႄႈ ႁဵတ်းႁႂ်ႈတိူဝ်ႉၺႃးႁိူၼ်းယေး ၵူၼ်းမိူင်း ထုၵ်ႇၾႆးမႆႈလၢႆလင်။ လိူဝ်ၼၼ်ႉ ၵူၼ်းမိူင်းဢၼ်ၺႃးၸၢၵ်ႇမၢၵ်ႇ မၢတ်ႇၸဵပ်းၵေႃႈ မီးထႅင်ႈ 3 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ၵေႃႉၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ